ސުމާޓް ފޯނަށް ޚާއްޞަ އެޕްލިކޭޝަނެއް ތަރައްގީ ކުރަން ފުރުސަތު ލިބިއްޖެ ނަމަ

                -އިބްރާހިމް ޝަމްވީލް،އަތަގަސްދޮށުގެ، އިހަވަންދޫ 12އޭ-

ސައިންސާއި ފަންނިއްޔާތު (ޓެކްނޮލޮޖީ)ގެ އެހީގައި ދުނިޔެ މިވަނީ ވަރަށް ބޮޑަށް ހުޅުވާލެވިފައެވެ. ކޮންމެ ކަމެއް ކުރުމުގައި ވެސް ސައިންސާއި ފަންނިއްޔާތުގެ ބޭނުން ދަނީ ހިފަމުންނެވެ. އެއީ މި ދާއިރާއަށް ލިބުނު ކުރިއެރުމުގެ ސަބަބުން ކަންތައްތައް ކުރުމުގައި ވަރަށް ބޮޑަށް ފަސޭހަވެފައި ވާތީއެވެ. މިގޮތުން، ސުމާޓު ފޯނަކީ މީހުންގެ ދިރިއުޅުމަށް އެންމެ ބޮޑު ބަދަލުތަކެއް ގެނައި އެއް ވާސިތާއެވެ. އަތުގައި ސުމާޓު ފޯނެއް ނެތް މީހަކު މަދުއިރު، އެ ފޯނު މިވަނީ މީހާގެ ދިރިއުޅުމުގެ ހުރިހާ ކަމަކަށް ވެސް ބާރު ފޯރުވާ އެއްޗަކަށް ވެފައެވެ. އޭގައި އެކުލެވޭ އެޕުތަކުގެ އެހީގައި އިންސާނާއަށް ތަފާތު ގިނަގުނަ ފަސޭހަތަކެއް ފޯރުކޮށްދެއެވެ. ސުމާޓު ފޯނުތަކަށް ޚާއްޞަ އެޕުލިކޭޝަނެއް ތަރައްގީ ކުރުމުގެ ފުރުސަތު ލިބިއްޖެނަމަ ތަރައްގީ ކުރާނީ އިގްތިސާދީ ކަންކަމަށް ޚާއްޞަ އެޕެކެވެ. މި އެޕުގެ އެހީގައި އިގްތިސާދީ ގިނަ މައުލޫމާތުތަކާއި ކުރިއަށް ދިއުމަށްހުރި ފުރުސަތުތައް ފަހުމުވެގެންދާނެއެވެ. މި އެޕު ވެގެންދާނީ، ޚާއްޞަ ގޮތެއްގައި ދިވެހިންނަށް އިގްތިސާދީ ގިނަގުނަ ފައިދާތަކެއް ހާސިލްވުމުގެ މެދުވެރިއަކަށެވެ. އަޅުގަނޑުގެ އެޕުގެ ނަމަކީ "ވުނޭރު" އެވެ.

ދިވެހިރާއްޖެއަކީ ނިސްބަތުން ގިނަ އަދަދަކަށް ތައުލީމީ ޒުވާނުން ތިބި ގައުމެކެވެ. ގިނަ ފާސްތައް ނަގައި މޮޅަށް ކިޔަވާފައިވާ ޒުވާނުން ގިނައެވެ. ނަމަވެސް، ހިތާމައަކީ މިފަދަ ތައުލީމީ އެތައް ޒުވާނުންނެއް ހުސްއަތައި ވަޒީފާއެއް ނެތި ތިބިކަމެވެ. ވަޒީފާތަކުގައި ތިބި ޒުވާނުން ވެސް ތިބީ އެމީހުންގެ ފެންވަރަށް ވުރެ ދަށް ވަޒީފާތަކުގައެވެ. މިކަމުގެ އެއް ސަބަބަކީ ވަޒީފާގެ ފުރުސަތުތައް ހުރި ދިމާތައް ނޭނގުމެވެ. އަޅުގަނޑު ތައާރަފުކުރާ "ވުނޭރު" ވެގެންދާނީ މިފަދަ ޒުވާނުންނަށް ވަޒީފާގެ ފުރުސަތުތައް ހުރި ދިމާތައް އަންގައިދޭ އެކުވެރިޔަކަށެވެ. އަޅުގަނޑުގެ އެޕް ތައްޔާރު ކުރާއިރު ރާއްޖޭގައި އުފެދިފައިވާ ގިނަ ވިޔަފާރީތަކާއި ރިސޯޓުތަކާއި ސަރުކާރާއި އަމިއްލަ ފަރާތްތަކުގެ އޮފީސްތައް އެއް ވިއުގައަކުން ގުޅާލާނަމެވެ. އެހިނދުން، މިތަންތަނުން ވަޒީފާގެ ފުރުސަތުތައް ހުޅުވާލާހިނދު ވަގުތުން ވަގުތަށް އެޕަށް މައުލޫމާތުތައް އަދާހަމަވެ، ގިނަ ޒުވާނުންނަށް އެމީހުންނަށް ހުރި ފުރުސަތުތަކާ ބެހޭގޮތުން މައުލޫމާތު ލިބިގެންދާނެއެވެ. މިކަމުގެ ސަބަބުން ވަޒީފާއެއް ނެތް އެތަކެއް ޒުވާނުންނަށް ވަޒީފާ ލިބި އަދި ވަޒީފާތަކުގައި ތިބި ފަރާތްތަކަށް ވެސް އެފަރާތްތަކުގެ ތައުލީމީ ފެންވަރާ ގުޅޭ ވަޒީފާއެއް ލިބުމަށް މަގު ފަހިވެގެންދާނެއެވެ.

"އަލީ ބާބާ" ނުވަތަ "އީބޭ" އޭ ބުނެފިނަމަ އެއީ ކޮން އެއްޗެއްކަން ނޭނގޭ ދިވެއްސަކު މަދުވާނެއެވެ. އެއީ އަޅުގަނޑުމެންގެ ތެރޭގައި އެހައި ބޮޑަށް އޮންލައިން ވިޔަފާރީ ވައިގަ ހިފާފައިވާތީއެވެ. މިފަދަ ތަންތަނަކީ ބޭރުގެ ވިޔަފާރީތައް ކުރިއެރުވުމަށާއި އެމީހުންގެ މުދާތައް ވިއްކުމަށް ފަސޭހައަކަށް އެކުލަވާލާފައިވާ ތަންތަނެވެ. ދިވެހިރާއްޖޭގައި ވެސް އޮންލައިން ވިޔަފާރީ ކުރެވޭނެ މަގުތައް ހުރި ނަމަވެސް ދިވެހިންގެ އިތުބާރު ލިބިފައިވާ އަދި ރަނގަޅު ގޮތުގައި ކުރިއަށް ގެންދެވޭ ތަނެއް ނެތެއެވެ. އަޅުގަނޑުގެ "ވުނޭރު" ވެގެންދާނީ ދިވެހި ވިޔަފާރީތަކަށް އެމީހުންގެ މުދާ އޮންލައިންކޮށް ވިއްކުމަށް އެހީތެރިވެވޭނެ މަންސައަކަށެވެ. މި އެޕަށް ގުޅެން ބޭނުންވާ ހުރިހާ ވިޔަފާރީތަކަށް އެ ފުރުސަތު އޮންނާނެއެވެ. އޮންލައިން ވިޔަފާރީ ކުރެވޭގޮތަށް އެޕު ތައްޔާރު ކުރުމުގެ ސަބަބުން ދިވެހި ވިޔަފާރިތަކަށް އެމީހުންގެ އުފެއްދުންތައް ވިއްކުމަށް ފަސޭހަވެ، ވިޔަފާރީތައް ކުރިއަރައި ދާނެއެވެ. މިކަމުގެ ނަތީޖާއެއްގެ ގޮތުން ރާއްޖޭގެ ބޮލަކަށް ޖެހޭ ނިސްބަސް (ޖީ.ޑީ.ޕީ) ކުރިއަރައިގޮސް، ވަޒީފާތައް އުފެދި، ދިވެހިންގެ ދިރިއުޅުމުގެ ފެންވަރު އުފުލިގެންދާނެއެވެ.

އަޅުގަނޑު ތައްޔާރު ކުރާ ސުމާޓު ފޯނު އެޕުލިކޭޝަން ވެގެންދާނީ ކިޔަވާކުދިންނަށް ފައިދާހުރި ގިނަގުނަ މައުލޫމާތުތަކެއް ލިބިގެންދާނޭ އެޕަކަށެވެ. އެޕުލިކޭޝަން ތަރައްގީ ކުރުމަށް ނިންމާފައިވާ ގޮތުން އެޕުގައި ކިޔަވާކުދިންނަށް ޚާއްޞަ ބައެއް އެކުލެވޭނެއެވެ. މި ބައިގައި އެކުލެވޭނީ އިގްތިސާދީ މައުލޫމާތުތަކެވެ. ރާއްޖެއާއި މަޝްހޫރު ބައެއް ގައުމުތަކުގެ އިގްތިސާދީ މައުލޫމާތުތައް އެޕުގައި ހިމެނިފައިވާނެއެވެ. ޚާއްޞަ ގޮތެއްގައި މިބައިގެ ފައިދާ ބިޒްނެސް ސުޓުރީމް ކިޔަވާ ދަރިވަރުންނަށް ކުރާނެއެވެ. އެއީ ދިވެހި ބަހުންނާއި ބޭރުގެ ބަސްބަހުން ލިޔެފައިވާ ގިނަ ލިޔުންތަކާއި ފޮތްތައް ފަސޭހައިން ކިޔައިލެވޭނެ އިންތިޒާމު އެޕުގައި ހަމަޖެހިފައިވާނެތީއެވެ. މި ލިޔުންތަކަކީ އިލްމީ ގޮތުން މުއްސަނދި ލިޔުންތަކަށް ވާނެއެވެ. މިކަމުގެ ސަބަބުން ކިޔަވާކުދިންގެ ސިކުނޑިތައް އިގްތިސާދީ ގޮތުން ފުޅާވެ، އެކުދީންގެ އިލްމު އިތުރުވެ، ތައުލީމީ ރޮނގުގައި ފަސޭހަތައް ލިބިގެންދާނެއެވެ.

"ވުނޭރު"ގައި ދިވެހިރާއްޖޭގެ އިގްތިސާދީ ތަފާސްހިސާބުގެ އިތުރުން ބޭރުގެ ބޮޑެތި އެހެން ގައުމުތަކުގެ އިގްތިސާދީ  ތަފާސް ހިސާބުތައް ވެސް އެކުލެވިފައިވާނެއެވެ. މި މައުލޫމާތުތަކަކީ އަބަދުވެސް އަދާހަމަ ކުރެވިފައިވާ މައުލޫމާތުތަކަކަށް ވާނެއެވެ. މިކަމުގެ ސަބަބުން މި އެޕުވެގެންދާނީ އިގްތިސާދީ މާހިރުންނަށާއި ދިރާސާވެރީންނާއި ލަފާކުރާ ފަރާތްތަކަށް ވެސް ފައިދާކުރާނޭ އެޕުލިކޭޝަނަކަށެވެ. އެޕުގައިވާ މިފަދަ މައުލޫމާތުތަކުގެ އެހީގައި މުސްތަގުބަލުގައި ރާއްޖޭގެ އިގްތިސާދަށް އަތުވެދާނޭ ބަދަލުތަކާއި އިގްތިސާދު އޮތް ހާލަތުގެ އިތުރުން އިގްތިސާދު ރަނގަޅު ކުރުމަށް ކުރެވިދާނޭ ކަންތައް ދެނެގަނެވޭނެއެވެ. ރާއްޖޭގެ އިގްތިސާދު އަޑި ގަނޑަކަށް ވެޓެމުންދާނަމަ އެކަމުން އަރައިގަތުމަށް ކުރަންވީ ކަންތަކާއި އިގްތިސާދު ކުރިއަށް ދާނަމަ އިތުރަށް ކުރިއަށް ގެންދިއުމަށް އަޅަންވީ ފިޔަވަޅުތައް މިއެޕުގެ އެހީގައި ދެނެގަނެވޭނެއެވެ. އެހެންކަމުން، މި އެޕުލިކޭޝަން ވެގެންދާނީ ރާއްޖޭގެ އިގްތިސާދު ރަނގަޅު ގޮތުގައި އެއްހަމައެއްގައި ހިފަހައްޓައި ކުރިއަށް ގެންދިއުމަށް އެހީވެދޭނެ މިތުރަކަށެވެ.

ދިވެހިންގެ 'ބިޒީ ޝެޑިއުލް'ގެ ސަބަބުން ވިޔަފާރީކުރަން ލިބޭ ވަގުތު އޮންނަނީ ވަރަށް މަދުވެފައެވެ. ބައެއްފަހަރު ލިބޭ ވަގުތުގައި ވިޔަފާރީތައް ނުކުރެވެއެވެ. މިގޮތަށް ދިމާވަނީ ގަންނަން ބޭނުންވާ އުފެއްދުން ލިބެންހުރި ފިހާރައެއް ނޭނގޭތީއެވެ. އަޅުގަނޑުގެ "ވުނޭރު" ވެގެންދާނީ ބޭނުންވާ އުފެއްދުމުގެ ނަން ލިޔެލުމާއެކު، އެ އުފެއްދުން ލިބެންހުރި ފިހާރަތައް ލިބެންހުރި އަގުތަކާއެކު އެނގިގެންދާނޭ އެޕަކަށެވެ. އެޕުގައި ހިމެނިފައިވާ ހުރިހާ ވިޔަފާރީތަކުގެ ތެރެއިން އެ އުފެއްދުން ލިބެންހުރި ފިހާރަތައް ގަންނަން ބޭނުންވާ ފަރަތްތަކަށް އެނގިގެންދާނެއެވެ. އެހިނދުން ހުރިހާ ފިހާރައަކަށް ހިނގުމުގެ ބަދަލުގައި ގޭގައި އޮވެ އެޕު ބަލައިލުމަށްފަހު، ބޭނުންވާ އަގުގައި ހުރި ފިހާރައަށްގޮސް ބޭނުންވާ އުފެއްދުން ގަނެލެވޭނެއެވެ. މިކަމުގެ ސަބަބުން އަގުހުރި ވަގުތުތައް ސަލާމާތް ވެގެންދާނެއެވެ.

އަހަރެމެން ދިރިއުޅުމުގެ ބައެއްކަމުގައި ސުމާޓު ފޯނުތައް ވެފައިވާހިނދު، އެ ފޯނުތަކުގައި ބޭނުންކުރުމަށް އިގްތިސާދީ އެޕުލިކޭޝަނެއް ތަރައްގީކުރުން ވާނީ ގިނަގުނަ މަންފާތަކެއް ހާސިލް ކުރެވޭނޭ ކަމަކަށެވެ. މިގޮތަށް އަޅުގަނޑު ތައްޔާރުކުރާ "ވުނޭރު"ގެ އެހީގައި ވެސް ވަޒީފާގެ ފުރުސަތުތައް ދެނެގަނެވި، ރާއްޖޭގެ ވިޔަފާރީތަކަށް އޮންލައިންކޮށް މުދާ ގަނެ ވިއްކާ، ކިޔަވާކުދިންނަށާއި އިގްތިސާދީ މާހިރުންނަށް މައުލޫމާތު ލިބި، ދިވެހިންނަށް ބޭނުންވާ އުފެއްދުންތައް ހުރި ފިހާރަތައް އަގާއެކު ދެނެގަނެވިގެންދާނެއެވެ. މިކަމުގެ ނަތީޖާއެއްގެ ގޮތުން، ދިވެހި ވިޔަފާރި ވެރިނަނަށާއި މަސައްކަތްކުރަން ބޭނުންވާ ފަރާތްތަކަށާއި ކަސްޓަމަރުންނަށް ވެސް ގިނަގުނަ މަންފާތަކެއް ހާސިލްވާނެއެވެ. މި އެޕުވާނީ ޖުމުލަގޮތެއްގައި މުޅި ގައުމުގެ އިގްތިސާދީ ނާރެސް ހަރުދަނާ ކުރުމަށް އެހީތެރި ވެދޭނެ މަދަދުވެރިއަކަށެވެ.