ތަރައްޤީއަށާއި އަމާންކަން ޤާއިމުކުރުމަށާއި ސުލްހައަށް ޓަކައި ވެހިބަސްބަސް ވަރަށް މުހިއްމު

ލިޔުނީ: ފަތުޙުﷲ އަޙްމަދު (2019 ފެބުރުވަރީ 19)

އިންސާނުން ވާހަކަދައްކާ ބަސްބަހާއި ބެއްސަށް މިއަދު ކުރިމަތިވެފައިވާ އެންމެ ބޮޑު އެއް ބިރުވެރިކަމަކީ ބަވަނަވަމުންދާ ދުނިޔެއަށް ފައްކާނުވެ، ސުމޭކީ ވަސީލަތްތަކާއި ފަންނިއްޔާތުގެ މަންސަތަކަށް އަހުލުވެރި ނުވުމުގެ ސަބަބުން އެ ބަސްބަސް އުވި، ނެތިދާނެ ކަމުގެ ބިރުވެރިކަމެވެ. ވަކީން ޚާއްޞަކޮށް މަދު މީސްކޮޅެއް ވާހަކަދެއްކުމަށް ބޭނުންކުރާ ބަސްބަހަށް މި ނުރައްކާ ބޮޑެވެ. އެއީ، އެހެން ބަސްބަހުގެ ނުފޫޒާއި އަޅުދާސްކުރުމާއި އެ ބަސްބަހަށް ބަރޯސާވާ މިންވަރު އިތުރުވުމުގެ ސަބަބުން އަމިއްލަ ބަހަށް އިހުމާލުވެވޭތީއެވެ. އަމިއްލަ ބަހުން ވާހަކަދެއްކުމަށް އޮންނަ ފުރުޞަތުތައް ހަނިވާތީއެވެ. އަމިއްލަ ބަހުން ޢިލްމު ހޯދުމަށް އޮންނަ ފުރުޞަތުތައް މަދުވާތީއެވެ. ނަތީޖާއަކަށް ވެގެންދަނީ އަމިއްލަބަސް އެއް ފަރާތްކޮށްލެވުމެވެ. ޒަމާނަށް އަދާހަމަ ނުވާ ބަހެއް ކަމަށް ޤަބޫލުކުރެވި ބީރައްޓެހި ކޮށްލެވުމެވެ.

 ބަހެއް އުވި، ނެތި ދިޔުމުގެ މަރުހަލާތައް ފެށިގެން އަންނަނީ އެބަހެއްގެ ބަހުރުވަތަކާއި، ވެހިބަސްތަކާއި، ރަށްފުށުގެ ލަހުޖާތަކަށް ބީރައްޓެހި ވެވޭ ހިސާބުންނެވެ. އެހެންކަމުން، 2019ވަނަ އަހަރުގެ މާދަރީބަސް އަމާޒުކޮށްފައިވަނީ ވެހިބަހަށް އިސްކަން ދިނުމަށެވެ. "ތަރައްޤީއަށާއި އަމާންކަން ޤާއިމުކުރުމަށާއި ސުލްހައަށް ޓަކައި ވެހިބަސްބަސް ވަރަށް މުހިއްމު" ދައުރެއް އަދާކުރާކަން ހާމަކޮށްދިނުމަށެވެ.

ވެހިބަހަކީ އެމީހަކު ވާހަކަދައްކާ ބަސް ނުވަތަ ބަހުރުވައެވެ. ނޫންނަމަ އެމީހަކު ނިސްބަތްވާ ގަބީލާއެއް ނުވަތަ ރަށެއް ނުވަތަ އަވަށެއްގެ މީހުންގެ އަމިއްލަ ބަސްމަގެވެ. ވެހިބަހަކީ ރަށްފުށު ބަހުރުވައަށް ވެދާނެއެވެ. އެހެންމެ ވެހިބަހަކީ ބަސްބުނާރާގު ނުވަތަ ލަހުޖާއަކަށް ވެސް ވެދާނެއެވެ. ނުވަތަ ވަކި ބަޔަކު ވާހަކަދައްކަން ބޭނުންކުރާ ރާގަށް ވެސް ވެދާނެއެވެ. ކޮންމެ ވެހިބަހަކުން ދިރުން ލިބެމުންދަނީ އެތައް ސަގާފަތަކަށެވެ. އެތައް އާދަކާދައަކަށެވެ. ވެހިބަހާއި ވެހި ލަފުޒުތަކުން ބުނެދެނީ އެބައެއްގެ އަމިއްލަ ވަންތަކަމެވެ. އަމިއްލަ ސަގާފަތެވެ. އަމިއްލަ ހަޟާރަތުގެ މުއްސަނދިކަމެވެ.

ވެހިބަހެއްގެ ލަފުޒެއް ވަށައިގެން އެތައް ހާސް މައުލޫމާތެއް އެކުލެވިގެންވެއެވެ. އެތައް ވާހަކައެއް ފޮރުވިގެންވެއެވެ. ވެހި ލަފުޒުތަކުން އެބައެއްގެ ހަޟާރަތް ދައްކުވައިދެއެވެ. މިނިވަންކަން ހާމަކޮށްދެއެވެ. އެބައެއްގެ މަސައްކަތްތެރިކަމާއި ފަންނުވެރިކަން ބަޔާންކޮށްދެއެވެ. މިސާލަށް، މަސްވެރި މުޖުތަމައެއް ނަމަ އެބައެއްގެ ބަސްކޮށާރުގައި މަސްވެރިކަމާ ގުޅުން ހުރި ލަފުޒުތައް ގިނަވާނެއެވެ. މަހާމެހީގެ ބާވަތްތަކަށް އަމިއްލަ ޚާއްޞަ ނަންތަކެއް ބޭނުންކުރާނެއެވެ. އެހެންކަމުން، ބަހެއްގައި ހިމެނޭ ވެހި ލަފުޒެއް ގެއްލިއްޖެ ނަމަ ނުވަތަ މަރުވެއްޖެ ނަމަ ގެއްލިގެން އެ ދިޔައީ މައުލޫމާތުގެ އެކުމާފާނެކެވެ. ކާބަފައިންގެ ހަޟާރީ ތަރިކައިގެ ތެރެއިން މުހިއްމު ތަރިކައެކެވެ. އެހެންކަމުން، ކޮންމެ ވެހިބަހަކީ ވެސް މާދަރީބަހަށް މުހިއްމު އެހައިމެ ބޭނުންތެރި އުންސުރެކެވެ.

މުޖުތަމައެއްގެ ބަސްމަގު ބިނާވެގެންދަނީ އެބައެއްގެ ދިރިއުޅުމުގެ ހާލަތަށެވެ. ތަހުޒީބީ މުޖުތަމައުތަކުގައި ބޭނުންކުރާ ބަސްމަގާއި ތަހުޒީބުވަމުންދާ މުޖުތަމައުތަކުގައި ބޭނުންކުރާ ބަސްމަގާ ވަރަށް ތަފާތެވެ. ނާތަހުޒީބު ސަރަހައްދުތަކާއި ޖަންގަލި ތަކުގައި ދިރިއުޅޭ މީހުން ބޭނުންކުރާ ބަސްމަގުގައި ވަރަށް ބޮޑެތި ފަރަގުތަކެއް ހުރެއެވެ. ކޮންމެ ބައެއްގެ ވެސް ބަސްމަގާއި ބަސްބުނުމުގެ ރާގު އަދި ވާހަކަދެއްކުމުގެ ގޮތްފޮތް ބިނާވަނީ އެބައެއްގެ އަސާސީ ބޭނުންތަކަށެވެ. އެބައެއްގެ މެދުގައި އޮންނަ ސުލްޙަވެރިކަމާއި އެއްބައިވަންތަކަމާއި މިނިވަންކަމަށެވެ. މިނިވަންކަމަށް ޖިހާދު ކުރާ މުޖާހިދުންގެ ބަސްމަގާއި މިނިވަންކަމުގެ ހިޔަލުގައި ދިރިއުޅޭ މުވާޠިނުންގެ ބަސްމަގާ އެތައް ގޮތަކުން ފަރަގުވާނެއެވެ. ތަހުޒީބު މުޖުތަމައު ތަކުގައި ދިރިއުޅޭ މަހުޖަނުންގެ ބަސްމަގާއި ވާހަކަދެއްކުމުގެ ވައްޓަފާޅިއާއި ހައިހޫނުކަމަށް ފެންބޮވައިގެންފައިވާ ނިކަމެތީންގެ ބަސްމަގާއި ފަރަގުވާނެއެވެ. މިއިން ކޮންމެ ބައެއްގެ މެދުގައި ބޭނުންކުރަމުންދާ އަމިއްލަ ބަސްތަކާއި އަމިއްލަ ލަފުޒުތަކަކީ އެތައް ވާހަކަތަކެއް އެއިން ހާމަކޮށްދޭ ކަންކަމެވެ.

ދިވެހިބަހަކީ ދިވެހީންގެ ބަހެވެ. ދިވެހިބަހުން ވާހަކަދައްކާ މީސްކޮޅު މަދުވުމާއި ތަޢުލީމީ ނިޒާމު ބޭރުބަހަކަށް ބަރޯސާވެފައި އޮތުމާއި، ފަތުރުވެރިކަމަށް ދިވެހި އިޤްތިޞާދު ބަރޯސާވުމަކީ ދިވެހި ބަހަށް ގޮންޖެހުންތައް ކުރިމަތިވާނެކަމެވެ. ދިވެހި ބަހުރުވަތަކަކީ އެއްވެސް ރައްކާތެރިކަމެއް ކަށަވަރު ކުރެވިފައި ނުވާ ބަހުރުވަތަކަކަށް ވާތީ މިދެންނެވި ނުރައްކާ އިންތިހާއަށް އެ ބަހުރުވަތަކަށް ކުރިމަތިވެއެވެ. އެހެންމެ ރަށްރަށުގެ ވާހަކަދެއްކުމުގެ ރާގުތަކާއި، ލަހުޖާތަކަށް މި ނުރައްކާ ވަކީން އިތުރެވެ. ދިވެހީންގެ އަޒުމަކަށް ހަދަން ޖެހެނީ އަމިއްލަވަންތަކަމާއި އަމިއްލަ ގޮތްފޮތް ކުރިއެރުވުމަ ޓަކައި އަމިއްލަ ވެހިބަހުން މުއާމަލާތާއި މުވާސަލާތު ކުރުމަށް އޮންނަ ފުރުޞަތު އިތުރުކުރުމަށެވެ. އަމިއްލަ ވެހިބަހަށް ދިރުން ލިބޭނެހެން ފަންނިއްޔާތުގެ ދާއިރާތަކުން ޖާގަ ހޯދައިދިނުމަށެވެ. އަމިއްލަ ވެހިބަހާއި ވާހަކަދެއްކުމުގެ އަމިއްލަ ގޮތްގަނޑު ރަސްމީ މަންސަތަކުގައި ބޭނުންކުރުން އުފަލެއްކަމަށް ހެދުމަށެވެ. ވެހިބަހުން ވަޒަންބަހުރުވަތައް އުފައްދާ އާއްމުކުރުމަށް އިސްވުމަށެވެ. މީސްމީޑިއާގެ އެކި މަންސަތަކުގައި ވެހިބަހާއި މާދަރީބަހުން ލިޔެވޭ މިންވަރު އިތުރުކުރުމަށެވެ. އޭރުން މި ފޮނިފޮނި ދިވެހިބަހުގެ ޙައްޤުގައި ވަކާލާތު ކުރާނެ ޒުވާނުން އިތުރުވާނެއެވެ. ދިވެހިބަސް ދިވެހިންނާއެކު އާ އުސްމިންތަކަކަށް އުދުހިގަންނަން ތައްޔާރުވާނެއެވެ.