އުތުރުން މިލަދުން މަޑުލު އުތުރަށް

=ލިޔުނީ، މުޙައްމަދު ޝަމްވީލް، ރިވަރ، ހއ. އިހަވަންދޫ=

ބަރު ދަބަސް ކޮނޑުގައި އަޅުވާލުމަށްފަހު ބާރު ހިނގުމެއްގައި ގޮސް ބަނދަރަށް ނިކުތީމެވެ. ބަނދަރުމަތީގައި ގެ ހުރުމަކީ ކިހައިބޮޑު ނަސީބެއްކަން މިއަދު އަހަރެންނަށް (ހއ އިހަވަންދޫ، ރިވަރ، މުހައްމަދު ޝަމްވީލްއަށް)  ވިސްނުނެވެ. އެ ވިސްނުން ބަދަލުކުރަން ޖެހުނީ ބަނދަރު މައްޗަށް ނަޒަރު ހިންގާލުމުންނެވެ. ބިމުގައި ފިޔަވަޅު ތަތްކުރަމުން މަންޒިލާހަމައަށް އަހަންނަށް ދެވުނު އިރު މަންޒިލުގައި ތިބީ 5 ވަރަކަށް މީހުންނެވެ. ގަޑި ޖެހިގެން އައެއްކަމަކު ބަނދަރަށް އެންމެ ކުރިން ނުކުތް މީހުންގެ ލިސްޓުގައި އަހަރެން ހިމެނޭނެއެވެ. އުފާވެރި ރާގުތަކެއް ހިތުގައި ޖަހައިލިއެއްކަމަކު ފޫހީގެ ރާގުތައް އެ އުފާވެރި ރާގުތަކަށް ގަދަކުރަމުން ދިޔައެވެ. އަދި އެންމެން ހަމަވާނެ އިރެއް ނޭގޭތީއެވެ.

ކުރެވުނީ ކުށްހީތަކެވެ. ހީކުރިގޮތާ ޚިލާފަށް 5 މިނެޓްގެ ތެރޭގައި އެންމެން ހަމަވިއެވެ. މުއައްޒަފުންނާއި ބެލެނިވެރިންނެވެ. ގްރޭޑް 12ގެ ދަރިވަރުންނެވެ. ދަރިވަރުން ހަމަވުމާއެކު އައިޑީ ކާޑުތައް ނެގުމަށް މުސާ އަލީ ސަރ

(އިހަވަންދޫ ސުކޫލުގެ މުދައްރިސެއް) އައުމުން ލުއި ހިނިތުންވުމަކާއެކު އަހަރެންގެ އައިޑީ ކާޑު ހަވާލުކޮށްލީމެވެ. ސުވާލުން ފުރިފައިވާ ހިތަކާއެކުގައެވެ. ފަހުން ވިސްނައިލެވުނެވެ. ފާޑަކަށް ހިނިވެސް އަޔެވެ. އައިޑީ ކާޑަކީ އެތައް ލައްކަ ރުފިޔާކަން ވިސްނުމުންނެވެ. ހަނދާނަށް އައީ ދިވެހި މުދައްރިސްގެ އިރުޝާދީ ލަފުޒުތަކެވެ. އިރުކޮޅެއްގެ ތެރޭގައި ހުރިހާ އެންމެން ބޯޓަށް އެރުމަށް އިޝާރާތްކުރުމުން ބޯޓާ ދިމާޔަށް މިސްރާބުޖެހީމެވެ. ގްރޭޑް 12 ގެ 33 ދަރިވަރުންނާއި 11 ބެލެނިވެރިންނާއި 46 މުވައްޒަފުން މި ދަތުރުގައި ބައިވެރިވާއިރު ދެންވާނެ ގޮތް އަންދާޒާ ކޮށްލާށެވެ. އާއެކެވެ. ދަތުރުނާމާލިޔުމަށް އެހީއެއްގެ ގޮތުން، ކޮންމެ އަހަރަކު އިހަވަންދޫ ސްކޫލުގެ ގްރޭޑް 12ގެ ދަރިވަރުން ކުރާ ސަގާފީ ދަތުރު މި ފަހަރު ކުރަން މި ތިބީ އަހަރުމެންނެވެ. 

1 ފެބުރުއަރީ 2018 ގައި ހއ. އިހަވަންދޫން ށ. ފޯކައިދޫއަށް ދިޔުމަށް ބޯޓަށް އެރި އެންމެ ފަހު މީހުންގެ ލިސްޓުގައި އަހަރެންގެ ނަން ވިދާނެކަން ކަށަވަރެވެ. އެންމެން ހަމަވުމުން ބޯޓުގެ ކައްޕިތާންގެ ޒިންމާ އުފުލަންފެށިއެވެ. އިހަވަންދޫގައި މާލެ ދަތުރުކުރުމަށް ދުއްވާ ތަހުތު ބޯޓުގެ ފަޅުވެރިންގެ އަވަސް ހަރަކާތްތަކާއެކު 12:25ގައި ބޯޓު ނައްޓައިލީ މާލެ ދިޔުމަކަށް ނޫނެވެ. މިލަދުން މަޑުލު އުތުރުބުރިއަށް ދިޔުމަށެވެ.

ރަށުގެ މަލަމައްޗަށް ނަޒަރު ހިންގައިލީމެވެ. ތަރައްޤީގެ ކުލަވަރު ފެންނަން އޮތް ހިތްގައިމު މަލަމައްޗެކެވެ. ސިޔާސީ ކުލަތަކުގެ ދިދައިން ޖަރީވެފައެވެ.

ގެޔަށް ކަޅިއެއް އެއްޅުނީ އެއްވެސް އިހުތިޔާރެއް ނެތިއެވެ. އަހަރެންގެ އެންމެ ގާތް އެކުވެރިޔާއެވެ. އަހަރެން މީ ކާކުކަން އެންމެ ރަނގަޅަށް ދަންނާނީ އެ މިތުރެވެ. ދޫކޮށްލާފައި ދެވޭނެ ހެއްޔެވެ؟ ހިތުގައި ކެކި އަރަމުންދާ ޝުއޫރުތައް ބަނޑަށް ޖައްސާލާފައި އަހަރެންގެ ވާޖިބު އަދާކުރުމަށް އަވަސްވެގަތީމެވެ.  ބޯޓުގެ އެންމެ މައްޗަށް އަރައި ޓީޗަރުންނާއި ދަރިވަރުން ޖަމާޢަތެއް ހަދައި މެންދުރު ނަމާދު ކޮށްލީމެވެ.

މެންދުރު ނަމާދަށް ފަހު އެއޮތީ ކަމެއްތާއެވެ. މުޅި ބޯޓުގައި ވެސް ގުގުމަމުން ދިޔައީ "ޗީސް"ގެ އަޑެވެ. އެތަކެއް ފޮޓޯތަކާއި ނަފްސީތަކެއް ނެނގިގެން ދިޔައެވެ. އެފްބީގެ ސްޓޭޓަސް އަޕްޑޭޓް ވެގެންދިޔައެވެ. ޕްރޮފައިލް ފޮޓޯތަކާއި ކަވަރ ފޮޓޯތަކެވެ. އިންސްޓޯގުރާމަށް ކާންދިން މީހުންނެއް ވެސް މަދެއް ނޫނެވެ. މައިޑޭތައް ވެސް ޖަރީކޮށްލީ އެ ފޮޓޯތަކުންނެވެ.

ބަނޑު ކުކުރަމުން ދިޔަކަން އެންމެނަށް ވެސް ރޭކައިލީ ހިތްހަމަޖެހޭ ވަރަށް ފޮޓޯ ނެގުނުފަހުންނެވެ. ކާން ތައްޔާރުކޮށްލުމަށް އަހަރެމެން އަވަސްވެގަތީމެވެ. ތަށިތަކަށް ކާތަކެއްޗާއި ބޯނެ ތަކެތި އަޅާ އެންމެނަށް ފޯރުކޮށްދިމުނުގައި ހުރިހާ ފިރިހެންކުދިން ހަރަކާތްތެރިވިއެވެ. ހުރިހާ އެންމެންނަށް ކާތަކެތި ފޯރުކޮށްފައި ދެން އެ އޮތީ އަހަރުމެންގެ ފަހަރުތާއެވެ.

ކާތަކެއްޗަށް ނަޒަރު ހިންގައިލީމެވެ. އަބަދުވެސް އަހަރެންނަށް އެންމެ މީރު ޕިއްޒާއެވެ. ބަޖިޔައާއި ގުޅައެވެ. މީރު ޗޮކްލެޓް ކޭކެވެ. ކޯކާއި ޖޫހެވެ. ބަނޑަށް ހިންހަމަޖެހުމެއް ލިބިގެން ދިޔަކަން އެނގިގެން ދިޔައީ އަނގައިން ބޭރުވި އަޑެއްގެ ސަބަބުންނެވެ. ކާތަކެތީގެ ރަހަ މީރުކަމުންނެވެ. ބޮވުނު ކޯކުތަކުގެ ސަބަބުންނެވެ.

ވަރުބަލިކަން އިހުސާސްކުރެވިގެން ދިޔައެވެ. ލޮޑުކަން ހަށިގަނޑަށް އަތްގަދަކޮށްލިއެވެ. ބޯޓުގެ އެންމެ މައްޗަށް އަރައި އޮށޯވެލީމެވެ. "އަވިން ފެންވަރައިލަން" ބޭނުންވީއެއް ނޫނެވެ. އަވިން ފެންވެރުނަސް ޖެހެމުންދާ ނަލަ ވައިރޯޅިތަކުން އެ ހޫނެއް އިހުސާސެއް ނުކުރެވެއެވެ. ހެޑްސެޓް ޖަހައިލައިގެންނެވެ. ނިދީގެ ފުން ކަނޑަކަށް ވައްޓައިލިއިރު ވެސް އަހަރެންނަށް އެކަމެއް ރޭކާއެއްނުލައެވެ.

ހޭވެރިކަންވީ ހުނުމުގެ އަޑުތައް ކަންފަތްދޮށުގައި ގުގުމަމުން ދާތީއެވެ. ޖަހަމުންދިޔަ ލަވަތައް ނިމިފައިވާތީއެވެ. ވާނުވާއެއް ބަލައިލުމަށް ޓަކައި އަހަރެން ވެސް ތެދުވެލީމެވެ.

އަހަރެންގެ ގާތަށް އައީ އަމަށަކު ހިންޏެއް ނޫނެވެ. އިވެމުންދިޔައީ ސާއިން(12 ގެ ދަރިވަރެއް) "ރޯނު ޚަބަރު"ތައް ކިޔާ އަޑެވެ. ތަފާތު އިންޓަވިއު ކުރާ އަޑެވެ. ތަފާތު އަޑުތަކުންނެވެ. ބޯޓުގެ މަތީބައިގައި ހުރި ނޫކުލއި ބޮޑެތި އެސްލޯނު ހޮޅިއެއްގެ އެއްފަރާތުގައި އަނގަ ޖަހައިގެން އޮވެގެންނެވެ. އެ ސަކަރާތުގައި އެތަކެއް ވަގުތެއްވެގެން ދިޔަ ގޮތްވެސް ނޭގުނެވެ.

އަހަރެން އަނެއްކާ ވެސް ނިދީގެ ވަކިތަކުގައި ބަންދުވިއެވެ. އެތައް ބުރަ މަސައްކަތެއްކޮށް އެ ނުބައި ވަކިތަކުން އަހަންނަށް ސަލާމަތްވެވުނު އިރު ގަޑިން 4:15 ވެއްޖެއެވެ. ބޯޓުގެ މައްޗަށް ނަޒަރު ހިނަގއިލީމެވެ. މަސްއަށިތަކުގައި މަސްތަކެއް ހިއްކަން އަވީލައިފައި ހުރިކަހަލައެވެ. އެތަން މިތާނގައި އެންމެން ނިދާ މަރުވެފައެވެ. ސަލާމަތުން ތިބީ ދެތިން މީހެކެވެ. ބޯޓުގެ އެތެރޭގެ ހާލަތު ވަކީން ކުޑައެއް ނޫނޯލައެވެ. ބައެއް މުދައްރިސުން ތިބީ ތާހުގައި ކަސްތޮޅު އެޅިފައެވެ. އަނެއް ބަޔަކު ގޮދަޑިތަކަށް ހޫނު ކުރުމުގައެވެ. ކުލާސް އަންހެން ކުދީން ތިބީ ބޯޓުގެ ބޭރުގައި އޮލަވާހަކަގައެވެ.

ލަސްތަކެއްނުވެ ށ ފޯކައިދޫގެ ނަލަނަލަ މަލަމަތި ލޮލުގެ ކުރިއަށް ދައްކާލިއެވެ. ރުއްތަކާއި ގަސްތަކުން ބަރާވެފައިވާ ބޮޑު ރަށެކެވެ. އެންމެން ވެސް ތެދުވެ މޯޅިއަކަށް ދެމިލައި ފޯނުގެ ޒިންމާ އަދާކުރުމަށް އަވަސްވެގަތެވެ. ރަށުގެ ހިތްގައިމު ބަނދަރު ދައްކާލެވިއްޖެއެވެ. ހިންދީ އެއްގެ މަރުގެ ހިތާމާގައި ބައިވެރިވަނީ ކަހަލައެވެ. ގަޑިން 5:15 ގައި ބޯޓު ށ. ފޯކައިދޫގެ ފަޅުގެ ތެރެއަށް ބަނދަރު ކުރުމުން އެއީ ކުށްހީއެއްކަން އެނގުނެވެ. އެއީ ސުކޫލުގެ ޔުނީފޯމުގައި ތިބި ދަރިވަރުންނެވެ. ސަފަކަށް އެތުރިފައެވެ. މުއައްޒަފުންނާއި ބެލެނިވެރިންނެވެ. ރައްޔިތުންނެވެ.

ތާޒާވެލުމަށް ޓަކައި ތާޒާ ކުޑަ ފެންފުޅިއަކާއި ކުޑަ ޓިޝޫ ޕެކެޓެއް ހިމެނޭހެން ކަރުދާހުން ތައްޔާރުކޮށްފައިވާ ނަލަނަލަ ޓުކުރިއާއި ސަލާންގަލާން ތަކުން މަރުހަބާ ކީ ވަރަށް ވެސް ފުރިހަމައަށެވެ. ފޯކައިދޫ ސްކޫލުގެ ޕްރިންސިޕަލް އާއެކު އެރަށު ސްކޫލަށް ދިއުމަށް މިސްރާބުޖެހީމެވެ. ހިތްގައިމު މާހައުލެކެވެ. ކިޔަވާލަން ފަސޭހަ ފެހި ސުކޫލެކެވެ.

ހޯލުގައި ބޭއްވިގެންދިޔަ ކުޑަކުޑަ ހަފްލާގައި އިހަވަންދޫ ސުކޫލާއި ފޯކައިދޫ ސްކޫލުގެ ޕްރިންސިޕަލްގެ ވާހަކައަށްފަހު ސައިފޮދެއް ދެވިގެންދިޔައެވެ. ކިތަންމެހާ ވެސް ފުރިހަމައެވެ. ކޮންމެ ކުއްޖަކު ވެސް އެރަށުން ކުއްޖަކާ ހަވާލުކުރަން ފެށުނެވެ. ހައިރާންވީދެނެވެ. ތެދެކެވެ. ކިޔަނީ އެއް ނަމެކެވެ. ކިޔަވަނީ ވެސް އެއް ސްޓްރީމެކެވެ. މާކަ ތަފާތެއްވެސް ނެތެވެ. އާއެކެވެ. ދެ ޝަމްވީލް އެއްތަން ވީއެވެ.

ގެޔަށް އައުމުން އަވަސްވެގަތީ މަޣްރިބު ނަމާދަށް ދިއުމަށެވެ. އިޝާ ނަމާދު ވެސް ކުޑަތަންވެފައި ވާތީއެވެ.

ދެ ނަމާދުކޮށްލުމަށް ފަހު ކައިގެން ޕްރީސުކޫލަށް ދިއުމަށް ތައްޔާރުވުމަށް އަވަސްވެގަތީމެވެ. އެރަށު ކައުންސިލުންނާ ބައްދަލު ކޮށްލުމަށް ޓަކައެވެ. ޕްރީސުކޫލަށް ދެވުނީ ހަމަ ބަރާބަރު ގަޑިއަށެވެ. އެންމެ މިނެޓްއެއް ވެސް ލަސްވި ނަމަވެސް ގަޑިޖެހުނު ކަމަށް ވާނެއެވެ.ބައްދަލުވުމުގައި ޖެހުނީ އަނގަ މައްޗަށް ނަގައިގެން އިންނާށެވެ. އަގައިން ސޮނި ނުވެއްޓެނީ ހަމަކިރިޔާއެވެ. ވާނީވެސް އެހެންތާއެވެ. ފޯކައިދޫ ކައުންސިލުންގެ ހިންގުންތެރިކަން ފެނިފައެވެ. ކޮށްފައިވާ އަދި ކުރަމުންދާ ކަންތައްތައް ފަށްޗަކަށް އަމުނައިލުމުންނެވެ. އެއީ ފިސާރި ބަޔެކެވެ.

 4 އަހަރުވެސް އެންމެ ޚިދުމަތްތެރި ކައުންސިލްގެ މަގާމު މި ލިބެނީ ނަމަކަށް ނޫނެވެ. ހަމަ އެވަގުތު، ސްކޫލުގެ މުވައްޒަފުންގެ އެކުވެރިކަމުގެ ފުޓުސަލް މެޗެއް އެރަށު ފުޓު ސަލް ދަނޑުގައި ކުރިއަށް ދިޔަކަން ދަތުރުގެ ކަމާކެމިން ހެކި ދިނެވެ. މެޗުބަލައިލަން ދާން ބޭނުންވި ނަމަވެސް، "ކެއްސަމުން ލޯގަނޑު އުކައި ނުލެވޭނެކަން" އެނގި އެކަމާ މާބޮޑަށް އަޅައެއް ނުލެވުނެވެ.

ޝެޝަން ނިންމާލުމަށްފަހު ގެޔަށް ގޮސް އެނދުގައި ބޯ ޖައްސައިލިހެން ވެސް ހީނުވެއެވެ. ނިދީގެ މައި ރާޅެއް އައިސް އަހަރެން ގޮވައިގެން ނިދީގެ ކަނޑަކަށް ގެންދިޔައެވެ. 

5 ގަޑިއިރު ނިދީގެ ކަނޑުގައި ވޭތުކުރުމަށްފަހު އަހަންނަށް ހޭވެރިކަން ވީ ފޯނުގެ ގޮވާލުމުގެ އަޑަށެވެ.

އަވަހަށް ތެދުވެ ތައްޔާރުވެލައިގެން ފަތިހުގެ ބަރަކާތްތެރިކަން ލިބިގަތުމަށް އަވަސްވެގަތީމެވެ. ނަމާދު ކޮށްލައިގެން އައިއިރު ސުފުރާމަތި ހުރީ ތައްޔާރުކޮށްލާފައެވެ. ކަޅުސަޔާއި ކޮފީއެވެ. ލޮނު ބިސްކޯދާއި ކްރީމް ބިސްކޯދެވެ. ބިހާއި ބިސްގަނޑެވެ. މީރު ކާތަކެއްޗަށް ބަނޑުން ހޫނު މަރުހަބާ އެއްކިޔުމަށްފަހު ކުލާސް ކުދީން އެއްތަނަކަށް ޖަމާވެލުމަށް ދިޔައީމެވެ. ފުޓުބޯޅަ މެޗެއް ރޭވިގެންދިޔައީ ހަމަ ކުއްލިއަކަށެވެ. ސަމީއު ސަރ (ގްރޭޑް ލީޑިން ޓީޗަރ)ގެ އަމުރު މައުރޫފުލިބުމުން 'ކުއްލި މެޗު' ކުރިއަށް ގެންދިއުމުގެ އިންތިޒާމުތައް ހަމަޖެހުނެވެ. އެއްކޮޅުން ވާދަކުރީ އިހަވަންދޫ ސްކޫލުގެ 12ގެ ފިރިހެން ދަރިވަރުންނެވެ. އަނެއްކޮޅުން ވާދަކުރީ ފޯކައިދޫ ސްކޫލުގެ ދަރިވަރުންނެވެ. ނުރަސްމީ މެޗެއް ނަމަވެސް ވާދަވެރި ކުޅުމަކަށް ފަހު 11:10 އަކުން މެޗުން މޮޅުވެގެން ދިޔައީ އަހަރުމެން ކުރި ސަޕޯޓެއްގެ ސަބަބުންނެވެ.

ކުޅެ ނިންމާލުމަށްފަހު ގެޔަށްގޮސް ސައިބޮއެގެން ސުކޫލަށް ދިޔުމަށް ތައްޔާރުވެލީމެވެ. ދަތުރުނާމާގެ މަސައްކަތްތަކުގެ ތެރޭގައި ހިމެނޭ ބައޮގްރަފީއަށް މައުލޫމާތު  އެއްކުރުމަށް ޓަކައެވެ. ސްކޫލަށް ދެވުނު އިރު މައުމޫނު ސަރ

(ދަތުރުގެ ކޯޑިނޭޓަރެއްގެ ގޮތުގައި ފޯކައިދޫ ސްކޫލުން ހުންނެވި މުދައްރިސް) އާއި ފަތުޙުﷲ ސަރ (އަޅުގަނޑުމެން ދިވެހި މުދައްރިސް)ގެ ވިލަރެސްކަމުގެ ދަށުން މައުލޫމާތު އެއްކުރުމުގެ އިންތިޒާމުތައް އޮތީ ރޭވިފައެވެ.  ފޯކައިދޫ ކައުންސިލް އިދާރާގެ ޑެޕިއުޓީ ޑިރެކްޓަރ އަލީ ނިޒާރުގެ މައުލޫމާތުތަކުގެ އެތައް ބަސްތާތަކެއް ހިފައިގެން މިސްރާބުޖެހީ އެރަށު ކުއްޅަވަށް ފަލަށް ދިޔުމަށެވެ. މައުމޫނު ސަރގެ މާލިމީ ކަމުގެ ދަށުން ދަތުރުފެށުނީ ފައިމަގުގައެވެ. އެއޮތީ މަޖާކަމެއްތާއެވެ. ޗަކަބިމުގައި ހިނގުމެވެ. ކުއްޅަވަކާއެކު "ކުއްޅަވަށް ނަފްސީ" ތައް ނެގުމެވެ. ފޮޓޯތަކުން މެމޯރީ ކާޑު ފުރައިލުމަށްފަހު ގެޔަށްގޮސް ހުކުރަށް ދިޔުމަށް އަވަސްވެގަތީމެވެ.

ހުކުރުކޮށްގެން އައިއިރު އަހަރެންނަށް މަރުހަބާ ކީ ގޭގެ ސުފުރާމައްޗެވެ. ކުކުޅުރިހައާއި ހަނާކުރި ކުކުޅެވެ. ތަރުކާރީ ބަތާއި ފުރެއިޑް ރައިސްއެވެ. އެކި ވައްތަރުތަކުގެ ޖޫހެވެ. ކުރިއަށް އޮތް ހަފުތާއަށް ބޭނުންވާވަރަށް ބަނޑުގައި ކޮއްތު ރައްކާކުރުމަށްފަހު ސުކޫލަށް ދިޔުމަށް އަވަސްވެގަތީމެވެ. ސުކޫލާ ގުޅޭގޮތުން މައުލޫމާތު ހޯދުމަށް ޓަކައެވެ. ސުކޫލުގެ ޕްރިންސިޕަލް އެ ސުކޫލާ ގުޅޭގޮތުން މައުލޫމާތު ދީ ނިމުމުން ނިންމުމުގެ ހަފްލާއެއް ބޭއްވިގެން ދިޔައެވެ. ހަނދާނީ ފިލާތަކާއި ހަދިޔާތައް ފޯކައިދޫ ސުކޫލާ ހަވާލުކުރެވިގެން ދިޔައެވެ.  ގްރޭޑް 12ގެ ދަރިވަރުންގެ މަޖައްލާ 'ދޮޅަސް 2018"ގެ ހަތަރުވަނަ އަދަދު އެރަށު ސްކޫލަށް ހަދިޔާ ކުރެވުނެވެ.އެރަށުގައި ހޭދަވި ވަގުތުގައި ކުރެވުނު ތަޖުރިބާތަކާއި އެރަށުން ފޯރުކޮށްދިން މެޚްމާންދާރީގެ މައްޗަށް ދިވެހި މުދައްރިސްގެ ޝައިރާނާ ޚިޔާލުތަކުން އުފަންކުރުވާފައިވާ 'ކާ'އެއް ޝަހާމާ (ކުލާސް ދަރިވަރެއް)ގެ ނަލަ ހިމަ އަޑު

ހުށަހެޅިގެން ދިޔައެވެ.

މައުމޫނު ސަރގެ ފަށުވި ބަސްމަގުން ފުރަތަމަ ހާފުގެ ކުޅުން އެ ފަހުލާގައި ނިންމައިލުމުން ދެވަނަ ހާފުގައި ކުޅެން އެރީ ދިވެހި މުދައްރިސް ފަތުޙުﷲ ސަރއެވެ. ޝުކުރުގެ ފައްވާރާތަކާއެކު ރޭންކުރެވިގެން ދިޔަ ހަފުލާ ނިންމާލީ އަޞުރު ނަމާދުގެ ބަންގީގެ އަޑަށެވެ. ހަފްލާ ނިމުނުއިރު ފުރަން ކައިރިވެފައިވުމުން ގެޔަށް ގޮސް އަވަހަށް ދަބަސް ޕެކް ކޮށްލުމަށްފަހު ސައިބޮއެގެން ބަނދަރަށް ނިކުތުމަށް މިސްރާބުޖެހީމެވެ. ހަދިޔާ ބަދިޔާތަކާއި ސަލާންގަލާންކުރުމުން އެންމެން ވެސް ވަކިވީއެވެ. ނަފްސީތަކުން ފޯނު ފުރައިލުމަށް ފަހުއެވެ. ލޮލުން ކަރުނަތައް ނީރާލުމަށް ފަހުއެވެ.

އާއެކެވެ. އެއީ ނަމޫނާ ރަހުމަތްތެރިންތަކެކެވެ. ބޭނުންވާ ކޮންމެ ވަގުތަކު ތިބެނީ އަހަރުމެންގެ ޚިދުމަތުގައެވެ. ވަރުބަލި ކަމެއްނެތިއެވެ.  4:45 ގައި ފޯކައިދޫގެ ފަޅުން ބޯޓު ނައްޓައިލީ އަހަރުމެންގެ ހިތްތައް ދެފަޅިކޮށްލާފައެވެ. މައުމޫނު ސަރގެ ބަހުންނަމަ "ޖާދޫގަރު"ގެ ޖާދޫގައި އަހަރުމެންނާއި އެވެރިން ޖައްސުވާފައެވެ. ނުނެއްޓޭނެ ތެރަހަކުން ދެ ރަށުގެ ރަހުމަތްތެރިން ތަތްކުރުމަށްފަހުގައެވެ. އެރަށުން ފުރީ ފުރާ ހިތަކުންނޫނެވެ. ހިތާއި ވިންދުން ދެތަން ކުރުވާފައެވެ. އަހަރެމެންގެ ދެވަނަ މަންޒިލަށް ދިއުމަށްޓަކައެވެ. ށ މިލަންދޫއަށް ދިއުމަށް ޓަކައެވެ. ހެޑްސެޓްޖަހައި ވޮލިއުމް އެންމެ ބާރުކޮށްލައިގެން އަހަރެން އިނީމެވެ. ހަސަން ހުސައިން ސަރ (އިހަވަންދޫ ސުކޫލުގެ މުދައްރިސެއް) ދިން ސަބްމެރީންގެ އެއް ބުރިން އަރުތެރެ ފަޅުފިލުވައިގެންނެވެ. މާގިނައިރުތަކެއް ނުވެ މިލަންދޫގެ ބޮޑު

ބަނދަރަށް ބޯޓު ބަނދަރުކުރެވިގެން ދިޔައެވެ. އަދި 6 އެއްވެސް ނުޖަހައެވެ. ހިތްގައިމު ބަނދަރު ފަޅުފިލުވައިދިނީ އަހަރެންމެންގެ އިސްތިޤުބާލުގައި އައިސްތިބި އެރަށުގެ ރައްޔިތުން ތަކުންނެވެ.

އެންމެން 3 ޕިކަޕަށް ބަހައިލުމަށްފަހު ޕިކަޕުގައި ރަށުތެރެ ބަލައިލަން ދިޔައިމެވެ. ތަރައްޤީގެ ކުލަވަރު ފެންނަ ދަނޑުވެރިކަމަށް ލޯބިކުރާ ބަޔަކު ދިރިއުޅޭ ރަށެކެވެ. އަނގަ ހުޅުވައިގެން ހުންނަން ޖެހުނެވެ. ހިންދިރުވާލަން ވެސް ހަނދާން ނެތިފައެވެ. "ސްމާޓް" ސުކޫލް ފެނުމުންނެވެ.  4ބުރިއަށް ނަގައިފައިވާ ބޮޑު އިމާރާތެކެވެ.

ވަންނަން ހުރި ގޭޓް ފެނުނަސް ގައިން ހީބިހި ނަގާ ގޮތްވެއެވެ. ފިނި ޓިޝޫއަކާއި ރީތި ފިނި ފެންމަލަކުން މަރުހަބާކިއިގެން ދިޔައިރު އަރުތެރެ ފަޅުފިލުވައިދިނީ މީރު ފޮނި ކުރުނބާއަކުންނެވެ. ދެން އެންމެން ވެސް މިސްރާބުޖެހީ އެކުއްޖަކާ ހަވާލުވި ދަރިވަރާއެކު ގެޔަށް ދިއުމަށެވެ. އަހަރެން ވެސް ސަމޫހާ އެކީ ގެޔަށް ދިއުމަށް މިސްރާބުޖެހީމެވެ.

ރީތި ގެސްޓް ހައުސްއެކެވެ. އެއަރ ކޯން ކޮށްފައި ހުރި އެންމެ ފަހުގެ ބެޑްރޫމްސެޓާ އެކީ ހުރި ކޮޓަރިއެކެވެ. އަހަރެންގެ ހަށިގަނޑު އެނދަށް އިހުސާސްވެސް ނުވަނީސް ސަމޫހު ބަލައިއައުމުން ދާންޖެހުނެވެ. ކެއުމަށް އިންސާފުކުރުމަށް ޓަކައެވެ. ކާން ހަދާފައިވާލެއް ފުރިހަމަކަމުން ލަދުން ހުރެ އަހަރެން ގޮސް ކާން އިށިނީމެވެ.

ފްރެއިޑު ރައިސް އާއި ތަރުކާރީ ބަތެވެ. ތެލުލި ކުކުޅާއި ފިހުނު ކުކުޅެވެ. އިސްބަޤުލު ފަންޏެވެ. މެގްނަމް ޕްޑިންނެވެ. ކުޑަގޮތެއް ހަދައިލުމަށްފަހު ކުލާސް ކުދީން އެއްތަނަކަށް ޖަމާވެލުމަށް ދިޔައީމެވެ. އަހަރުމެންގެ ދަތުރުގެ ކޯޑިނޭޓަރު ފަތުޙުﷲ ސަރ، މިލަންދޫ ސްކޫލުގެ ގުރޭޑް 12ގެ ދަރިވަރުންނަށް ކުލާސްތަކެއް ނެގުމުގައި އަވަދި ނެތި އުޅުމުން، މޫސާއަލީ ސަރގެ ހުއްދައާއެކު ރަށުގެ ތަންތަން ބަލައިލުމަށްފަހު އިޝާނަމާދު  ކޮށްލައިގެން ސުކޫލަށް ދިއުމަށް މިސްރާބުޖެހީމެވެ. ސުކޫލު ބަލައިލުމަށް ޓަކައެވެ. ޕްރިންސިޕަލް އަށް ވަކި ހާއްސަ ކޮޓަރިއެކެވެ.

 މީޓިން ބޭއްވުމަށް ވަކި ހާއްސަތަނެކެވެ. ބޮޑު ސްޓާފް ރޫމްއާއި ލައިބްރަރީއެވެ. ހުރިހާ ތަނެއްވެސް އެ ބޮޑު އިމާރާތުގައެވެ. ބޮޑު ހޯލަކަށް އަހަރުމެން ވެއްދުމަށްފަހު ދެސުކޫލުގެ ފަރާތުން ވާހަކަދެއްކުމަމަށްފަހު ބޮޑު ކެއުމަކަށް އަނެއްކާވެސް ދައުވަތުލިބިގެން ދިޔައެވެ. މިޒަމާނުގެ ނަން ހުސްކުރި ހުރިހާ ވައްތަރެއް ހަދާފައިވެއެވެ. ކާތަކެއްޗަށް މެހެމާންދާރީއަދާކުރުމަށް ބަނޑަށް ދޫކޮށްލުމަށްފަހު ތައްޔާރުވީ ސަޕްރައިޒު އިވެންޓް ބަލައިލުމަށް ޓަކައެވެ.

އިބްރަތްތެރި ކުރު ފިލްމެކެވެ. އެ ފިލްމުން ސުކޫލުގެ ބިދޭސީ ފިރިހެން ޓީޗަރުންގެ ހުނަރު ވަރަށް ރަނގަޅަށް ވެސް ހާމަވެގެން ދިޔައެވެ.

ޝުކުރުގެ ސަނާތަކާއި، ހަދިޔާ ބަދިޔާ ބަދަލުކުރުންތަކުން، ދެ ސްކޫލުގެ ވެރިން ހަފުލާގެ ކަމާކެމި ފަޅުފިލުވާދިނެވެ. އެއަށްފަހު އިހަވަންދޫ ސްކޫލުގެ 12ގެ ދަރިވަރުންގެ 'ދޮޅަސް 2018'ގެ އަދަދެއް މިލަންދޫ ސްކޫލަށް ވެސް ހަދިޔާ ކުރެވުނެވެ. ހަފުލާ ނިމުމުގެ ކުރިން ޝުކުރުގެ ކާއެއް ހުށަހެޅިގެން ދިޔައެވެ. ހަފްލާ ނިންމާލުމަށްފަހު އެންމެން ފުރަން ބަނދަރަށް ހާޒިރުވިއެވެ. ސަލާން ގަލާންތަކާއި ހަދިޔާ ބަދިޔާތަކުން ވަކިވެގެންދިޔައީ އެހަނދާންތައް ހިތުގައި ބިންވަޅުނަގައި ފައެވެ. އަބަދަށް ހުންނާނެ ފަދަ ބީދައަކުންނެވެ.

ހިތަށް ހަންޖަރުތައް އަމާޒުވި ކަހަލައެވެ. 12 ޖަހައިފައިވަނިކޮށެވެ. މިލަންދޫގެ ފަޅުން ބޯޓު ނައްޓައިލުމުންނެވެ.

ދަތުރުގެ މަތީގައި އެއްވެސް ފޯރިއެއްނެތެވެ. އެންމެން ވެސް ނިދަން އޮށޯތުމުން އަހަރެން ވެސް ނިދަން އޮށޯތީމެވެ. އަހަރެންގެ ނިކަމެތިކަން އެވަގުތު އަހަންނަށް އިހުސާސްކުރެވުނެވެ. އެއްވެސް އާރެއްބާރެއް ނެތެވެ. ނިދީގެ ލަޝްކަރު އަހަރެން ފަތަހަކޮށްލީއެވެ.

ހޭލެވުނީ ލެފިއްޖެއޭ ގޮވާއަޑު ކަންފަތުގައި ގުގުމަންފެށީމެވެ. ފުންމައިގެން ތެދުވީ އެދައްކާ ވާހަކައިގެ ހަޤީޤަތް ބަލައިލުމަށްޓަކައެވެ. އާއެކެވެ. ކުރިމަތިން ފެންނަން އެއޮތީ އަހަރެންގެ ރަށެވެ. އަހަރެންގެ ވަޠަނެވެ. ލޯބިވާ އިހަވަންދޫއެވެ. އިހަވަންދޫގެ ބޮޑު ބަނދަރަށް ބޯޓު ބަނދަރުކުރެވިގެން ދިޔައީ ފަތިހުގެ ބަރަކާތްތެރިކަމާއެކީއެވެ. ފަތިހުގެ ބަންގިއަށެވެ. އައިޑީކާޑާއި ޝަމްވީލާއި ސަމޫހު ދިން ހަދިޔާ ބަދިޔާތައް ލިބުމުން ގެޔަށް ދިޔުމަށް މިސްރާބުޖެހީމެވެ. ބަނދަރުގައި ގޭ ހުރުމަކީ ކިހައި ބޮޑު ނަސީބެއްކަން ދެވަނަ ފަހަރަށް ވަޒަންކޮށްލެވުނެވެ. ގެޔަށް އާދެވުމާއެކު އިސްވެވުނީ އިލާހީ ވާޖިބު އަދާކުރުމަށެވެ. އެއަށްފަހު، ވިސްނައިލެވުނެވެ. މިކުރެވުނީ ލައްކަ ތަޖުރިބާއޭ ހިތަށް އެރިއެވެ.

އެއާއެކު، އުފާވެރިކަމުގެ ކަރުނުން ދެ ލޯ ތެންމާލިއެވެ. އަޅުގަނޑުމެންނަށް ޓަކައި ފޯކައިދޫ ސްކޫލުން އެވީ ހާދަމަތިވެރި ޤުރުބާނެކޭ ހިތަށްއެރިއެވެ. އެ ސްކޫލުގެ އިންތިޒާމުތައް ހާދަ ފުރިހަމައޭ ބުނެލެވުނެވެ. މަދުކަމެއް މަދު އެއްޗެއް، ނެތެވެ. ގަޑިންގަޑިއަށް ހުރިހާ ކަމެއް ހުރީ ފުރިހަމަ ވެފައެއެވެ. މިލަންދޫގައި ހޭދަވި މަދު ވަގުތުކޮޅު ވެސް އެހައިމެ ފުރިހަމައެވެ. އިންތިޒާމުތައް ފައްކަލެވެ. ފުރިހަމައެވެ. އަލަށް ލިބުނު ރަހުމަތެރީންނަކީ އައު ބަޔެކޭ ހީވާނެ ވަގުތެއް ނުވިއެވެ.

މިހާ ބޮޑު ޤުރުބާނެއް ވުމުގެ ފަހަތުގައި ތިއްބެވި އެންމެހާ އިސްވެރިންނަށް ހިތުގެ އުމުގުން ޝުކުރުއަދާކުރެވުނެވެ. ވަކީން ޚާއްޞަކޮށް އިހަވަންދޫ ސްކޫލުން މި ފަދަ ބޮޑު ޚަރަދެއްކޮށް މިކަންކަން އިންތިޒާމުކުރުމުގެ ފަހަތުގައި ތިއްބެވި އަޅުގަނޑުމެންގެ ސްކޫލުގެ ޕްރިންސިޕަލް އަޙްމަދު ރަޝީދާއި ދިވެހި މުދައްރިސް ފަތުޙުﷲ އަޙްމަދާއި ގްރޭޑް ލީޑިން ޓީޗަރ އަބުދުއް ސަމީއު ކުރެއްވި ޤުރުބާނީ މަސައްކަތުގެ އަގުވަޒަންކޮށް ތުހުފާތަކަކުން ތައުޒީމުގެ މަދަހަ ދަންނަވަމެވެ. ތިލަދުންމަތީ އުތުރުބުރިން މިލަދުންމަޑުލު އުތުރުބުރިއަށް އަލަށް މިކުރެވުނީ ހަނދާނީ ތާރީޚީ ދަތުރެކެވެ. ހިތުން ފޮހެނުލެވޭނެ ތަޖުރިބާތަކެކެވެ.