މާދަރީބަހުގެ ދުވަސް ފާހަގަކުރާއިރު

ކޮންމެ އަހަރެއްގެ ވެސް ފެބުރުވަރީ މަހުގެ 21 ވަނަ ދުވަހަކީ ބައިނަލް އަޤްވާމީ މާދަރީބަހުގެ ދުވަހުގެ ގޮތުގައި ދުނިޔޭގައި ފާހަގަކުރާ ދުވަހެވެ. މި ދުވަސް މި ގޮތުގައި ފާހަގަކުރަން ނިންމާފައިވަނީ އ.ދ ގެ ތަޢުލީމާއި ސައިންސާއި ޘަގާފަތާ ބެހޭ ޖަމިއްޔާ ޔުނެސްކޯއިން ކަނޑައެޅުމެއްގެ މަތިން 1999 ވަނަ އަހަރުއެވެ.  ފެބުރުވަރީ މަހުގެ 21 ވަނަ ދުވަސް މާދަރީބަހުގެ ދުވަހުގެ ގޮތުގައި ފާހަގަ ކުރަން ޔުނެސްކޯއިން ނިންމާފައިވަނީ 1953 ވަނަ އަހަރު ބަންގުލަދޭޝް އިން ހުށަހެޅި ހުށަހެޅުމާ ގުޅިގެންނެވެ. ބަންގުލަދޭޝް އިން މި ހުށަހެޅުން ހުށަހެޅީ، 1952 ވަނަ އަހަރު ބަންގުލަދޭޝްގެ ޒުވާނުންތަކެއް މާދަރީބަސް ރައްކާތެރި ކުރުމަށް ކުރި މަސައްކަތުގެ ތެރެއިން ޝަހީދުވުމާ ގުޅިގެންނެވެ. މި ނިންމުން ޔުނެސްކޯއިން ނިންމީ ދުނިޔޭގައި މިހާރު އިންސާނުން ވާހަކަދައްކާ 7000 ބަހުގެ ތެރެއިން އެތައް ބަހެއް މި ޤަރުނު ނިމޭއިރު، އުވިގެން ނެތިގެން ހިނގައިދާނެ ކަމަށް ބަސްވާރުން އިރުޝާދު ދެއްވުމާ ގުޅިގެންނެވެ.  

ޔުނެސްކޯއިން ޤަބޫލުކުރައްވާ ގޮތުގައި ބަހަކީ އިންސާނުންނަށް ލިބިފައިވާ ޚާއްޞަ އެއްޗެކެވެ. ބަހަކީ އިންސާނުންގެ ސަގާފަތާއި އާދަކާދަތަކާ ގުޅިލާމެހިފައިވާ އެއްޗެކެވެ. އެހެންމެ، ބަހަކީ އެބައެއްގެ ދިރިއުޅުމާއި އާދަކާދަތަކާއި ޤަބޫލުކުރާ ޤަބޫލު ކުރުންތަކާއި އަޤީދާ ވެސް ދައްކުވައިދޭ އެއްޗެކެވެ. އެހެންކަމުން، އިންސާނީ ވުޖޫދުގެ ތެރެއިން ބަހެއް އުވި ދިޔުމަކީ އިންސާނީ ޙަޟާރަތެއް އުވިދިޔުންފަދަ ކަމެކެވެ. އިންސާނީ މައުލޫމާތުގެ ރައުސްމާލެއް ނެތި ދިޔުންފަދަ ކަމެކެވެ. މައުލޫމާތުގެ ކުތުބުޚާނާއެއް ގެއްލުން ފަދަ ކަމެކެވެ. ކަންމިހެން ހުރީތީ އަޅުގަނޑުމެން އެންމެން ސަމާލުކަން ދޭންޖެހޭ ބަހަކީ ދިވެހިބަހެވެ. އަޅުގަނޑުމެންނީ ދިވެހިންނަށް ވީތީއެވެ. ދިވެހިންގެ މާދަރީބަހަކީ ދިވެހިބަސް ކަމަށް ވީތީއެވެ. ދިވެހިންގެ ވެހި ބަސްތައް އުފެދި އާލާވަމުންދަނީ ދިވެހިބަހުގެ ޒަރިއްޔާއިން ކަމަށްވާތީއެވެ.

އިންސާނުން ވާހަކަދައްކާ ހުރިހާ ބަހެއްގައި ވެސް އެތަކެއް ވެހި ބަސްތައް ހިމެނެއެވެ. ވެހި ބަހަކީ އެބައެއްގެ މާދަރީބަހުން ވާހަކަ ދެއްކުމަށް އެމީހަކު އަހުލުވެރިވެފައިވާ ގޮތެވެ. ބަހުރުވައެވެ. ނުވަތަ ރާގެވެ. އެހެންކަމުން، ދިވެހިބަހުގައި ވެސް ތަފާތު ވެހި ބަސްތައް ހިމެނޭކަމަށް ދިރާސާތަކުން ހާމަވެއެވެ. ތަފާތު ބަހުރުވަތައް ބޭނުންކުރާކަން ކަށަވަރުވެއެވެ. އެކި ރަށްރަށުގެ އަހުލުވެރިން ވާހަކަ ދެއްކުމުގައި ތަފާތު ރާގުތައް ބޭނުންކުރާކަން ޔަޤީންވެއެވެ. ތަފާތު ބަސްކޮށާރުތައް ބޭނުން ކުރާކަން ފާހަގަކުރެވެއެވެ. އެކި ސަގާފަތުގައި އެކި އުޞޫލުތަކާއި އެކި ބަސްކޮށާރާއި، އެކި ހަމަތަކާއި އެކި އާދަތައް ބޭނުންކުރާކަން ހާމަވެއެވެ. އެހެންކަމުން، މި ހުރިހާ ކަމެއް ރައްކާތެރި ކުރުމަށްޓަކައި، މިކަންކަން އަންނަން އޮތް ޖީލަށް ފޯރުކޮށްދިނުމަށްޓަކައި ދިވެހިބަސް ހިމާޔަތްކުރަން ޖެހެއެވެ. ދިވެހިބަހަށް ކަމޭހިތަން ޖެހެއެވެ. ކުށެއްނެތް ގޮތުގައި މާދަރީބަހުގެ ބަހާތަކުން މުވާސަލާތުކޮށް ހެޔޮގޮތުގައި މުއާމަލާތްކުރަން ޖެހެއެވެ. މިކަންކަން ދަސްކޮށް، ދަސްކޮށްދޭން ޖެހެއެވެ. މިއީ މިފަދަ ދުވަހެއް ފާހަގަކުރާއިރު ސަމާލުކަން ދޭންޖެހޭ ކަންކަމެވެ.