ހަނިމާދޫގައި ހޭދަކުރެވުނު ދެތިން ދުވަސް

ހަލީމަތު ރަޝީދާ/ ލަކްސަމީގެ، ހއ. އިހަވަންދޫ

 2015 އޮގަސްޓް 28 ވީ ހުކުރުވިލޭރޭގެ މެންދަމުން އަލިވިއިރު ވެސް އަހަރެން (ޙަލީމަތު ރަޝީދާ/ ލަކްސަމީގެ/ ހއ.އިހަވަންދޫ) އޮތީ އެނދުމަތީ ފުރޮޅިލަ ފުރޮޅިލައެވެ. އެއްވެސް ވަރަކަށް ލޯމަރާ ހިތް ނުވެފައެވެ. ރޭގަނޑުގެ އަރާމު ނިދި އަހަރެންގެ ލޮލާ ރުޅި ބުނެފައިވާކަހަލައެވެ. އިރުއިރުކޮޅުން ހަނދާނަށް އަންނަނީ މިއަދު ހަނިމާދޫއަށް ކުރަން ހަމަޖެހިފައިވާ ދަތުރުގެ ކަންތައްތަކެވެ. ދަތުރަށްޓަކައި ވާންޖެހޭ ތައްޔާރީތަކުގެ ޚިޔާލުތަކެވެ. ރަށުގެ މިސްކިތްތަކުން ފަތިސް ނަމާދުގެ ވަގުތުވެއްޖެކަން އިޢުލާން ކުރީ އަހަރެން އެފަދަ ހާލެއްގައި އޮއްވައެވެ. އަވަސް އަވަހަށް ތަންމަތިން ތެދުވެ، ދަތުރުގެ ކުރިން ވާންޖެހޭ އެންމެ ފަހުގެ ތައްޔާރީތައް ވުމަށްޓަކައި މަސައްކަތް ފެށީމެވެ.

 ދަތުރު ދިޔުމަށް ހަމަޖެހިފައިވަނީ އިބްރާހިމްބޭގެ "ކުރިކީލަ" ދޯނީގައެވެ. ހެނދުނު 8:15 އަށް ބަނދަރަށް ނުކުތުމަށް އެންގިފައި ވީ ނަމަވެސް، 7:30 ވީ އިރުވެސް އަހަރެންނަކަށް ތައްޔާރެއްނުވެވުނެވެ. ދަތުރުމަތީގެ ކޮއްތު ކަމުގައިވާ 'ޕިއްޒާ' ތައް ފިހެ ނުނިމިގެން މަޑުކުރަން ޖެހުނީއެވެ. ގޭ މީހުންގެ އެހީތެރިކަމާއެކު، ނަސީބަކުން ގަޑިން 8 ޖެހިއިރު އަހަރެންނަށް ދަތުރަށް ތައްޔާރުވެ، ހިންދަމާލެވޭވަރުވިއެވެ. އަވަސް ފިޔަވަޅުތަކެއްގައި މަންމައާއެކު، ދަބަސް ހިފައިގެން ގެއިން ނުކުތްއިރު، ރީމާ (ކުލާސް ކުއްޖެއް) އައިސް އަހަރެންގެ ގެއާ އަރާ ހަމަވަނީއެވެ. އަހަރެމެން އެންމެންނަށް ބަނދަރަށް  ދެވުނީ 8:10 ގައެވެ. އޭރު، ޕްރިންސިޕަލާއި، ބައެއް މުދައްރިސުންގެ އިތުރުން ބައެއް ދަރިވަރުންވެސް އެތަނުގައި ހާޒިރުވެ ތިއްބެވެ. އަހަރެމެންވެސް އެ މީހުންގެ ގާތުގައި މަޑުކުރީމެވެ.

 މި ދަތުރަކީ އިހަވަންދޫ މަދަރުސާގެ ގުރޭޑް 12 ގެ ދަރިވަރުން އިސްނަގައިގެން ދަތުރުނާމާ ލިޔުމަށް ފަސޭހަކުރުމަށްޓަކައި ހދ.ހަނިމާދޫ އަށް ކުރެވޭ ދަތުރެކެވެ. މިދަތުރުގައި ގުރޭޑް 12 ގައި ތަޢުލީމު ހާސިލް ކުރަމުންދާ 16 އަންހެން ދަރިވަރުންނާއި، 13 ފިރިހެން ދަރިވަރުން އަދި 7 ބެލެނިވެރިން ބައިވެރިވިއެވެ. މީގެ އިތުރުން، އޭލެވެލްއަށް ދިވެހި ކިޔަވައިދެއްވާ ދެ މުދައްރިސުންނާއި، 4 ބިދޭސީ މުދައްރިސުންނާއި، އެއިން މުދައްރިސެއްގެ ކުޑަ އަންހެން ދަރިފުޅުގެ އިތުރުން 11 ދޭސީ މުދައްރިސުން ބައިވެރިވިއެވެ. އަދި، ދޯނީގެ ކައްޕި އާއި ދެ ފަޅުވެރިއަކުވެސް މި ދަތުރުގައި ބައިވެރިވިއެވެ.

 8:15 ގައި ފުރުމަށް ހަމަޖެހިފައި ވީނަމަވެސް، ރަށުން ފުރުނީ 8:30 ގައެވެ. އެއީ އަންހެން ކުދިންގެ ކަންތައް ބެލެހެއްޓުމަށް ހަވާލުވެގެންދާ މުދައްރިސް، ރީޝާ މިސް އަށް އާދެވުނުލެއް ލަސްވުމާ ގުޅިގެންނެވެ. ދޯނި ފާލަމާ ގާތް ކުރުމާއެކު، އެންމެންވެސް ދޯންޏަށް އެރުމަށް އަވަސްވެގަތެވެ. އޭރު، ކުދިންގެ ހާޟިރީބަލައި އައިޑީކާޑުތައް އެއްކުރުމުގައި ދިވެހި މުދައްރިސް ފަތުހުﷲ އަޙްމަދާއި، ޢަލީ ރައްޒާން (ކުލާސް ކުއްޖެއް) ހަރަކާތްތެރިވަމުން ދިޔައެވެ. އަހަރެންވެސް ސަރ އާ އައިޑީ ކާޑު ހަވާލުކުރުމަށްފަހު ދޯންޏަށް އަރާ ފަހަތު ޝީޓުގައި އިށީނދެ ރަނގަޅަށް ހަމަޖެހިލީމެވެ.

 ފައްސިޔަވައިގައި ނުހަނު ފަސޭހަކަމާއެކު، ރަށުގެ ކަނޑިންމައިން ނުކުމެ، މޫދުގެ ލޮނުގަނޑު ކަފަމުން ދޯނި ކުރިއަށް ދެއެވެ. އުޑުމަތީގައި ވިއްސާރައިގެ ކުލަތައް ފެންނަން ހުރިނަމަވެސް، މޫސުން ގޯހޭ ބުނާވަރެއް ނުވެއެވެ. މާސިންގާ ކަނޑުގައި އުފެދިފައިވާ ކުދިކުދި ޖަޒީރާ ރަށްތަކުގެ ވިނަރެސް ތަކާއި، ދޮންވެލި ފިނޮޅުތަކުގެ ހިތްގައިމު މަންޒަރުތައް ބެލުމުގައި ޝައުޤުވެރިކަމާއެކު އަހަރެން އިނީމެވެ. އޭރު، ކުލާހުގެ ފިރިހެން ކުދިންތައް ދޯނީގެ ކޮޅުފަސް ކޮޅުގައި ތިބެގެން މަޖާކުރަމުންދާ އަޑު އިވެއެވެ.

 ފަރުކަނާ އަރާ ހަމަނުވަނީސް އަހަރެންގެ ގޮހޮރު ވަޔާތެޅެން ފަށައިފިއެވެ. އޭރު، ހުރިހާ ފިރިހެން ކުދިން ނުހަނު ފޯރީގައި ޕިއްޒާ ކަމުންދިޔައެވެ. އެ މަންޒަރު ބަލާކަށް އަހަރެންނަކަށް ނީނދެވުނެވެ. އަވަސްއަވަހަށް، ޕިއްޒާ ފޮއްޗެއް ނަގާ އެއިން ބަނޑުހައި ހޫނުކަން ފިލުވައިލީމެވެ. ގިނަ އަންހެން ކުދިންތައް ތިބީ މޭނުބައިކުރާތީ ތުން ލައްޕައިގެންނެވެ. ބައެއް ކުދިން ހޮޑުވެސް ލިއެވެ. ދިވެހި މުދައްރިސާއި، ބައެއް ފިރިހެން ކުދިން، މި ކުދިންނަށް އެހީތެރިކަން ފޯރުކޮށްދެމުން ދިޔައިރު، އަނެއްބައި ކުދިން ދިޔައީ މާސްކު އަޅައިގެންނާއި، ކުދިން އަތަށް ފެންފުޅި ގުޅައިގެން މަޖާކުރަމުންނެވެ. އަހަރެންވެސް މި ހުރިހާ ކަމެއްގައި ޝައުޤުވެރިކަމާއެކު ބައިވެރިވަމުން ދިޔައީމެވެ.

 ގަޑިން 10:25 ވީއިރު، ދޯނި ވަނީ ހަނިމާދޫ ފަޅަށްވަދެ ބަނދަރުޖަހައިފައެވެ. 2 ގަޑިއިރުގެ ދަތުރަކަށްފަހު ހަނިމާދޫއަށް ލެފުނު އިރު، މަރުޙަބާ ކިޔުމަށްޓަކައި އައިސް ތިބި އެރަށު ސުކޫލުގެ ދަރިވަރުންނާއި، މުދައްރިސުން ސަފަކަށް އެތުރިފައި ތިއްބެވެ. ދިވެހި މުދައްރިސުގެ އަމުރާއެކު ހުރިހާކުދިންވެސް، ގެނައި ދަބަހާއި ހަދިޔާތައް ހިފައިގެން ދޯނިން ފޭބުމަށް އަވަސްވެގަތެވެ. އަހަރެންވެސް ދޯނިން ފައިބައިގެން މަރުޙަބާ ކިޔުމަށް އައިސް ތިބި މީހުންނާ ސަލާން ގަލާން ކުރުމުގައި މަޝްޢޫލުވީމެވެ. އެއަށްފަހު، ހަނިމާދޫ ސުކޫލްގެ ދަރިވަރުން ހަދިޔާކުރި ދަތުރުގެ ހަނދާނީ ކާޑު ކަރުގައި އަޅައިގެން އެހެން އެންމެނާއެކު ސުކޫލަށް ދިޔުމަށް ހިނގައިގަތީމެވެ.

 ފަސްވަރަކަށް މިނެޓް ފަހުން ސުކޫލަށް އާދެވުނެވެ. ބޮޑެތި ގަސްތައް ހައްދާފައިވާ ބޮޑު ސުކޫލެކެވެ. އުސް އިމާރާތްތައް ނެތެއްކަމަކު ރަށުގެ (އިހަވަންދޫގެ) ސުކޫލާ އަޅައިބަލާއިރު ފެހިކަންގަދަ ހިތްފަސޭހަ މާހައުލެކެވެ. ސުކޫލު ގޯތިތެރޭގައި މަޑުކުރުމެއްނެތި އަހަރެމެން ދިޔައީ ސުކޫލުގެ ހޯލުތެރެއަށެވެ. އޭރު، އެތަން ވަނީ ގޮނޑިޖަހާ ފުރިހަމައަށް ތައްޔާރު ކުރެވިފައެވެ. އަދި، އެކި ވައްތަރުގެ ޖޫހާއި، ފެންތަށިތަކުން މޭޒުމަތި ވަނީ ފުރާލެވިފައެވެ. ގޮނޑިތަކުގައި އިށީނުމާއެކުހެން އަތަށް ޖޫސް ތަށްޓެއް ލިބުނެވެ. ކަރުހިއްކައިގެންފައިވާލެއް ބޮޑުކަމުން، ލިބުނު 'އެޕަލް' ޖޫހުގެ މީރު ތާސީރުން ކަރުތެރެ ތެއްމާލީމެވެ. އެކަމުން އަވަދިވުމުން، ދެން އޮތީ އެރަށު ކުދިންނާ އަހަރެމެން ހަވާލުކުރުމެވެ. ލަސްތަކެއްނުވެ، އަހަރެންނާއި އަހަރެންގެ މަންމަ މިސްރާބުޖެހީ ހަވާލުވި ކުއްޖާއާއެކު އަވަހަށް ގެއަށް ދެވޭތޯއެވެ.

 އަހަރެންގެ މަންމަ އާއި އަހަރެން ތިބުމަށް ހަމަޖެހިފައިވަނީ ޝެނީލާ ކިޔާ ކުއްޖެއްގެ ގޭގައެވެ. 10 ވަރަކަށް މިނެޓުތެރޭ އަހަރެމެންނަށް ގެއަށް އާދެވުނެވެ. ދުވަހަކީ ހުކުރުދުވަސް ކަމުން ސުކޫލަށް ދިޔުމަށް ކަނޑައެޅިފައިވަނީ މެންދުރުފަހު 2:15 ގައެވެ. އެހެންވެ، ދަތުރުވަރުބަލި ފިލުވާލުމަށްޓަކައި ކޮޓަރިއަށް ވަދެ، އެނދުމަތީގައި ބުރަކަށި ޖައްސާލީމެވެ. ހުކުރުން ފޭބުމާއެކު، ސުކޫލަށް ދާން ތައްޔާރުވެގެން ކޮޓަރިން ނުކުތީމެވެ. އެއަށްފަހު، ތާޒާ ކުކުޅު ރިހައާއި، ހޫނު ބަތުގެ މީރު ކެއުމަކަށް އިންސާފުކުރުމަށްފަހު، ސުކޫލަށް ދިޔުމަށްޓަކައި ހިނގައިގަތީމެވެ.

 ދީފައިވާ ޝެޑިޔުލާ ޚިލާފަށް ފުރަތަމަ ޒިޔާރަތް ކުރުމަށް ހަމަޖެހުނީ ހަނިމާދޫގައި ހުރި "މޯލްޑިވްސް ކުލައިމެޓް އޮބަޒަވޭޓަރީ" އަށެވެ. ކުދިންގެ އަދަދު ގިނަ ވުމާއެކު، ހުރިހާ ކުދިންނަށް އެތަނަށް ދެވުނީ ދެ އުޅަނދެއްގައި ތިން ފަހަރު މަތިންނެވެ. އަހަރެންނަށްވެސް ޖެހުނީ އެއްބަޔަކު އެތަނަށް ގެންގޮސްފައި، އަހަރެމެން ބަލައި ޕިކަޕު އަންނަންދެން މަޑުކުރާށެވެ. 11 މިނެޓުގެ ދަތުރަކަށްފަހު، އަހަރެމެންނަށް އެތަނަށް ދެވުނުއިރު 2:55 ހިނގައިފިއެވެ. އެތަނުން އަހަރެމެންނަށް އެތަކެއް އާ މައުލޫމާތުތަކެއް ލިބި އާ ކަންތައްތަކެއް ތަޖުރިބާކުރެވުނެވެ. އެގޮތުން، ޙަޔާތުގައި މިހާތަނަށް އެރުނު އެންމެ އުސްތަނަށް (15 މީޓަރު އުސްމިނުގެ ޓަވަރަށް) އަރައި، ހަނިމާދޫގެ ރީތި ގަސްކަރަ ބަލައިލެވުނެމެވެ. ފަހުގެ ހަނދާނަށް ރައްކާކުރުމަށްޓަކައި ފޮޓޯތައް ނަގައިހެދުމަށްފަހު، އެތަނުން ނުކުމެވުނު އިރު ހަވީރު 4:12 ވެއްޖެއެވެ.

  

 ޢަޞުރު ނަމާދު ވަގުތު ފާއިތުވަމުން ދިޔުމުގެ ކުރިން އަހަރެންވެސް ބެލީ އަވަހަށް ގެއަށް އާދެވޭތޯއެވެ. ފާޚާނާއަށް ވަދެ މޫނުދޮވެލައި ހަދައިގެން ނުކުތްއިރު މޭޒުމަތީ އޮތް ފޯނު ހިމޭނުން ނޯވެވިގެން އުޅެއެވެ. އެހެންވެ، އަވަހަށް ފޯނުނަގައި ކަންފަތުގައި ޖެއްސީމެވެ. ފޯނުން ވާހަކަ ދެއްކީ ދިވެހި މުދައްރިސް ފަތުޙުﷲ ސަރ އެވެ. ފިރިހެންކުދިންގެ ފުޓްބޯޅަ މެޗު ފެށެން ވެއްޖެކަން ހަނދުމަކޮށްދިނީއެވެ. ސައިބޯނީ ފަހުންކަމަށް ބުނެ އަހަރެން ޝެނީލާއާއެކު ދަނޑަށް ދިޔުމަށް ނިކުތީމެވެ. އަހަރެމެންނަށް ދަނޑަށް ދެވުނު އިރު 5:05 ހިނގަނީއެވެ. އޭރު، މެޗު ފެށިގެން ކުރިއަށް ދެއެވެ. މެޗުގެ ފަހު ހާފުގައި އަހަރެން،  ދީމާ (ކުލާސް ކުއްޖެއް) އާއި ޝާހިދާ (އެރަށު ކުއްޖެއް) އާއެކު، ދިވެހި މުދައްރިސްގެ އެދުމުގެ މަތިން ފެންފުޅިތަކެއް ގަތުމަށްޓަކައި ފިހާރައަކަށް ދިޔައީމެވެ. 1،0 ކުން ހަނިމާދޫ މޮޅުވެގެން މެޗު ނިމުނުއިރު، ގަޑިން 6 ޖަހާ ބޮޑުވެދާނެއެވެ.

 އިރުއޮއްސުމަށްފަހު، އިރާދަމުގެ ގިނަ ވަގުތުތައް އަހަރެން ހޭދަކުރީ ގޭތެރޭގައެވެ. ކެއުމާއި އަރާމް ކުރުމުގައެވެ. ގޭމީހުންނާއި، ރައްޓެހިންގެ ހާލުއަހުވާލު އޮޅުންފިލުވުގައެވެ. އެއަށްފަހު، އެއަރ ޕޯޓަށް ދިޔުމަށްޓަކައި 8:30 އަށް ސުކޫލަށް ހާޒިރުވީމެވެ. ހިމަފޮދު ވާރޭގެ ތެރޭ ވިއްސަކަށް މިނެޓް ޕިކަޕުގައި ދަތުރުކުރުމަށްފަހު، އެއަރ ޕޯޓުގެ ހިތްފަސޭހަ މާހައުލަށް އާދެވުނީ 9 ޖަހަން ވެފައި ވަނިކޮށެވެ. މަތިންދާ ބޯޓު 'ކޮންޓްރޯލް' ކުރާ ޓަވަރާއި އެހެނިހެން މުހިއްމު ތަންތަން ބެލުމާއި، ފެންނަމުންދާ ތަކެއްޗާ ބެހޭގޮތުން ސުވާލުކުރުމުގައި އަހަރެން އުޅުނީ އެއްވެސް ފޫހިކަމެއް ނެތިއެވެ. އެތަނުން އަހަރެމެންނަށް ގެއަށް އާދެވުނީ 11:18 ގައެވެ. ކިތައްމެ ވަރުބަލި ނަމަވެސް، ގޭ މީހުން ކެއުމަށް ކުރާ އާދޭހެއްގެ ސަބަބުން އަހަރެންނަށް އަވަހަކަށް ނިދޭގޮތެއް ނުވިއެވެ. ކައިގެން ކޮޓަރިއަށް ނުވަދެވެނީސް، ނިދިކަން ޔަޤީން ކުރުމަށްޓަކައި ދިވެހި މުދައްރިސް ގުޅިއެވެ. ސަރ ގެ 'ކޯލަށް' ޖަވާބުދާރީ ވުމަށްފަހު އަވަހަށް އެނދަށް އަރައި ނިދަން އޮށޯތީމެވެ. އޭރު ގަޑިން 12 ޖަހާ ބޮޑުވެދާނެއެވެ.

 ނިދިފައި އޮތް ގަދަނިދިން އަހަންނަށް ހޭލެވުނީ ފޯނު އެލާމް ވާ އަޑަށެވެ. ނިންޖަށް ބަރުވެފައިވާ ދެ ލޮލުގެ އެސްފިޔަތައް ގަދަކަމުން ދުރުކޮށް ފޯނުގެ އެލާމް ކަނޑާލުމަށްފަހު، ގަޑިއަށް ބަލައިލީމެވެ. ގަޑިން 4:30 ވީއެވެ. ނަމާދަށް ގޮވިއިރުވެސް އަހަރެން އޮތީ ތެދުވާ ހިތް ނުވެފައެވެ. އެންމެފަހުން، ދަގަނޑުން ދަގަތްފާނު ދުރުކުރާ ބީދައިން، އަހަރެންގެ ހަށިގަނޑު އެނދާ ވަކިކޮށް ފާޚާނާއަށް ވަން އިރު 5:15 ވެދާނެއެވެ. ފެންވެރުމުގެ ސަބަބުން ފިނިވެފައިވާ ހަށިގަނޑަށް ހަމަޖެހުމެއް ގެނެސްދިނުމަށްޓަކައި ބަދިގެއަށް ވަދެ ހޫނު މައިލޯއެއް ބޯލީމެވެ. އެއަށްފަހު، 6 ޖެހުމުން އަހަރެމެން ދިޔައީ ރަށުގެ އަތިރިމައްޗަށެވެ. އެއީ، ދެ ރަށުގެ ކުދިންގެ މެދުގައި އެކުވެރިކަން ބަދަހިކޮށްލާ، މަޖާކޮށްލުމުގެ ބޭނުމުގައެވެ. ކުޅި ރިހާކުރާއި، ފެހި އާފަލާ އަދި ހުތް ކުންނާރުން އަނގަ މަޖާ ކޮށްލުމަށްފަހު އަހަރެމެން ގެއަށް އައި އިރު 7:15 ހިނގައިފިއެވެ.

 ގެއަށް އައި އިރު ހެނދުނުގެ ނާސްތާ ހުރީ ތައްޔާރަށެވެ. ކޮއްތު ރޮށީގެ މީރު ކެއުމުން ބަނޑު ފުރާލުމަށްފަހު 8:30 އަށް ސުކޫލަށް ދިޔައީމެވެ. އެއީ ބަޔޮގުރަފީ ލިޔުމަށްޓަކައި ބޭނުންވާ މައުލޫމާތު އެއްކުރުމަށެވެ. ހުރިހާ ކުދިން ހަމަވުމުން ގުރޫޕްތަކަކަށް ބެހިލައި މައުލޫމާތު އެއްކުރުމުގެ މަސައްކަތް ފެށީމެވެ. އެއަށްފަހު، 10 ޖެހުމުން ރޭގަނޑު ބޭއްވުމަށް ހަމަޖެހިފައިވާ ޝޯވގައި ކުޅުމަށްޓަކައި ޑްރާމާއެއް ދަސްކުރީމެވެ. ހުނުމާއި މަޖަލުގައި ވަގުތުތައް ހޭދަކުރުމަށްފަހު، 12:30 ވުމުން އަހަރެން ގެއަށް އައީ ފެންވަރާ ތާޒާވެލުމަށެވެ. ވީއެންމެ އަވަހެއް ކޮށްލައިގެން 1 ޖެހުމުގެ ކުރިން އަނެއްކާވެސް ސުކޫލަށް ހާޒިރު ވީމެވެ. އެއީ ސުކޫލުގެ ޕީ.ޓީ.އޭ ގެ ފަރާތުން އިންތިޒާމްކޮށްފައިވާ ކެއުމުގެ ޖާފަތަށް އިންސާފު ކުރުމަށްޓަކައެވެ. 'މަސްބޮނޑި'އާއި ތަފާތު އެކި ވައްތަރުގެ ކާނާގެ ރަހަދެކިލުމަށްފަހު، އަހަރެން ސުކޫލުގެ ގޯތިތެރޭގައި ހުރި ޖޯއްޔެއްގައި ޖައްސާލީމެވެ.

ކުޑަކޮށް އަރާމުކޮށްލުމަށްފަހު، "އެގުރިކަލްޗަރ ސެންޓަރަށް" ދިޔުމަށްޓަކައި އެންމެނާއެކު އަހަރެންވެސް ހިނގައިގަތީމެވެ. އޭރު، ގަޑިން 2:15 އެވެ. 15 މިނެޓްގެ ހިނގާލުމަކަށްފަހު ބޭނުންވާ މަންޒިލަށް އާދެވުނެވެ. އިރުކޮޅެއްގެ ފަހުން، އެތަނުން މީހަކު ނުކުމެ، ތަނާ ބެހޭގޮތުން މައުލޫމާތު ދޭންފެށިއެވެ. އެހެން ކުދިންނެކޭ އެއްފަދައިން އަހަރެންވެސް އެ މައުލޫމާތުތައް އަޑުއަހަމުން އެމީހާގެ ފަހަތުން ހިނގަމުން ދިޔައީ، ދޭތެރެ ދޭތެރެއިން ތަނުގެ ކޮންމެވެސް ތަސްވީރެއް ފޯނުގެ 'ގެލަރީ'އަށް އިތުރުކުރެވޭތޯ ބަލަމުންނެވެ. ފެނިގެން ދިޔަ އާ ގަސްތަކާއި، ޅަ ބަކަރިތަކުގެ ސަބަބުން ހިތްހަމަޖެހުމެއް ލިބިގެންދިޔައެވެ. ހަމައެއާއެކު، ކުކުޅުކޮށީގައި ތިބި ކުކުޅުތައް ބުއްރާސް ޖެހުމާއެކު ހިތަށް ލިބުނު ބިރުވެރިކަންވެސް އެހާމެ ބޮޑުވިއެވެ. ކޮންމެއަކަސް، 3:39 ގައި އެތަނުން ނުކުމެ ގެއަށް ދިޔުމަށް އަހަރެމެން ހިގައިގަތީ ތަފާތު އެތައް އިހުސާސްތަކަކާއެކުގައެވެ.

ފަޔަށް ލެވުނުހާ ބާރެއް ލައިފައި އަހަރެން ހިނގަމުން ދިޔައީ އަވަހަށް ގެއަށް ދެވޭތޯއެވެ. އެހެނީ، 4:15 އަށް ސުކޫލުގައި ތިބުމަށް ދިވެހި މުދައްރިސް ވަނީ އަމުރުމައުރޫފު ނެރެފައެވެ. ގެއަށް ދިޔުމަށްޓަކައި ދަތުރުކުރަންޖެހޭ ރާސްތާގެ ދުރުކަމުން އަވަހަށް ހިނގައިގެން ނޫނީ ވަގުތަށް ސުކޫލަށް އާދެވުމަކީ އަހަންނަށް ނާދިރު ކަމެކެވެ. އެހެންވެ، ގެއަށް ވަދެ މޫނުދޮވެލައި ހަދައިގެން، ތެޅެމުން ފޮޅެމުން ކަހަލަ ގޮތަކަށް އަހަރެން ސުކޫލަށް ދިޔައީމެވެ. ފަސްވަރަކަށް މިނެޓްތެރޭ ވޭނަށް އަރައި، ސިޓީ ހޮޓަލަށް ދިޔުމަށްޓަކައި އަހަރެމެން ދަތުރުފެށީމެވެ. "ބެއަރ ފުޓް" ގެ ހިތްގައިމު މާހައުލަށް އާދެވުނުއިރު 4:30 ވަނީއެވެ. ރިސޯޓެއް ފަދަ އެ ހިތް ފަސޭހަ ސަރަހައްދުން އަހަރެމެން އެނބުރި އައީ 1 ގަޑިއިރު އެތަނުގައި ހޭދަކުރުމަށްފަހުގައެވެ.

ވަރުބަލިކަމާއި ލޮނޑުކަން އިހުސާސްކުރެވިފައިވާ ހާލު، އަހަރެންނަށް ގެއަށް އާދެވުނުއިރު ދުވަހުގެ އިރުއޮއްސެން ވެދާނެއެވެ. ކޮޓަރިއަށް ވަދެވުމާއެކު ދެއަތަށް ކިރެމުންކިރެމުން ކަހަލަ ގޮތަކަށް ގޮސް އެނދުމައްޗަށް ވެއްޓި ގަތީމެވެ. ހަށިފުރާ ނޭވާއެއްލުމަށްފަހު، ގައިގައި ނެތްހިތްވަރު ނެރެގެން އޮތްތަނުން ތެދުވެ ފާޚާނާއަށް ވަދީ 7 ޖަހާއިރު ސުކޫލަށް ދާންޖެހޭތީއެވެ. ސުކޫލަށް ހާޒިރުވެ، ޑުރާމާ ދަސްކުރުމުގައި އުޅެން ފެށީ ނުހަނު ފޯރިއާއެކުގައެވެ. ގަޑިން 8:30 ގައި ޝޯވ ފެށުނެވެ. ހީކުރިވަރަށްވުރެ މާ މަޖާވެފައި ފޯރިގަދައެވެ. އަހަރެމެން ރަށު ސުކޫލުގެ މުދައްރިސުންގެ ހަރަކާތްތަކުން ހީނހީނ ބަނޑަށް ތަދުވާވަރުވިއެވެ. ހަމައެހެންމެ، އެރަށު (ހަނިމާދޫ) ސުކޫލުގެ ދަރިވަރުންގެ ދަނޑިއާއި ބޮޑުބެރުގެ އައިޓަމްތައްވެސް ނުހަނު ސަޅިއެވެ. އަހަރެމެންވެސް ވީ އެންމެ ފުރިހަމައަކަށް ޑުރާމާ ހުށައަޅައިދިނީމެވެ. ސްޓޭޖް ޝޯވ ނިންމާލުމަށްފަހު ގެއަށް އާދެވުނީ 11 ޖަހަން އުޅެނިކޮށެވެ. ގެއަށް އާދެވުމާއެކު ރޭގަނޑުގެ ނާސްތާ ކުރުމަށްފަހު، ލަސްނުކޮށް އަހަރެން ނިދަން އޮށޯތީމެވެ.

އަހަރެންނަށް ހޭލެވުނީ ފަތިހު 5:30 ގައެވެ. ހޭލެވުމާއެކު މިއަދަކީ ރަށަށް ދިޔުމަށްޓަކައި ފުރާ ދުވަސްކަން މަންމަ ހަނދާންކޮށްދިނެވެ. އަވަހަށް ތެދުވެ، ފުރުމަށްޓަކައި ދަބަހަށް އެއްޗެހި އަޅައި ދަބަސް ތައްޔާރުކުރީމެވެ. އެއަށްފަހު، 7 ޖެހުމުން މަންމައާއެކު ރަށުތެރެ ބަލައިލުމަށްޓަކައި ނުކުތީމެވެ. އަދި، ރައްޓެހިންގެ ގޭގެއަށް ޒިޔާރަތްކޮށް އެމީހުންގެ ހިތްހެޔޮކަން ހޯދީމެވެ. ޟުޙާ ވަގުތުގެ ޗާލު އަވިން ޖިސްމަށް ހަމަޖެހުން ގެނެސްދިނުމަށްފަހު، ގެއަށް އައިސް ނާސްތާ ކުރިއިރު 8:30 ވެދާނެއެވެ. އެއަށްފަހު، ކޮނޑުގައި ދަބަސްއަޅުވައިގެން އަހަރެން މިސްރާބުޖެހީ ސުކޫލާ ދިމާއަށެވެ. 9 ޖެހިއިރު ހުރިހާކުދިންވަނީ ދަތުރަށް ތައްޔާރުވެގެން ސުކޫލަށް ހާޒިރުވެފައެވެ. އެހެނަސް، ސަރ މެންނަށް އާދެވުނުލެއް ލަސްވުމާއެކު ނިންމުމުގެ ރަސްމިއްޔާތުވެސް ލަސްވެގެން ދިޔައެވެ. މި ރަސްމިއްޔާތުގައި ޝުކުރު އަދާކުރުމާއި، ހަނދާނީ ފިލައާއި ހަދިޔާތައް ބަދަލުކުރުން އޮތެވެ. ދިވެހި މުދައްރިސްގެ އެދުމުގެ މަތިން އަހަރެންވެސް ޝުކުރުގެ ބަސްތަކެއް ބުނެލީމެވެ. އެކަންތައް ނިމުމާއެކު އެންމެން އެކީ ފޮޓޯ ނަގައި، ފުރުމަށްޓަކައި ދޯނި ދޮށަށް ނުކުތީމެވެ.

ވަދާޢުގެ ސަލާންގަލާން ކުރުމަށްފަހު، އަހަރެންވެސް ދޯންޏަށް އެރީމެވެ. އަދި، އެހެންކުދިންގެ ހާޟިރީ ބެލުމުގައި ސަރ މެންނާއެކު ހަރަކާތްތެރިވީމެވެ. ހަނިމާދޫގެ ބަނދަރުމަތިން ފަޒާގެ ތެރޭގައި ހޫރެމުންދާ އަތްތަކަށް ޖަވާބުދާރީވުމުގެ ގޮތުން އަތްތައް ހޫރުވަމުން އެރަށު ފަޅުން ނުކުމެވުނު އިރު، ގަޑިން 10:10 ހިނގަނީއެވެ. އައި އިރެކޭ އެއްފަދައިން މޫސުން ގޯހެއް ނޫނެވެ. ރަށަށް އައުމަށް ކުރި މި ދަތުރުގައި އަހަރެމެންނާއެކު އިތުރު އެހެން ދެމީހަކު ވެސް ބައިވެރިވިއެވެ. ކޯމަސް އައިނުގެ ފަރި ހަރަކާތްތަކާއި، ވެލަލުގެ ރީތި ފީނުން ދެކިލުމަށްފަހު ދޯނި އައިސް ރަށަށް ބަނދަރުޖެހިއިރު 12:38 ވެއްޖެއެވެ. އޭރު، ސުކޫލުގެ ޕްރިންސިޕަލާއި، ބައެއްކުދިންގެ އާއިލާތަކުގެ މެންބަރުން އަހަރެމެންގެ އިސްތިޤުބާލުގައި އަތިރިމައްޗަށް އައިސް ތިއްބެވެ. ފާލަމާ ދޯނި ކައިރިކުރުމާއެކު، ދަބަސް ކޮނޑުގައި އަޅުވައި އަތުން ހަދިޔާ ކޮތަޅުތައް ހިފައިގެން އަހަރެންވެސް ދޯނިން ފޭބީމެވެ. އެއަށްފަހު، އައި.ޑީ ކާޑު ލިބުމުން އަވަހަށް ގެއާ ދިމާއަށް މިސްރާބު ޖެހީމެވެ. ގެއަށް އައިސް ގަޑި ބަލައިލިއިރު މެންދުރުން އަނބުރާ 1 ޖެހީއެވެ.

ހަނިމާދޫގައި އަހަރެންނަށް ހޭދަ ކުރެވުނު އެ ދެތިން ދުވަހުގެ ތެރޭގައި އަހަރެންނަށް އެތަކެއް އާ ތަޖުރިބާތަކެއް ކުރެވި، އާ ކަންތައްތަކެއް ދަސްވެގެން ދިޔައެވެ. އެ ދުވަސްތަކުގެ ހަނދާންތައް ވަނީ އަހަރެންގެ ސިކުނޑީގެ އެންމެ ފުނުގައި ރައްކާކުރެވިފައެވެ. މި ފަދަ ދަތުރެއް އިންތިޒާމް ކޮށްދެއްވިކަމަށްޓަކައި އިހަވަންދޫ މަދަރުސާގެ މެނޭޖްމަންޓަށް ޝުކުރުވެރި މިވަނީ އަހަރެމެންގެ ދިވެހި މުދައްރިސް ފަތުހުﷲ ސަރ ގެ ނަން ރަން އަކުރުން ފާހަގަކުރަމުންނެވެ. ހަމައެއާއެކު، މި ދަތުރަށްޓަކައި ހަނިމާދޫގެ އެންމެހާ އަހުރަވެތި ރައްޔިތުން ވެދެއްވި ޤުރުބާނީއަށްޓަކައި، ހިތުގެ އުމުގުން ޝުކުރުތައް ފަށްފަށް މިކުރަނީ ދުލުން ބުނެލާ ދެތިން ބަހަކުން، އަދި ފޮޅުވަތެއްގައި މިހެން ލިޔެލާ ޖުމްލައަކުން، އެކަމުގެ އަގު ވަޒަން ނުކުރެވޭނެކަން އެނގިހުރެއެވެ. އަހަރެމެންނަށްޓަކައި ހަނިމާދޫ ސުކޫލުގެ އިސްވެރިންނާއި، ދަރިވަރުންގެ އިތުރުން ބެލެނިވެރިން އެ އަދާކުރި ފުރިހަމަ މެހެމާންދާރީއަކީ އެފަދަ ދެވަނައެއް ނުވާ މެހެމާންދާރީ އެކެވެ. އެކަމަށްޓަކައި އެފަރާތްތަކަށް ޝުކުރުގެ ގުލްހާރުތައް ވެދުން ކުރާ ހާލު، އަހަރެންނާ ހަވާލުވި ޝެނީލާގެ އާއިލާއަށް ހިތުގެ އިޚްލާސްތެރި ޝުކުރެއް ރައްދުކުރަމެވެ.