ފައްކާ ދަތުރެއް

މުޙައްމަދު ފިރާޤު / ފަހިވާ/ ހއ. އިހަވަންދޫ

2012 ސެޕްޓެމްބަރ 7 ވީ ހުކުރުދުވަހުގެ އިރު ފެނުން ތޮޅިލިއިރު އަހަރެންހުރީ ހއ. އިހަވަންދޫ ބަނދަރުގެ އިރުމަތީ ސަރަހައްދުގައި ހުރި ރުކެއްގެ ދަށުގަ އެވެ. ދަތުރުދިޔުމަށް ހަމަޖެހިފައިވާ "މުތީ" ދޯންޏާދިމާލުގަ އެވެ. އެ ދޯންޏަކީ އިހަވަންދޫއާއި ކުޅުދުއްފުއްޓާދެމެދު ދަތުރުކުރާ އަމިއްލަ މީހެއްގެ ފެރީއެކެވެ. ފުރަންހަމަޖެހިފައިވާ ގަޑިއަކީ 6:00 ކަމުގައި ވީނަމަވެސް އެ ގަޑިއަށް ފުރޭގޮތް ނުވީ ގަޑިޖެހުނުއިރުވެސް ދަތުރުގެ ބައެއް ބައިވެރިން ހާޒިރުނުވާތީ އެވެ. ނަމަވެސް، އެންމެ ފަހުވަގުތު މަޑުކުރަންޖެހުނީ އައިޑީ ކާޑު ނުލައި އާދެވުމުގެ ސަބަބުން އެ ބަލައިދިޔަ ކުއްޖަކާއި އޭނައާއެކުދިޔަ އިތުރު ކުއްޖަކު ނައިސް ލަސްވެގެންނެވެ. އެ ދެކުދިން ބަނދަރާ ދިމާއިން އަންނަތަން ފެނުމާއެކު ބައިވެރިންތައް ދޯންޏަށް އަރަން ފެށި އެވެ. ހުރިހާ ބައިވެރިން އަރައި ނިމުނުއިރު އެދެބައިވެރިންވެސް ތިބީ ދޯނި ކައިރީގަ އެވެ. އެދެބައިވެރިން އެރުމާއެކުހެން ކައްޕިތާނުގެ ހުނަރުވެރިކަމާއެކު ކުޑަ ހިނދުކޮޅެއްގެ ތެރޭގައި ނެރާދިމާއަށް ދޯނީގެ މިސްރާބު ސީދާކޮށްލި އެވެ.

ބައިވެރިން ދޯނީގައި ހަމަޖެހުމާއެކުހެން ދަތުރުމަތީގައި ކިޔުމަށް ހަމަޖެހިފައިވާ ދުޢާއެއްކިޔެވެ. އިސްވެ ދުޢާ ލާދިނީ 12 ބީގެ ދަރިވަރު ޙަސަން ސަމީހެވެ. އަހަރެމެންގެ ދަތުރަކީ އެޗް.އެސް.ސީ އިމްތިހާނުގައި އިމްތިހާނުކުރެވޭ ބައެއްކަމުގައިވާ ދަތުރުނާމާލިޔުމަށް އިހަވަންދޫ މަދަރުސާގެ ގުރޭޑް 12ގެ ދަރިވަރުން އަހުލުވެރިކުރުވައި، އެފަދަ ކަމެއް ތަޖުރިބާކުރުވައި އަދި އެބައިން ރަނގަޅު ނަތީޖާއެއް ހޯދުމަށް މަގުފަހިކުރުވުމުގެ ގަސްތުގައި ހދ. ނޭކުރެންދޫއަށް ދާން ކުރާދަތުރެކެވެ. ދޯންޏަށް ކަނޑިންމައިން ނުކުމެވުނުއިރު ގަޑިން 6:29 ވެއްޖެ އެވެ. މި ދަތުރުގައި އަހަރެން (މުޙައްމަދު ފިރާޤް/12ބީ) އާއެކު ޖުމުލަ 45 މީހުން ބައިވެރިވި އެވެ. އެއީ 14 ފިރިހެން ދަރިވަރުންނާއި 17 އަންހެން ދަރިވަރުންނާއެކު ޖުމުލަ 31 ދަރިވަރުންނާއި ، 8 މުދައްރިސުންނާއި، 3 ބެލެނިވެރިންގެ އިތުރުން ކައްޕިތާނާއި ދެ ފަޅުވެރިންނެވެ. މުދައްރިސުންގެ ތެރޭގައި އިހަވަންދޫ މަދަރުސާގެ ޕުރިންސިޕަލާއި އެއް ޑެޕިއުޓީ ޕުރިންސިޕަލްވެސް ހިމެނެ އެވެ.

ދަބަހާއި، ގެންދިޔަ އެހެނިހެންވެސް ތަކެތި ރަމަތަކޮށްލުމަށްފަހު ދޯނީގެ ހިޔާގަނޑުގެ ތެރެއިން ދިރުނބާކޮޅަށް ނުކުމެ ހުސެންދަރި ކައިރީ ޖައްސާލީމެވެ. ދުވަހަކީ މޫސުން ވަރަށް ރީތި ދުވަހެކެވެ. ކަނޑުމަތި ސާލެއްހެން ފެންނަންނެތަސް ދުވަސްވަރާ އަޅާބަލައިއިރު، އެންމެ މަޑު ދުވަހެކޭ ބުނުމަކީ ދޮގަކަށް ނުވާނެ އެވެ. އެހެނީ، ދުވަސްވަރަކީ ނަކަތުގެ ގޮތުން ބެލިނަމަވެސް ދޭތެރެ ދޭތެރެއިން ވިއްސާރަކުރާ ދުވަސްކޮޅެކެވެ. އިހަވަންދޫގެ ކުރިމައްޗަށް ވާކަހަލަ ގޮތަކަށް އޮންނަ ދިގުފަރުގެ ބައްތިއާ ދިމާއަށް (ހުޅަނގުފަރާތަށް) ދޯނީގެ މިސްރާބު ބަހައްޓާފައި ހުރީވެސް އެހެންވެގެން ކަމުގައި ކައްޕިތާނު އަހަރެންނަށް މަޢުލޫމާތު ދިނެވެ. ތެދެކެވެ. ގަދަ ދުވަހެއްނަމަ އެމަގުން ދަތުރުކުރުންވާނީ ދަތިކަމަށެވެ. ވަކިން ހާއްސަކޮށް އެހާގިނަ އަންހެނުންތަކެއް ގޮވައިގެންނެވެ. އެއީ މީގެ ކުރިން އަހަރެންނަށްވެސް ކުރެވިފައިވާ ތަޖުރިބާއެކެވެ. ސަބަބެއް ކަމުގައިވަނީ އެމަގުން ދަތުރުކުރާއިރު، އެއްވެސް ހިފެހެއްޓުމެއްނެތި މައިކަނޑުން އަންނަ ބޮޑެތި ރާޅުތަކާ ހަނގުރާމަކުރަންޖެހުމެވެ. މީގެއިތުރުން، އެމަގުން ދަތުރުކުރުމުގެ ފުރުޞަތު ލިބުނުކަމީ ދުރު ރަށަކަށް ކުރާ ދަތުރެއް ފުދޭވަރަކަށް ކުރުވެގެން ދިޔަ ސަބަބެކެވެ. އެހެނީ އެއީން އިހަވަންދޫއިން ފުރައިގެން ނޭކުރެންދޫއަށް ދެވޭނެ އެންމެ ކުރު ރާސްތާ އެވެ.

އުޑުމަތީގައި ރަސްކަންކުރަމުން ދިޔައީ ކަފަވިލައިން ކުރެހިފައިވާ އެކި މަންޒަރުތަކެވެ. ޖެހެމުންދިޔަ ނަލަނަލަ ފިނި ރޯޅިތައް ހަށިގަނޑުގައި ބީހިލާ ކޮންމެ ފަހަރަކު ހީބިހިނަގައިގެން ދެ އެވެ. މައްޔަލާދިމާއިން ގުދުވެ މޫދުބަލައިލީމެވެ. ކަނޑުގެ ރާޅުތައް ކެފެމުން، ދޯނީގެ ދެފަރާތު ކަންކަށީގައި ބީހެމުންދިޔަ މަންޒަރަކީ ބަލައި ފޫހިނުވާނެ މަންޒަރުތަކެވެ. ދިގުފަރުގެ އާނުގަނޑުމައްޗަށް ބިޔަ ރާޅުތައް ބިންދަމުންދިޔަ ރީތި މަންޒަރަކީވެސް ސިފަކޮށްދޭންވެސް އުނދަގު މަންޒަރުތަކެކެވެ. މީގެއިތުރުން، އިރުގެ ރަންދޯދިތަކުގެ ތެރެއިން ދުރުން ފެންނަމުންދިޔަ ފެހި ރަށްތަކުގެ ހިތްގައިމުކަމާމެދު ފިކުރު ހިންގާލުމުން ﷲ ގެ ކުޅަދުންވަންތަކަމޭ ހިތަށް އެރި އެވެ. މިފަދަ ޚިޔާލުތަކެއްގެ ތެރެއަށް ގެއްލިފައި އިންދައި އަހަރެންގެ ކޮނޑުމަތީގައި އަތްބާއްވައިލީ، މަދަރުސާގެ ތެރޭގައި އަހަރެންނާ އެންމެ ގާތްކޮށް މަސައްކަތްކުރަމުންދާ އަހަރެންގެ "ކުލާސް މޭޓެއް" ކަމުގައިވާ ޙަސަން ސަމީހެވެ. ސިއްސައިގެން ގޮސް އަހަރެންނަށް ތެދުވެވުނެވެ. ހޭންފެށުނީ ދެމީހުންނަށް އެއްކޮށެވެ. އެއަށްފަހު "ދިރުނބާކޮޅުގެވާހަކަ" އެއްގެ ތެރެއަށް ދެމީހުންނަށްވެސް ފީނައިގަނެވުނެވެ.

އެހެން ތިއްބާ ކުއްލިއަކަށް އަހަރެންނަށް ފެނުނީ ސަމީހުގެ ބޮލުގައި އަޅައިވާ ފަރަންޖީން އަޅާޒާތުގެ ތޮފި، ދޯނީގެ ގެގަނޑުމަތިން ވަޔަށް އަރައިގެން ގޮސް މޫދަށް ވެއްޓުނުތަނެވެ. އަހަރެން ހިތުގައި ޖެހުނެވެ. އެތޮތްޕަކީ، ރީތިކަމުން އަހަރެންވެސް އަޅާލަން ބޭނުންވެފައިހުރި ތޮތްޕެކެވެ. އެއީ ވަރަށް ރީތިކޮށް ވިޔެގެން ހަދާފައިވާ ވަރަށްބޮޑު ތޮތްޕެކެވެ. ދަތުރަށް ފެށުމުގެ ކުރިންވެސް އޭގެ ވާހަކަ އަހަރެން އޭނަ ގާތު ދެއްކީމެވެ. އަދި ވަރަށްގިނަ ކުދިންވެސް އެ ތޮފީގެ ސަބަބުން އޭނައާ ދިމާވެސްކުރި އެވެ. ސަމީހު ބަލައިލީ އަހަރެންގެ މޫނަށެވެ. އެއަށްފަހު ބަކަބަކަ އަޅާފައި ހޭންފެށި އެވެ. އޭނަ ހޭންފެށި ގޮތުންނާއި، ތޮފި ވަޔަށް އަރައިގެންދިޔަ މަންޒަރު ސިފަވުމުން އަހަރެންވެސް ހިނިފަޅައިގެން ދިޔަ އެވެ. އިރުކޮޅެއްވަންދެން ހީހީފައި ތޮފީގެ ވާހަކަ ދެއްވުމަށްފަހު، ކުދިންތަކުގެ ހާލުއަހުވާލު ބަލާލުމަށްޓަކައި ދެމީހުން ދޯނީގެ ހިޔާގަނޑު ތެރެއަށް ވަނީމެވެ.

އެތެރެއަށްވަދެ ވަކިވަކިން ކުދިންގެ މޫނަށް ކަޅިހިންގާލެވުނެވެ. އެކި ކުދިންގެ މޫނުމަތިން ފެންނަނީ އެކި ކުލަވަރެވެ. ދޯނީގެ އިންޖީނުގެއާދިމާ ވާތްފަރާތުގައި ތިބި ފިރިހެން ކުދިންތައް އެކިކަހަލަ މަޖާ ވާހަކަތައް ދެއްކުމަށްފަހު ހީ ސަކަރާތްޖަހަމުން ދެއެވެ. ނަމަވެސް އަންހެންކުދިންގެ ފަރާތުން ފެންނަނީ މުޅިން އެހެން މަންޒަރެކެވެ. އެކަކު އަނެކަކާ ވާހަކަދައްކާލައި އުޅެނީވެސް މަދު ކުއްޖެކެވެ. ދޯނީގެ މަޑުލަކަށް ޖަހައި މަލަރުކޮށްފައި އިން ކަބީލާއެއްހެން، އިށީނދެތިބިތަނުން ގުޑުވާވެސްނުލައި ތިބި ކުދިންނެއް މަދެއްނޫނެވެ. ދަތުރުގެ ދިގުކަމުން ފޫހިވެފައިތިބީކަމެއް ނުވަތަ ބިރުގަންނަނީނޫންކަމެއްވެސް ނޭނގެ އެވެ. މޭނުބައިކޮށް ހޮޑުލަވާތީ ތިބިގޮތެއްކަމަށްވެސް ވެދާނެ އެވެ. އެއީދެން އަންހެންވެރިންގެ ގޮތްތާ އެވެ. ނަމަވެސް ސަމީހު މަސައްކަތްކުރަމުން ދިޔައީ އެކުދިންނާ ކޮންމެވެސް މަޖާ ވާހަކައެއްދައްކައި، ކޮންމެވެސް ސަކަރާތެއް ޖަހައިގެންނަމަވެސް އެކުދިންގެ "މޫޑި" ވެފައިވާ މޫނުތަކަށް ދިރުމެއް ގެނެސްދެވޭތޯ އެވެ. އަހަރެންދިޔައީ ގެނައި ވަދުރޯލުތައްމަތިން ހަނދާންވެގެން ކޮޅުފަސްކޮޅަށެވެ.

12 އޭ ކުލާހުގެ ދަރިވަރެއް ކަމުގައިވާ އަފްޝާނާއި އަހަރެންނާ އެއްކުލާހެއްގެ އަދި އަހަރެންނާ ގާތްގުޅުމެއް އޮންނަ އަލީފާއެކު، ގެނައި ވަދުރޯލުތައް ހޯދައި ބުޅިއާއި ވަދުލައި ރޯލު ތައްޔާރުކުރީމެވެ. ގަލުނަނެއް އޮތުމާއެކު އެއްރޯލުތައްޔާރުކުރީ ލައްޓިއަށެވެ. އަނެއްރޯލުގައި ލީ ހިބަރުވަދެކެވެ. ދުވަސްވަރަކީ ކޮންމެވެސް ވަރަކަށް ހިބަރުބާނާ ދުވަސްކޮޅަށް ވުމާއެކު، އެއީ ހިބަރެއް ލިބޭތޯ ގެނައި ރޯލެކެވެ. ގިނަ ކުދިންނަށް، ހާއްސަކޮށް އަންހެންކުދިންނަށް ހިބަރު ބާނާ މަންޒަކީ އައު މަންޒަރަކަށް ވާނެތީ އެކަން އެކުދިންނަށް ދައްކާލުމުގެ ބޭނުމުގައިވެސް މެ އެވެ. ރޯލުތައްޔާރުވުމާއެކު ލަސްނުކޮށް ނަނު ދޫކުރީމެވެ. އެހެނީ އޭރު އަދި ބާރަނަ(ދިގުފަރުގެ ހުޅަނގުކޮޅުގައި އޮންނަ ތިލައެއް، މިއީ އާންމުކޮށް އިހަވަންދޫ މީހުން، ރޭގަނޑު ފައްތައިގެން ވަރަށް ގިނައިން މަސްބާނާ އުޅޭ ސަރަހައްދެއް) ފަހެއްނުދެ އެވެ. ރަނގަޅު މަހެއް ބެވޭނެކަމުގެ އުންމީދުގައި ދެ ނަނުވެސް ދޫކުރުމަށް ފަހު، ހިބަރު ނަނު ބަންނަވަކަ (އިހަވަންދޫގައި ކިޔައިގޮތުން ބަންކެޓް) ފަށަކުން އައްސާލީމެވެ. އަދި އަނެއްނަނު އަފްޝާނާ ހަވާލުކުރީ އެވެ. އޭގެ އިރުކޮޅެއް ފަހުން ދޯނީގެ އެކި ހިސަހިސާބަށް ނަރަޒު ހިންގާލީމެވެ. ދޯނީގެ ހިޔާގަނޑުގެ ތެރޭގައި އަހަރެންނާ އެންމެ ގާތްކޮށް އުޅޭ ސަމީހު ނެތްކަންކަން ފާހަގަވި އެވެ.

ދޯނީގެ ހިޔާގަނޑުގެ ތެރެއިން ދިރުނބާކޮޅަށް ނުކުމެވުނީ ބޭއިހުތިޔާރުގަ  އެވެ. ހިތުގައި އުފެދިފައިވާ ސުވާލުތަކަށް ޖަވާބު ލިބޭތޯކަންނޭނގެ އެވެ. ބޭރަށް ނުކުމެ ހޯދާބަލައިލިއިރު ސަމީހުއިނީ ދޯނީގެ ވާތްފަރާތު މަތިކަންމަތީގައި އަތްބާއްވާލައިގެން ތައްޓުމަތީ އިށީނދެލައިގެންނެވެ. އެންމެ ފުރަތަމަ ފެނިލުމާއެކުހެން އޭނައަށް ކޮންމެވެސް ގޮތެއްވެފައި އިންކަން އަހަރެންނަށް ފާހަގަވި އެވެ. ހަމަ އެ ދަނޑިވަޅު އަހަރެންގެ ހިތުގައި އުފެދިފައިހުރި ސުވާލުތައް އޭނަގެ ކުރިމައްޗަށް ބަންޑުންކޮށްލީމެވެ. ނަމަވެސް އޭނާގެ ފަރާތުން އެދެވޭ ޖަވާބެއް ނުލިބުނެވެ. ހަމައެކަނި ބުނިހާވެސް އެއްޗަކީ އޭނާ 'އޯކޭ' ކަމަށެވެ. ނަމަވެސް އޭނައަށް ވެފައިންގޮތެއް ބަލައިނުލައި އަހަރެން ހިތްހަމައެއް ނުޖެހުނެވެ. ކުރުނުކޮށް ކިޔަން ފެށުމުން ބޯ 'ކަޑަވަނީ'ކަމުގައި ބުންޏެވެ. ކުރާނީވެސް ފަހެ ކީއްހެއްޔެވެ؟ ކިތަންމެ މަޖާކޮށްފައި އުޅެން ބޭނުންނަމަވެސް ކަނޑުމައްޗަށް އަރައިފިނަމަ އެފަކީރުގެ ހާލަކީ އެއީ އެވެ.

 ހުސެންދަރިމަތީގައި އަހަރެން ޖައްސާލީ އޭނާ ހަމައަކަށް ނޭޅެނީސް އެތަނުން ނުދަން އަޒުމު ކަނޑައަޅައިގެންނެވެ. އެތަނުގައި އިށީނދެ، އެހެން ދިމާއަކަށް ނަޒަރުހިންގާލުމަށްފަހު ދެން ބަލައިލި އިރު، ދޯނީގެ މަތިކަންމަތިން ބޭރަށް ބޯދިއްކޮށްގެން އޮވެ ސަމީހު ހޮޑުލަނީ އެވެ. އަވަހަށްގޮސް އޭނަގެ ގާގައި ހިފެހެއްޓީމެވެ. ދޯނިން ބޭރަށް ހިނގައިދާނެތީ އެވެ. އޭނާގެ އަތުގައި އޮތް ކެމެރާވެސް އަތުލީ މޫދަށް ވެއްޓިދާނެތީ އެވެ. ހޮޑުލާ ނިމުމުން އަހަރެން އަވަހަށް ދިޔައީ ފެންފުޅިއެއް ބަލަ އެވެ. ފެންފުޅިއެއް ހިފައިގެން އައިސް މަތިނެގުމަށްފަހު ދިއްކޮށްލީމެވެ. ނަމަވެސް އޭނާ އެޔަކު ނުހިފި އެވެ. ގަބުއަރާފައި އިން މަންމަނެއްހެން އެއްވެސް އެއްޗެއް ނުބުނެ މޫދާ ދިމާއަށް ބަލަހައްޓައިގެން އިނީ އެވެ. ވީގޮތެއް ނޭނގިފައި އަހަރެން ހައިރާންކަމާއެކު ހުރީމެވެ. ނަމަވެސް އިތުރު އެއްޗެއް ބުނަން އަނގަ ހުޅުވާލަން އުޅެނިކޮށް ހޯސްލާފައި އަނެއްކާވެސް އޭނާ ހޮޑުދުއްވާލައިފި އެވެ. ބަނޑުގައި ހުރިނަމަ ހުރިއެއްޗެއް އެފަހަރު ބޭރުކޮށްލި އެވެ. އެވަރުންވެސް، އަހަރެން ސުވާލެއްކޮށް ފިނަމަ އަތުގެ އިޝާރާތުން އޭނާ "އޯކޭ" ކަމުގައި ބުނެ އެވެ. ހޮޑުލަމުންވެސް ހަމަ ބުނަނީ އެހެންނެވެ. ކުޑަ އިރުކޮޅެއްގެ ތެރޭގައި އޭނާ ހަމައަކަށް އެޅިއްޖެވެ. ކޮންމެ ގޮތެއްވިއަސް އެންމެ ފުރަތަމަ ހޮޑުލީމީހާގެ މަޤާމް ލިބުނީ ސަމީހަށެވެ.

އިރުކޮޅެއްގެ ފަހުން އަލީފު އެތަނަށް އަތުވެއްޖެ އެވެ. އިތުރަށް ބޯ ކަޑަވެދާނެތީ އޭނާ އެތެރެއަށް ވަންނަން އިންކާރު ކުރުމުން އަހަރެން އެތެރެއަށް ވަނީ ފޮޓޯތަކެއް ނަގަންވެގެންނެވެ. ސަމީހުކައިރީ އަލީފުވެސް އިނީމަ އެވެ. ކެމެރާ ހިފައިގެން ފޮޓޯނަގަން އުޅެނިކޮށް ދިވެހި މުދައްރިސް ފަތުޙުﷲ އަހުމަދު (ފަތޭ ސަރ)، ހެނދުނުގެ ސައިގެ ކަންތައްތައް އިންތިޒާމްކުރުމަށް އަހަރެންގެ ގާތު އެދުނެވެ. އެއާއެކު ހެނދުނުގެ ނާސްތާއަށް އަންހެންކުދިންތައް ތައްޔާރުކޮށްފައި ހުރި ކާނާތައް ނަގައި، އިންޖީނުގެއާ ޖެހިގެން ދިރުނބަލަށް ފަލުކާ މަތީގައި އަތުރާލީމެވެ. ކާތަކެތީގެ މަތިނެގުމާއެކު ހެނދުނުގެ ނާސްތާ ފެށިގެން ދިޔައީ ގަޑިން 7:12 ގަ އެވެ. ގުޅައާއި، ބޭކެޑް ބީންސްއާއި، ރޮށީގެ އިތުރުން ތެލުލި ކޭލާއި ކުޅިރޮށިފަދަ ތަކެތިވެސް ތައްޔާރުކޮށްފައި ހުއްޓެވެ. އަހަރެންނަށް އެއިން އެއްޗެއް އަނގައަށް ލެވޭގޮތްވީ ތަށިތައްޓަށް އަޅައި އަންހެންކުދިންނާ ހަމައަށް އެ ފޯރުކޮށްދިނުމަށްފަހު އެވެ. ނަމަވެސް، ހޮޑުލެވިދާނެތީ އަންހެން ކުދިންގެ ތެރެއިން ގިނަކުދިން ނުކެ އެވެ. ކޭ ކުދިންވެސް ކެއީ ވަރަށް ކުޑަކޮށެވެ. ތައްޓަކަށް އެއްޗެހި އަޅައިގެން އަހަރެންވެސް ކާން ޖައްސާލީމެވެ. ތަށީގައި ހުރި ކާއެއްޗެހި ރަނގަޅަށް ހުސްނުވެ އުޅެނިކޮށް އަންހެންކުއްޖަކު ހޮޑުލަވާތީ އުޅެންފަށައިފި އެވެ. އަހަރެން އަވަހަށްގޮސް ބާލިދީތަކެއް ހޯދުމަށްފަހު، އެކުއްޖާއަށް އެއްބާލިދީ އަދި ދެންހުރި ބާލިދީތައް ދޯނީގެ އެކި ހިސަހިސާބުގައި ބެހެއްޓީމެވެ. ދޯނީގެ އެތެރެއަށް ކުއްޖަކު ހޮޑުލާފާނެތީ އެވެ.

އޭގެ ކުޑަ އިރުކޮޅެއްގެ ތެރޭގައި ދޯނިތެރެއަށް ފެތުރުނު ވައިރަހެއްހެން ހޮޑުގެ ކަންތައްގަނޑު ދޯނިތެރޭގައި އާންމު ވެއްޖެ އެވެ. ކުއްޖަކު ހޮޑުލާތަން ފެނުމުން، އެތަން ފެންނަ ކުއްޖާވެސް ހޮޑުލަނީ އެވެ. އެކުއްޖާ ލާހޮޑުގެ ވަސްދުވުމުން ޖެހިގެން އިންނަކުއްޖާވެސް ހޮޑުލަނީ އެވެ. ކައިރީ އިންނަކުއްޖާ ހޮޑުލާތީ އެކުއްޖާއަށް އެހީތެރިވެދޭން އުޅޭ ކުއްޖާއަށްވެސް ހޮޑުލެވެނީ އެވެ. ހޮޑުނުލެވޭ ކުއްޖަކީނަމަ ހޮޑު ލެވިދާނެކަމަށް ތެޅި ފޮޅެނީ އެވެ. މިއީ އަންހެން ކުދިންގެ ތެރެއިން ދެތިން ކުއްޖަކު ފިޔަވައި ދެންތިބި ކުދިންގެ ހާލެވެ. ހުރިހާ މުދައްރިސުން ކަހަލައިން ހަރަކާތްތެރިވަމުން ދިޔައީ ހޮޑުލާ ކުދިންތައް ހޭހަން ކުރުމުގަ އެވެ. އަހަރެންނަށްވެސް އުޅެން ޖެހުނީ ބާލިދީގަނޑު ހިފައިގެން ކޮޅުކޮޅަށް ދުވެލަ ދުވެލާ އެވެ. މިއީ އަންހެންކުދިންގެ ހާލުކަމުގައި ވާއިރު، ފިރިހެންކުދިންގެ ހާލަކީތޯ އެވެ؟ ހޮޑުނުލީކަމުގައި ވީނަމަވެސް ފިރިހެން ކުދިންގެ ތެރެއިންވެސް ގިނަކުދިންތަކެއް ތިބީ 'ކަޑަ' ވެފަ އެވެ. ބޯ 'ކަޑަ' ވާތީ ބޭރަށް ނުކުމެތިބި ކުދިންތަކުން ދިރުނބާކޮޅު ފިލާގަނޑުއޮތީ ފުރިފަ އެވެ. ހީވަނީ ދުމައްޓެއްގައި މަސްޖަހާފައި ހުރިހެންނެވެ. އެންމެ ހާލުބޮޑީ ސުކޫލުގެ ކެޕްޓަން ޢަބުދުލް މާނިޢު އެވެ. އޭރު އެފަކީރުގެ ލަގޮނޑިވަޅާ ހިސާބުގައި ހޮޑު ހިފެހެއްޓިފައި ހުރިކަހަލަ އެވެ. އަނާނާ ކިޔާވަރުގެ ބޮޑެތި ފިރިހެނުން ތަކަކަށް އެވަރުވުމުން އަހަރެން ހުރީ ހައިރާންވެފައެވެ. އެހެނީ، އަހަރެންނަށް އެފަދަ އިހްސާސެއް ކުރެވެން ގާތްވެސް ނުވެ އެވެ.

ކޮންމެއަކަސް ހޮޑުގެ ކަންތައްގަނޑަށް މަޑުޖެހުމެއް އައީ ސުނީތާ މިސް ގެންގުޅުނު ކޯރާޑިތެޔޮފުޅިއެއްގެ އެހީގަ އެވެ. ޓިޝޫއަށް އެތެޔޮ އަޅާފައި ވަސްބަލަން ދިނުމުން ހޮޑުލާކުދިންނަށް ވަރަށް ބޮޑު ލުޔެއް ލިބިގެން ދިޔަ އެވެ. އެއަށްފަހު، މަޑުމަޑުން އައީ ކުދިންތަކުގެ ހާލަތު ރަނގަޅުވަމުންނެވެ. އެހެންކަމުން، އަހަރެންވެސް ދެންދިޔައީ ދިރުނބާކޮޅުގައި ތިބި ފިރިހެންކުދިންތަކުގެ ގާތަށެވެ. ގޮސް އެންމެ ފުރަތަމަވެސް ބަލައިލެވުނީ ސަމީހުއާ ދިމާއަށެވެ. އޭނާ ހަމަ އެންމެ ގަދަފަދަ އެވެ. އެއްގޮތެއްވެސް ނުވަނީ ހަމަ ސުކޫލުގެ ކެޕްޓަނަށެވެ. އެތަނުގައި މަޑުކޮށްލީ އެކުދިންތައް ދައްކަމުންދިޔަ ވާހަކަތައް އަޑު އަހާލުމަށެވެ. އިސާހިތަކު އެކުދިންތައް ދައްކަމުންދިޔަ 'ދިރުނބާކޮޅުވާހަކަ'އިގެ ތެރެއަށް އަހަރެންވެސް ގެއްލިއްޖެ އެވެ. އެހެން ތިއްބައި ކުއްލިއަކަށް ދޯނީގެ އިންޖީނު މަޑުކޮށްލައިފި އެވެ. އެންމެންގެ ލޯތައް އެއްފަހަރާ ކަހަލަގޮތަކަށް އަމާޒުވީ ކައްޕިތާނާ ދިމާއަށެވެ. ވީގޮތް އެނގުނީ ދެނެވެ. ވަދުގައި މަހެއްޖެހުނީ އެވެ. އޭރުގަޑިން 7:46 މިނެޓް ހިނގާފި އެވެ. ވަރަށް އުފަލުން ދުވަމުން ކަހަލަ ގޮތަކަށް ކޮޅުފަސްކޮޅަށް އަހަރެން ދިޔައީ ހިބަރެއް ޖެހުނީކަމަށް ހީކޮށެވެ. ނަމަވެސް ޖެހިގެން އުޅެނީ ލައްޓިއެކެވެ. ލައްޓިނަގާ ދޯންޏަށް ލުމުން އޭގެ ފޮޓޯތަކެއްނެގުމަށްފަހު ކައްޕިތާނާ ގާތްވެލިތަނާ ދޯނީގެ ހުންގާނު އަހަރެންނާ ހަވާލުކުރުމަށްފަހު ކޮންމެސް ބޭނުމަކު ދިރުނބާކޮޅަށް ގޮސްފި އެވެ. ވަގުތީގޮތުން މާލިމީކަން އަހަރެންނަށް ލިބުނެވެ. އެއީ އަހަރެންނަށް އާކަމެއްނޫނެވެ. އެދޯނިން އެތައް ދަތުރެއްކުރިއިރު، މަދުފަހަރެއްގައި މެނުވީ އަހަރެންނަށް ހުންގާނުގައި ހިފަންޖެހެ އެވެ.

ކުޑައިރުކޮޅެއްގެ ތެރޭގައި ކައްޕިތާނުއައިސް ހުންގާނާ ހަވާލުވެއްޖެ އެވެ. އަހަރެން ދެންދިޔައީ ފަތޭ ސަރ މެން ކައިރިއަށެވެ. ކުޑައިރުކޮޅަކު ވާހަކައިގައި ތިބުމަށްފަހު، ހެނދުނުގެ ނާސްތާއިން ބާކީވެފައިހުރި ކާއެއްޗެހި ހިފައިގެން އަހަރެންނާއި ފަތޭ ސަރ ދިރުނބާކޮޅު ފިލާގަނޑުމައްޗަށް ނުކުތީ އެތާތިބި ކުދިންނާއެކު ކާއެއްޗެހިތައް ހުސްކޮށްލުމުގެ ބޭނުމުގަ އެވެ. ނަމަވެސް ގުޅަ ފިޔަވައި އެހެން އެއެއްވެސް އެއްޗެއް ހުހެއްނުކުރެވުނެވެ. ފަޅުވެރިއަކަށް ހުންގާނު  ހަވާލުކުރުމަށްފަހު ކައްޕިތާނުވެސް އަހަރުމެންގެ ކައިރިއަށް އައިސްފި އެވެ. އިހުގެ ބައެއް ވާހަކަތަކުގެ އިތުރުން ދަތުރުގެ ބައެއް މަޢުލޫމާތުތައް ކައްޕިތާނު އަހަރެމެންނަށް އޮޅުންފިލުވާދިނެވެ. މިކަންތައްތަކުގެ ތެރޭގައި އަހަރެމެން އުޅުނުކަމުގައި ވީނަމަވެސް ދޯނި އޭގެ އެންމެ ފުރިހަމަ ދުވެލީގައި މަންޒިލާދިމާއަށް ދަތުރުކުރަމުން ދެއެވެ. ހދ. ނާވައިދޫ ފަސްދިންފަހުން މާކަގިނައިރުތަކެއް ނުވެ ނޭކުރެންދޫގެ ވިނަރެސް ފެންނަން ފަށައިފި އެވެ. އެއާއެކު ކުދިންތަކަށް އިތުރު ދިރުމެއްލިބުނު ފަދަ އެވެ.

ދޯނިމަތީޖެހި ސަކަރާތުގެ ތެރެއިން....

ދެންފެށިގެންދިޔައީ ދަތުރުގެ އެންމެ މަޖާ ވަގުތުކޮޅެވެ. ފަތޭ ސަރ އާއި އަރީބު ސަރ ވެގެން ހޮޑުލާކުދިންނާ ސަކަރާތް ޖަހަން ފެށި  އެވެ. ފެންފުޅިއެއްގައި ނަނުފަށެއް ޖަހައި 'އައިވީ' އެކޭ ކިޔައިގެން ގެނެސް، އައިވީ ގުޅާގޮތަށް މަލަން ބޭނުންކޮށްގެން ކުދިންތައް 'އައިވީ' ގުޅަންފަށައިފި އެވެ. ހަމައެކަނި އަންހެންކުދިން އެކަންޏެއް ނޫނެވެ. ފިރިހެންކުދިން ވެސް މިކަމުގައި ޝާމިލުކުރި އެވެ. ކޮންމެ އަކަސް މިކަންވީ ހުރިހާ އެންމެނަށްވެސް ވަރަށް މަޖާ ކަމަކަށެވެ. މިކަމުގެ މަޖަލުގައި ވަގުތު ދިޔަގޮތްވެސް ނޭނގެއެވެ. ނަމަވެސް ނޭކުރެންދޫއާ ވަރަށް ކައިރިވެފައި ވަނީކޮށް އަންހެންކުއްޖަކު ވަރަށް ގަދައަށް ބަނޑުގައި ރިއްސާތީ އުޅެންފަށައިފި އެވެ. ހުރިހާ އަންހެން މުދައްރިސުން ކަހަލައިން އެކުއްޖާއަށް ހޭހަން ކުރުމުގައި ހަރަކާތްތެރިވި އެވެ. ނޭކުރެންދޫއާ ވަރަށް ކައިރިވެފައިވާތީ އަހަރެންދިޔައީ އަހަރެން ގެނައި ކެމެރާ ނަގައި ތައްޔާރު ކުރާށެވެ.

ދިރުނބާކޮޅަށް ނުކުމެ އެކި ގޮތްގޮތަށް ނޭކުރެންދޫގެ ފޮޓޯނެގީމެވެ. އިރުގެ ރަންދޯދި ތަކުގެ ތެރެއިން އެރަށުގެ ރީތި މަލަމަތި ފެނުމުންވެސް ހީބިހިނަގައިގެން ދާވަރުވެ އެވެ. ބަނދަރުގެ ނެރުބައްތިއާ ގާތްވި ގާތްވިހެން، މީގެ ދެއަހަރު ކުރީގެ ހަނދާންތަކެއްގެ ތެރެއަށް އަހަރެންނަށް ފީނާގަނެވުނެވެ. ހަނދާނަށް އަންނަމުންދިޔައީ 2009 ވަނަ އަހަރު ނޭކުރެންދޫގައި ބޭއްވި 'ދެވަނަ ނޯތް ކޭމްޕްރީ' ގެ މަތިންނެވެ. އެއީ އަހަރެން އެންމެ ފުރަތަމަ ނޭކުރެންދޫއަށް ކުރި ދަތުރެވެ. ދެވަނަ ދަތުރަކީ މިއީ އެވެ. ބަނދަރުމަތީގެ މަންޒަރުތަކަށް ނަޒަރެއް ހިންގާލުމުން އޭރާ މިހާރާ މާ ބޮޑެތި ތަފާތުތަކެއް ހުރިކަމަކަށް އަހަރެންގެ ހަނދާން ބަލި ސިކުނޑިއެއް ނުބުންޏެވެ. ކުރީދަތުރުގައިވެސް ބަނދަރު މަތިން އަހަރެންނަށް ފާހަގަކުރެވުނު ބޮޑު ދެ ހިރިގާ، ހަމަ އެއޮތްތަނުގައި އޮތެވެ. 3 ގަޑީއިރާ 9 މިނެޓުގެ ދިގު ދަތުރަކަށްފަހު، 9:38 ގައި ދޯނި ނޭކުރެންދޫފަޅަށް ވަނީ އަހަރެން އެފަދަ ޚިޔާލުތަކެއްގައި ހުއްޓަ އެވެ.

ދޯނި ވާޓަރާ ގާތްވިތަނާ ކުދިންތައް އެއްގަމަށް ފޭބި އެވެ. އަހަރެން އުޅުނީ އެމަންޒަރުތައް ފޮޓޯނަގާށެވެ. ދޯނިންފައިބައިގެން ގޮސް ކުދިންތައް މަޑުކޮށްލީ ބަނދަރުމަތީ ހުރި ބޮޑު ގަހެއްގެ ހިޔާދަށުގަ އެވެ. އަހަރެންނަށް ގަސްދަށާހަމައަށް ނުދެވި އުޅެނިކޮށް ފެނުނީ އެމްބިއުލާންސް އަންނަތަނެވެ. ރަނގަޅަށް ވީގޮތް ބެލިއިރު ބަނޑުގައި ރިއްސާތީ އުޅުނު ކުއްޖާ ގެންދަންވެގެންނެވެ. ނަމަވެސް ރަށަށް ފޭބި އިރު އޭނާ ހުރީ ރަނގަޅުވެފަ އެވެ. އެހެންކަމުން، އެއްވެސް ކުއްޖަކު އެއަށް އަރުވާކަށް ނުޖެހުނެވެ. އޭރު ނޭކުރެންދޫ ސުކޫލުގެ ޓީޗަރުންތައް އެ ގަސްދަށުގައި ތިއްބެވެ. އިރުކޮޅަކުން ފެނުނީ ނޭކުރެންދޫ ސުކޫލުގެ ދަރިވަރުންތަކެއް އަހަރެމެން ތިބި ގަސްދަށަށް އަންނަތަނެވެ. އެކުދިންތައް އައިސް އަހަރެމެންގެ ދަބަސްތަކާ ހަވާލުވި އެވެ. ދެން އެންމެން އެކުގައި ނައްޓާލީ އެރަށު ސުކޫލާދިމާލަށެވެ. ސުކޫލަށްދާން ދިޔައީ ގޮނޑުދަށާ ވަރަށް ކައިރީގައި އޮތް މަގަކުންނެވެ. ކުރިއަށް ދިޔަވަރަކަށް އަހަރެންނަށް ބެލެނީ ވަށައިގެންވާ ތަންތަނަށެވެ. އެވަގުތު ހަނދާނަށް އަންނަމުންދިޔައީ ކުރީދަތުރުގެ ހަނދާންތަކެވެ.

 ވަކިހިސާބަކަށް ދެވުނުތަނާ ފެނުނީ ވަރަށް ރީތިކޮށް ހަދާފައިވާ ހޮޅުއަށްޓެކެވެ. އެއީ މިހާރު އިހަވަންދޫއިން އެއްގޮތަކަށްވެސް ނުފެންނަ މަންޒަކަށް ވުމާއެކު އެތަންވީ އަހަރެންނަށް ވަރަށް ޝައުޤުވެރި ތަނަކަށެވެ. ހޮޅުއައްޓާ ޖެހިގެން ދެން ފެނުނީވެސް އަހަރެންގެ ހިތް ދަމައިގަތް މަންޒަރެކެވެ. އެކިވަރު ވަރުގެ ބޮއްކުރާތަކާއި އޮޑިދޯނިފަހަރު އެހެލާފައި ހުރި މަންޒަރެވެ. ވަރަށް ގިނަ ބޮއްކުރާތަކެއް އެއް ހަމައަކަށް ވާކަހަލަ ގޮތަކަށް ހުރުމުން އެމަންޒަރުގެ ފޮޓޯއެއް ނަގައިނުލައި އެއްގޮތަކަށްވެސް ހިންހަމައެއްނުޖެހުނެވެ. އެކަމުގައި މަސްއޫލުވެގެން އުޅެނިކޮށް ކުދިންތައް ގޮސް އޮބާލަންވީއިރުވެސް އަހަރެންނަށް ހޭވެރިކަންނުވި އެވެ. ދުވެފައި ކަހަލަގޮތަކަށް ގޮސް ކުދިންތަކާ އަރާ ހަމަކޮށް ކުރި ބަލައިލިއިރު ސުކޫލު ހުރީ ފެންނާށެވެ. ދުރުން ފެނުމުންވެސް އަހަރެންނަށް އެތަން ފާހަގަވީ ކުރިންދަތުރުގައި ކޭމް ސައިޓަށް ދިޔައީ އެމަގުން ކަމަށްވާތީ އެވެ.

ސުކޫލަށް ވަދެވުމާއެކު އެންމެ ފުރަތަމަވެސް ލޮލުގައި އަޅައިގަތީ ސޫކޫލުގެ ގޯތިތެރޭގައި ހުރި ވަރަށް ބޮޑު ގަހެކެވެ. އެގަހުގެ ހިޔާދަށުގައި ވަރަށް ރީތިކޮށް ވަށްބުރަކަށް ވާގޮތަށް އަތުރާލާފައިވާ ގޮނޑިތަކުންނާއި ކަޅުކުލައިގެ ފޮތިގަނޑަކުން ނިވާކޮށްފައިވާ ޑެސްކުތަކެއްގެ މަތީގައި، މަށައި ތައްޔާރު ތައްޔާރުކޮށްފައިހުރި ކުރުނބާ ތަކުން ދޭހަވީ އަހަރެމެންނަށްޓަކައި ނޭކުރަންދޫ ސުކޫލުން ވެފައިވާ ތައްޔާރީތަކުގެ ފުރިހަމަކަމެވެ. ކުދިންތައް ކުރުނބާ ބޮމުން ދިޔަވަގުތުގައިވެސް އަހަރެން އުޅުނީ، އެއްއަތުން ކުރުނބާ އަދި އަނެއްއަތުން ކެމެރާ ހިފައިގެން އެމަންޒަރުތައް ފޮޓޯ ނަގާށެވެ. ދަތުރުގެ ވަރުބަލި ފިލުވާލުމަށްޓަކައި އެ ގަސްދަށުގައި ތިބި އިރު ވަރަށް ރީތި ނަލަ ނަލަ ވައިރޯޅިތައް ގައިގައި ބީހެމުން ދިޔައެވެ. 'ރިފްރެޝްމެންޓް' ގެ ކަންތައް ނިމުމުން ގިނަކުދިން ބޭނުންވީ ރަށުތެރެބަލައިލަން ދާށެވެ.

އެހެންކަމުން ސުކޫލުގައި ދަބަހާއެއްޗެހި ބެހެއްޓުމަށްފަހު ދެން ނައްޓާލީ ނޭކުރެންދޫގެ ދަނޑުވެރިކަން ކުރާ ސަރަހައްދަށް ދާށެވެ. އޭރު ގަޑިން 10:40 ވެއްޖެ އެވެ. ދިޔައީ ދެ ސްކޫލުގެވެސް ދަރިވަރުންނާއި މުދައްރިސުންގެ އިތުރުން ދަތުރުގައި ބައިވެރިވި ބެލެނިވެރިންނެވެ. އެއީ ސުކޫލާ ފުދޭވަރަކަށް ދުރު ހިސާބެއްކަމުންނާއި އަވިގަދަ ދުވަހަކަށް ވުމުން އެ ސަރަހައްދަށް ދެވެންވީއިރު ގިނަކުދިންނަށް ކަރު ހިއްކުމުގެ އަސަރު އިހްސާސް ކުރެވެން ފެށި އެވެ. ނަމަވެސް އެރަށު ސްކޫލުގެ ޓީޗަރުންނަށް ހަދާނެގޮތް ބޮޑެއްނުވި އެވެ. ކައިރީގައި ހުރި ގެ ތަކަކުން އެންމެނަށް ވާވަރަށް ފެންނެރުނެވެ. އައިސް ކޮށްފައި ހުރި އެހާ ބައިވަރުފެން، އެހާ ކުޑަ ވަގުތުކޮޅެއްގެ ތެރޭގައި ގެނައުމުން އަހަރެން ހުރީ ކޮސްވެ ބުނާނެ އެއްޗެއްވެސް ނޭނގިފަ އެވެ. ފެންބޮއިގެން އަނެއްކާވެސް މިސްރާބުޖެހީ ދަނޑުތަކާ ދިމާއަށެވެ. ނަމަވެސް އަހަރެންނާ އެއްކުލާހު ކުއްޖެއްކަމަށްވާ ސަމާހާ މާބޮޑަށް ވަރުބަލިކަމުން، އެތަނާ ކައިރި ގެއެއްގައި މަޑުކުރިއެވެ.

ދަނޑުތަކަށްގޮސް އެތަނުގައި ހައްދާފައިހުރި ގަސްތައް ވަރަށް ގާތުން ބެލީމެވެ. އެއީ ހަޔާތުގައިވެސް އެފަދަ ތަނަކަށް އާދެވުނު ފުރަތަމަ ފަހަރުކަމުން އަހަރެންހުރީ ވަރަށް އުފަލުންނެވެ. ބަރަބޯ، ކޮޕީފަތް، މިރުސް، ކަރާ އަދި ބަށީގެ އިތުރުންވެސް ވަރަށް ތަފާތު ވައްތަރުތަކުގެ ގަސްތައް އެތަނުން ފެނުނެވެ. އެހެން ނަމަވެސް ދޭ ދިލަ އަވީގެ ސަބަބުން މާ ގިނައިރު އެތަނުގައި ކެތްކުރެވޭ ގޮތެއްނުވިއެވެ. އެއްބައިކުދިން ކުޑަ ހިފައިގެން އުޅުނުއިރު، އަނެއްބަޔަކު މަގޫފަތް ކޯޅިކޯޅި ހިފައިގެންވެސް އުޅުނެވެ. އަހަރެންގެ އަތުގައި 'ޕޮލަރައިސްޑް' އަވިއައިނެއް އޮތްކަން ނަސީބެކެވެ. އެހެން ނޫންނަމަ ދެލޯ 'ބަޑި' ޖެހީސްކަން ކަށަވަރެވެ. އެހެންވެ އަވަހަށް މިސްރާބުޖެހީ ސުކޫލާ ދިމާއަށެވެ. ދަމުން ދިޔައީ ސަމާހާވެސް ގޮވައިގެންނެވެ. ނަމަވެސް ވަކި ހިސާބަކަށް ދެވުނުތަނާ އޭނާ އެނބުރިގެން ވެއްޓުނެވެ. ނަސީބަކުން ނޭކުރެންދޫ ސުކޫލް ޓީޗަރެއްގެ އަތްމައްޗަށެވެ. އެ ދަނޑިވަޅުގައިވެސް އެރަށު މުދައްރިސުންނާއި ދަރިވަރުންގެ ފަރާތުން ލިބުނު އެހީތެރިކަމަކީ ފާހަގަނުކޮށް ދޫކޮށްލެވޭވަރުގެ ކަމެއްނޫނެވެ. އިތުރު ބައެއް މުދައްރިސުންގެވެސް އެހީތެރިކަމާއެކު ސަމާހާ ގެންދިޔައީ ކައިރި ސަރަހައްދެއްގައިހުރި ގެއަކަށެވެ. ނަމަވެސް އަހަރެމެން ދިޔައީ ސުކޫލަށެވެ. އަހަރެމެންނަށް ސުކޫލަށް ގޮސް ވަދެވުނީ ބަރާބަރު 11:15 ގައެވެ.

ސުކޫލަށްއައިސް އިހަވަންދޫ ސުކޫލުގެ ދަރިވަރުންތައް ނޭކުރެންދޫ ސުކޫލުގެ ދަރިވަރުންނަށް ހަވާލުކޮށް ވަގުތީގޮތުން ބަލަދުވެރިންނަށް ހެދުން އޮތެވެ. އެކި ގޭގެއަށް އެކިކުދިންނެވެ. ކަންދިމާކުރިގޮތުން އަހަރެންނާއި އަހަރެންގެ މިތުރު ސަމީހަށް ހުންނަން ޖެހުނީ އެއް ގެއެއްގަ އެވެ. އެކަމާ އަހަރެން ވަރަށް އުފާވި އެވެ. އެރަށު ސުކޫލުގެ ދަރިވަރުންގެ ތެރެއިން އަހަރެމެން ދެމީހުންނާ ހަވާލުވީ 8 އޭގެ ދަރިވަރު މުޙައްމަދު ވިލްފެވެ. އެއީ އެރަށު ސުކޫލުގެ ގާޒީ ހައުސްގެ ވައިސް ކެޕްޓަނެވެ. ދުވަހަކީ ހުކުރު ދުވަސް ކަމަށްވުމާއެކު ހުކުރުވަގުތު ގާތްވަމުން އަންނާތީ އަހަރެންނާއި ސަމީހު އަދި ވިލްފްގެ އިތުރުން ވިލްފްގެ ރައްޓެއްސެއް ކަމުގައިވާ އަލްވިންއާއެކު ވިލްފްއުޅޭ ގެ ކަމުގައިވާ އަސުރުމާގެއާ ދިމާއަށް މިސްރާބު ޖެހީމެވެ. ދިޔަ މަގުމަތީ ދިޔައީ 4 މީހުންވެސް ތަފާތު ވާހަކަތައް ދައްކަމުންނެވެ. ވަކިހިސާބަކަށް ދެވުނުތަނާ ވަރަށް އިހުގެ ވައްތަރަކަށް ހުރި ފަޅުގެއެއް ފެނުނެވެ. އުވައިން ހަދާފައިހުރި އެ ގެ ހުރީ ދެބުރިއަށް ނަގާފަ އެވެ. ވިލްފާއި އަލްވިން އަހަރެމެންނަށް މަޢުލޫމާތު ދިންގޮތުގައި އެއީ އެރަށުގައި އެންމެ ފުރަތަމަ ދެބުރިއަށް ނެގުނު އިމާރާތެވެ. މީގެ އިތުރުން ކުރީގެ އެރަށު މަދަރުސާ (މިހާރުގެ ޕްރީސްކޫލް) ވެސް ދިޔަމަގުމަތިން އަހަރެމެންނަށް ފެނުނެވެ. މިތަންތަނުގެ މަޢުލޫމާތުތައް ވަރަށް ފުރިހަމައަށް ވިލްފާއި އަލްވިން އަހަރެމެން ދެމީހުންނަށް ކިޔައިދިނެވެ.

ނަސީބު ރަނގަޅުކަމުން ވިލްފްމެންގެ ގެ ސުކޫލާ ފުދޭ ވަރަށް ކައިރި އެވެ. ވަކި ހިސާބަކުން އަލްވިން ދިޔައީ އަލްވިންގެ ގެއަށެވެ. އެ ގެވެސް ހުންނަނީ ވިލްފްމެންގެ ގެއާ ވަރަށް ކައިރީގަ އެވެ. ގެއަށް ދެވުނުއިރު ވިލްފްގެ މަންމަމެން ތިބީ އަހަރެމެންގެ އިންތިޒާރުގަ އެވެ. ގެއަށް ވަނުމުން އަހަރެމެން ދެމީހުންގެ ހާލު އަހުވާލުބަލައި، ވާހަކަދެއްކި އޯގާތެރި ގޮތުން ހީވަނީ އަހަރެމެން ދެމީހުންނަކީ އެމީހުންގެ އުފަން ދަރިންހެންނެވެ. އެ ގާތްކަން އަހަރެންގެ ހިތުން ދުވަހަކުވެސް ފިލައި ނުދާނެ އެވެ. ވިލްފްމެންގެ ގެއަކީ އެރަށަށް ކޭބަލްޓީވީގެ ޚިދުމަތް ފޯރުކޮށްދެމުން އަންނަގެ އެވެ. ކޮޓަރިއަށް ވަންގޮތަށް އެންމެ ފުރަތަމަވެސް އަހަރެން ގެންގުޅު ކެމެރާއާއި ސަމީހުގެ ކެމެރާ 'ޗަރޖަށް' ޖެހީމެވެ. އެއަށްފަހު ރަނގަޅަށް ފެންވަރައި ތައްޔާރުވެގެން 3 މީހުން އެކުގައި ދިޔައީ އެރަށުގެ އެންމެ ބޮޑު މިސްކިތް ކަމުގައިވާ މަސްޖިދުލް އިޒްހާރަށް ހުކުރަށެވެ. އެ މިސްކިތާ އެ ގެއާ ވަރަށް ކައިރި އެވެ. ވިއްސަކަށް ފިޔަވަޅުއެޅި އިރަށް މިސްކިތަށް ވަދެވިއްޖެވެ.

ދަތުރުގެ ބައިވެރިން މެންދުރުގެ ކެއުމަށް އިންސާފްކުރުމަށްޓަކައި ނޭކުރެންދޫ ސްކޫލުގެ ގޯތިތެރޭގައި ހުރި ގަހެއްގެ ދޮށުގައި.

ހުކުރުންއައިސް އެއްޗެހި ބަދަލުކޮށްލައިގެން ސުކޫލުން ދީފައި އޮތް ޝެޑިއުލް މަތިމަތިން ބަލައިލީމެވެ. ހުކުރުން ފައިބައިގެން އަހަރެމެންނާއެކު އަލްވިންވެސް އައެވެ. ދެން އެންމެ އަވަހަށް ޝެޑިއުލް ކުރެވިފައި އޮތީ މެންދުރުގެ ކެއުމެވެ. ކެއުން އޮތީ ސުކޫލުގައި ނަމަވެސް ވިލްފްގެ މަންމަމެން އެ ގެއިން ކެއުމަށް އެދުނެވެ. ވިލްފްވެސް އެންމެ ފަހުން ކުރުނުކޮށް ކިޔަން ފެށުމުން އަހަރެމެން ދެމީހުންނަށްވެސް ޖެހުނީ ކާށެވެ. ކުޑަ ގޮތެއް ހަދާލައިން ހަތަރުމީހުން ދިޔައީ ލަފައިގެން އައި މަގުމަތީ ފެނުނު ހޮޅުއައްޓާ ދިމާ އަތިރިއަށް ވައިޖައްސާލާށެވެ. އެތަންވެސް ހުރީ އެގެއިން މިނެޓަކުން ދެވޭހާ ކައިރީގަ އެވެ. ނަމަވެސް ކަންތައްވީ މުޅިން އެހެން ގޮތަކަށެވެ. ސަމީހުގެ ފޯނަށް އަލީފު ގުޅާފައި ބުނީ ކާގަޑި ޖެހިއްޖެ ކަމަށާއި އަހަރެންނާއި ސަމީހުނޫން އެންމެންވެސް ސުކޫލުގައި އެބަތިބި ކަމަށެވެ. 4 މީހުންނަށްވެސް ލިބުނީ ހައިރާން ކަމެކެވެ. ގެއަށް ގޮސް ޝެޑިއުލް ބެލިއިރު އަހަރެމެންނަށް ހަމަ އޮޅުނީ އެވެ. އަހަރެމެންނަށް ކާގަޑިކަމަށް ބެލިފައި އިނީ  ޖެހިގެން އޮތް ކަންތައް ރޭވިފައި އޮތް ގަޑިއެވެ. އަވަސް އަވަހަސް ކެމެރާ ހިފައިން ތެޅެމުން ފޮޅެމުން ކަހަލަ ގޮތަކަށް އަހަރެމެން ސުކޫލަށް ދިޔައިރު ކުދިންނާއި މުދައްރިސުން ތިބީ ކާށެވެ. އޭރު ގަޑިން 13:50 ވެއްޖެވެ.

އެވަރުންވެސް އަހަރެން ބޭނުންވީ އެމަންޒަރުގެ ފޮޓޯތަކެއް ނަގާށެވެ. ހިންހަމަޖެހޭ ވަރަށް ފޮޓޯ ނެގުމަށްފަހު ދެން އުޅުނީ ކާށެވެ. ތަށި ހިފައިން ކާއެއްޗެހި ކައިރިއަށް ގޮސް އެތައް އިރަކު އަހަރެން ހުރީމެވެ. ތައްޓަށް އަޅާފަ ނާޅާނެ އެއްޗެއް ނޭނގިފަ އެވެ. ހައްތަހާވެސް މީރު އެއްޗިއްސެވެ. ހީވަނީ މިނިސްޓަރު ފެންވަރުގެ ބަޔަކަށް ކައްކާފައި ހުރިހެންނެވެ. ގިނައީ އަހަރެންނަށް ނަންވެސް ނޭނގޭ އެއްޗިއްސެވެ. ބަތާއި ރިހައާއި ގަރުދިޔައާއި ފިހުނުމަހާއި ކުކުޅުމަހާއި ސަޓަންޏާއި ދެން މިހެން ކިޔާނެކަމެއް ނެތެވެ. އެތަނުގައި ނެތް އެއްޗެއް ހަމަ ނެތެވެ. ފޮނިއެއްޗެހިން އެކަނިވެސް ހައެއްކަ ބާވަތް ހުއްޓެވެ. އެއީ ހަމަ އަހަރެމެންނަށްޓަކައި އެރަށު ސުކޫލުގެ ބެނިވެރިން ތައްޔާރުވެފައިވާ މިންވަރެވެ. އެފަދަ ފުރިހަމަ ތައްޔާރީއެއް މީގެކުރިން ދުވަހަކުވެސް އަހަރެން ތަޖުރިބާއެއް ނުކުރަމެވެ. ތައްޔާރުކުރެވިފައިވާ ކާއެއްޗެހިން އެކަނިވެސް އެރަށު ރައްޔިތުންގެ މެހެމާންދާރީގެ ފުރިހަމަކަން އަހަރެންނަށް އިހްސާސްކުރެވުނެވެ. ވަރަށް ރަނގަޅަށް ކައިގެން އަހަރެން ދިޔައީ ވިލްފްއާއެކު ގެއަށް އެއްޗެހި ބަދަލުކުރާށެވެ. ވެފައިހުރި ހޭބަލީގައި އަހަރެންނަށް އާދެވުނީ ސޯޓުލައިގެންކަމުގައި ވާތީ އެވެ.

ވިލްފްގެ ރައްޓެހި ކުދިންތަކެއްގެ އަތުން ދެ ބައިސްކަލު ހޯދައިގެން، ގެއަށް ގޮސް އެއްޗެހި ބަދަލުކޮށްގެން އަހަރެމެން ދެމީހުނަށް އެނބުރި ސްކޫލަށް އާދެވުނީ 14:17 ގައެވެ. އައިއިރު ކުދިންތައް ތިބީ ގަސްދަށުގައި 'ބަނޑުދަމާ'ށެވެ. އަހަރެންވެސް އައިސް ކުޑަކޮށް އަނގަތަޅާލަން ގޮނޑިއެއްގައި ޖައްސާލީމެވެ. ދެ ސުކޫލުގެ ދަރިވަރުން އެއްތަނެއްގައި އެކުގައި ވާހަކަދައްކާލަން ތިބި ތިބުމަކީ ހިތްގައިމު މަންޒަރެކެވެ. ރައްޓެހިނޫން އެއްކުއްޖަކުވެސް ނެތެވެ. އެރަށުގެ ކޮންމެ ކުއްޖަކުވެސް އަހަރެމެންނާ ކުރިމަތިލީ ހިނިތުން ވުމާއެކު އެވެ. މިކަމުގައި ވަކި އަންހެން ފިރިހެން ތަފާތެއްނެތެވެ. ދެ ސުކޫލުގެ ދަރިވަރުންގެ މެދުގައި ގާތްގުޅުމެއް އެހާ އަވަހަށް އުފެދިގެން ދިޔައީ އެހެންވެ ކަމުގައިވެސް ވެދާނެއެވެ. މުދައްރިސުންގެ ފަރާތުންވެސް ފެނިގެންދިޔައީ ހަމަ އެއް މަންޒަރެކެވެ. އެ މަންޒަރު ފެންނަ އެހެން ރަށެއްގެ މީހަކު، އެތަނުގައި ތިބީ ދެ ރަށެއްގެ ބަޔެކޭ ނުބުނާނެކަން ކަށަވަރެވެ. އެހާވެސް ބޮޑު ގާތްކަމެއް އަހަރެންނަށް އެހިނދު އިހްސާސްވެގެން ދިޔަ އެވެ.

ކުޑައިރުކޮޅެއްގެ ތެރޭގައި ހަމަ އެ ގަސްދަށުގައި ދެން ކުރިއަށްދިޔައީ ދެ ސުކޫލުގެ ދަރިވަރުންނާއި މުދައްރިސުން ތަޢާރަފްވުމުގެ ބައްދަލުވުމެކެވެ. ސުކޫލުގެ ސައުންޑް ސިސްޓަމާ އެއްޗެހިނެރެ، އެ ޖަލްސާއަށްވެސް ތައްޔާރުވެފައިވަނީ ވަކީން ފުރިހަމައަށެވެ. އެ ސްކޫލުގެ މުދައްރިސުން ޖަލްސާ ރާވާފައިވަނީވެސް އަހަރެން ހީކުރިގޮތަށްވުރެ މާ ތަފާތު، މާ ފުރިހަމަ ގޮތަކަށެވެ. ޖަލްސާ ކުރިއަށް ގެންދި ގޮތުން، ދަރިވަރުންނާއި މުދައްރިސުންގެ ނަންތައް ވަރަށް ފަސޭހައިން ހަނދާނުގައި ހަރުވިއެވެ. ހާއްސަ ކޮށް އެ ސްކޫލުގެ ޗިޕޫ މިސް އާއި ޝިމާނާ މިސްގެ ނަން ފާހަގަ ކޮށްލަމެވެ. މުޅި ޖަލްސާވެސް ކުރިއަށް ދިޔައީ ވަރަށް 'އެންޓަޓައިން' ކޮށެވެ. ފަތޭ ސަރގެ ގޭމް ތަކެއްވެސް ޖަލްސާގެ ވަކި ހިސާބަކުން ފެނިގެން ދިޔައެވެ. އެ ތާރީޚީ އުފާވެރި ބައްދަލުވުން ނިމުނީ 15:39 ގައެވެ. 

ބައްދަލުވުން ނިމުމާއެކު ފަތޭ ސަރގެ އެދުމުގެ މަތިން އަހަރެންނާއި ސަމީހު، ވިލްފާއެކު ދިޔައީ ހަވީރު އޮތް ފުޓްބޯޅަމެޗަށް ތައްޔާރުވުމަށް ފެންކޭހެއް ގަންނާށެވެ. ފުޓްބޯޅަދަނޑާ ވަރަށް ކައިރީ ހުރި ފިހާރައަކުން ފެންކޭހެއް ގަނެގެން 3 މީހުން އައިސް ތިބީ ދަނޑުގައެވެ. އަހަރެމެން އައިއިރު ދަނޑުވަނީ މެޗަށްޓަކައި ވަރަށް ފުރިހަމައަށް ތައްޔާރުކުރެވިފައެވެ. ފަސްޓްއެއިޑް ކިޓް ގޭގައި ވުމުން ވިލްފްގެ އެހީތެރިކަމާއެކު އެގެނެސް، ވާންޖެހޭ އެންމެ ފަހުގެ ތައްޔާރީތައް ވީމެވެ. އެކަމުގެ ތެރޭގައި އުޅެނިކޮށް އެ ސްކޫލުގެ ދެ ކުއްޖަކުއައިސް އަހަރެމެންނާ 2 ފެންކޭސް ހަވާލުކުރިއެވެ. ވަގުތުން އަހަރެންނަށް ބަލައިލެވުނީ ސަމީހުގެ މޫނަށެވެ. ސަމީހުވެސް ބަލައިލީ އަހަރެންނާ ދިމާއަށެވެ. އަހަރެންނަށް ދެއަތަށް ބޯހޫރާލެވުނީ ބުނާނެ އެއްޗެއްވެސް ނޭނގިގެންނެވެ. ކޮންމެއަކަސް އެކަމުންވެސް އަހަރެންނަށް ދޭހަވީ އެމީހުން އަހަރެމެންނަށްޓަކައި އުޅޭވަރެވެ. ދެޓީމުގެ ކުޅުންތެރިން ހަމަވުމާއެކު، ދެ ސްކޫލުގެ ދެ ޕްރިންސިޕަލް ދެޓީމުގެ ކުޅުންތެރިންނާ ސަލާމްކޮށް އަދި ދެޓީމުގެ ކުޅުންތެރިންވެސް އެއްބަޔަކު އަނެއްބަޔަކާ ސަލާމްކުރުމަށްފަހު މެޗުފެށުނީ 16:25 ގައެވެ.

ދެ ސްކޫލުގެ ދަރިވަރުންގެ މެދުގައި ކުޅެވުނު އެކުވެރިކަމުގެ ފުޓްބޯޅަމެޗަށްފަހު ތާރީޚީ ފޮޓޯއަކަށް ހުއްޓިލައިގެން.

މެޗު ބަލައިލުމަށް ދެސްކޫލުގެ ދަރިވަރުންނާއި މުދައްރިސުންގެ އިތުރުން އެރަށުގެ ރައްޔިތުންގެ ތެރެއިން ބައެއްމީހުންވެސް އައެވެ. ނޭކުރެންދޫ ސްކޫލުގެ ޓީމު ކޯޗަކަށް ހުރީ ވިލްފްގެ ބައްޕައެވެ. އޭނަގެ ލަފާގެމަތިން އެ ސްކޫލުގެ ދަރިވަރުން މޮޅު ކުޅުމެއް ދެއްކިއެވެ. އަހަރެމެން ޓީމުގެ ކޯޗަކީ އަރީބު ސަރ ނަމަވެސް ޓީމުގެ ކުޅުންތެރިންނަށް އިރުޝާދުދޭން ހުރީ އަހަރެންނެވެ. 45 މިނެޓްގެ ކުޅުމަކަށްފަހު ފުރަތަމަ ހާފް ނިމުނީ 0-0 ގެ ނަތީޖާއަކުން ދެޓީމުވެސް އެއްވަރުވެގެންނެވެ. ހާފް ނިމުމާއެކު ކުއްލިއަކަށް ފެނުނީ އެ ސްކޫލުގެ ކުއްޖަކު ޖޫސްތަށިތަކެއް ހިފައިގެން އަހަރެމެންނާ ދިމާއަށް އަންނަތަނެވެ. ކަންތައްތައް ރޭވިފައިވާލެއް ފުރިހަމަކަމުން އަހަރެންހުރީ އާޝޯޚްވެފައެވެ. އިންޓަވަލް ގަޑީގައި އަހަރެން އުޅުނީ ފޮޓޯނަގާށެވެ. ދެވަނަ ހާފްގެ ކުޅުންފެށިގެން ކުރިއަށް ދިޔައީ ފުރަތަމަ ހާފަށްވުރެ ފޯރީގަ އެވެ. 'އިންޖަރީސް' ވުމުން ދެ ޓީމުގެ ކުޅުންތެރިންނަށްވެސް ފަސްޓްއެއިޑް ދޭން ދިޔައީ އަހަރެންނެވެ. ހުނޫ ހަމަލާތަކެއް ދެ ގޯލަށްވެސް އަމާޒުވިނަމަވެސް މެޗު ނިމިގެން ދިޔައީ 0-0 ން އެއްވަރުވެގެންނެވެ. އޭރުގަޑިން 18:00 ވެއްޖެއެވެ. މެޗު ނިމުމާއެކު ދެޓީމުގެ ކުޅުންތެރިންވެސް ކޮނޑާއި ކޮނޑު ޖައްސައި ސަލާންގަލާން ކޮށް އުޅުން މަންޒަރު ތަކަކީ ހަނދާނުން ކެހިގެން ދާނެ މަންޒަރުތަކެއް ނޫނެވެ.

އެމަންޒަރުތައް ފޮޓޯނަގަން އުޅެނިކޮށް ކަންތައް ދިމާވީ ވަރަށް ދެރަކޮށެވެ. ކެމެރާގެ 'މެމޯރީ' ފުލްވި އެވެ. އެހެންވެ ސުނީ މިސްއާއި ޔުމް މިސް އަދި ބެލެނިވެރިއަކާއެކު އަހަރެން ދިޔައީ ސުނީ މިސްގެ ލެޕަށް ފޮޓޯތަށް އަޅައި ކެމެރާ ހުސްކުރާށެވެ. ނަމަވެސް ދެންތިބި އެންމެން ދިޔައީ ސުކޫލަށް ސައިބޯށެވެ. ކެމެރާ ހުސްކުރުމަށްފަހު އަހަރެމެން 4 މީހުންނަށް ސުކޫލަށް ދެވުނީ 18:36 ގައެވެ. އަހަރެމެން ދިޔައިރު އަދި ސައިގެ ކަންތައް ނުނިމެއެވެ. ހަވީރުގެ ސަޔަށް އެކަނިވެސް ހައެއްކަ ބާވަތް ތައްޔާރުނުކޮށް ބެލެނިވެރިން ހިތްހަމަޖެހުނު ކަމަކަށް ނުވިއެވެ. ލޮނުއެއްޗެހި އެހާ ތަދު ދުވަސްވަރެއްގައި ދެން އެވަރު ނުކުރިއަސް ކަމުދާނޭ އަހަރެންގެ ހިތަށް އެރިއެވެ. އަހަރެނަށް މާކަ ބޮޑުވަރެއް ނުކޮށްލެވުނެވެ. ވާނީވެސް އެހެންތާއެވެ. ހަވީރު ސައިބޯން ޖެހުނީ މެންދުރުގެ ކެމުން ބަނޑަށް ވެލައިފައި ހުރި ވާންކަން ރަނގަޅަށް ނުފިލައި އުޅެނިކޮށެވެ. ކުޑަގޮތެއް ހަދާލައިގެން އަހަރެންނާއި ވިލްފާއި އަލްވިން އަދި ސަމީހު ނައްޓާލީ ގެއާދިމާއަށެވެ. އަހަރެމެން ގެއަށް ގޮސް ވަންއިރު ގަޑިން 18:50 ހިނގައިފިއެވެ. ކެމެރާތައް 'ޗާރޖަށް' ޖެހުމަށްފަހު ފެންވަރައިލައި 'ފްރެޝް' ވެލައިގެން 07:20 ގައި ދިޔައީ ސުކޫލަށެވެ. ކުރިއަށް އޮތް ރޭގަނޑުގެ ޝޯގައި އަހަރެމެންގެ ފަރާތުން ހުށަހަޅައިދޭނެ އައިޓަމެއް ތައްޔާރު ކުރުމަށެވެ. ވިލްފް މެންވެސް ދިޔައީ އެމީހުން ތައްޔާރު ކޮށްފައިވާ އައިޓަމަށް ތައްޔާރުވާށެވެ.

އަހަރެމެން އައިޓަމަށް ތައްޔާރުވާން ތިބީ އެ ސްކޫލުގެ ލައިބުރަރީ ގައެވެ. އެކަމުގައި އުޅެނި ކޮށް 8:15 ވީތަނާ އެ ސްކޫލުގެ މުދައްރިސަކު އައިސް، ކާގަޑި ޖެހިއްޖެ ކަމަށާއި ހުރީހާ ކުދިން ކާން އައުމަށް އެދުނެވެ. ވަގުތުން އަހަރެންނަށް ޝަހާދު ކިޔައިލެވުނެވެ. ވާނީވެސް އެހެންތާއެވެ. އޭރު އަދި ހަވީރު ސައިބުއި ހަނދާން ނުފިލަ އެވެ. ބަނޑުހުރީ ހަތަރު ފަރާތުން ވާންއަރާފަ އެވެ. ދެކެދެކެވެސް އަދި އެވަރުގެ ކަމެއް ނުދެކެމެވެ. އެހެންޏާފަހެ އަހަރެން އަމިއްލަ ގޭގައި އުޅޭއިރުވެސް އެވަރަކަށް ނުކަމެވެ. ނަމަވެސް ކުރާނެކަމެއް ނެތެވެ. އަހަރެމެންގެ ތެރެއިން އެންމެ ކުއްޖަކު ނުކައި ހުރިކަން އެނގުނަސް އެ ސްކޫލުގެ މިސްމެން ހިތުގައި ޖެހޭނެވަރު ހިތަށް އަރާފައި ހަމަ ނުގޮސް ނުކެރުނެވެ. ކެއުމަށް ތައްޔާރުކުރެވިފައިވާ ކުލާހަށް ވަންއިރަށް ދެލޮލުން ތަރިބުރައިގެން ދިޔަފަދައެވެ. ކުރިއެކޭއެއްފަދައިން ހަމަ މީރުވެގެންވާހާ އެއްޗެއް ހުރީ ތައްޔާރުކޮށްފައެވެ. ބަތާއި ކުކުޅާއި ފާޑުފާޑުގެ ރިހަތަކާއި ސަޓަންޏާއި މިހެން ގޮސް ކިޔާނެކަމެއް ނެތެވެ. އެކި ގަޑިގަޑީގައި ކެއުން ތައްޔާރުކުރަނީ ބެލެނިވެރިންގެ އެކި ގުރޫޕު ތަކުންކަމުގައި ވާއިރު، ހީވަނީ އެއްގުރޫޕް އަނެއް ގުރޫޕާ ވާދައަށް އުޅޭހެންނެވެ. ފޮނިއެއްޗެހިވެސް 'ހަބޭހަށް' ހުއްޓެވެ. އަހަރެން ހިތުގައި ޖެހުނެވެ. މުޅިންވެސް ކާހިތްވާ އެއްޗިއްސެވެ. ނަމަވެސް ބަނޑު ހުރީ ޓަކިޖަހާލީމާ ލޮކިއަޑު ކިޔާވަރު ވެފައެވެ. އެހެންވެ ކުޑަ ގޮތެއް ހަދާލައިގެން އަހަރެން އުޅުނީ ފޮޓޯނަގާށެވެ.

ކައިގެން އަރާމުކޮށްލުމުގެ ކުޑަ ވަގުތުކޮޅަކަށްފަހު 9:25 ކަންހާއިރު ޝޯވ ފެށުނެވެ. ޝޯވގެ ކަންތައްތައް އިންތިޒާމުކުރުމުގައި މުދައްރިސުންގެ ބެލުމުގެ ދަށުން ހަރަކާތްތެރިވީ ސީދާ އެ ސްކޫލުގެ ދަރިވަރުންނެވެ. އެއީ އެކުދިންގެ ފަރާތުން އަހަރެމެންނަށް ފެނުނު ވަރަށް ފުރިހަމަ ނަމޫނާއެކެވެ. އެފަދަ ކޮންމެ ކަމަކުން އެކުދިންގެ ފަރާތުން ލިބުނު ފިލާވަޅު ތަކަކީ ހިތުގައި ބިންވަޅުނެގިފައި ހުންނާނެ ކަންތައްތަކެވެ. ބޮޑުބެރުގެ ހަރަކާތްތަކާއި ހެއްވާމަޖާ އައިޓަމްތަކާއެކު ކުރިއަށް ދިޔަ އެ ޝޯވއިން އަހަރެންނަށް އެންމެ ފާހަގަ ކޮށްލެވުނު އައިޓަމަކީ އިހަވަންދޫ ސްކޫލުގެ މިހާރުގެ ޕްރިންސިޕަލް ކާޝިފް ސަރ ނޭކުރެންދޫގައި ހޭދަކުރި 6 އަހަރުގެ ތެރޭގައި އެ ސްކޫލަށް ކޮށްދީފައިވާ ޚިދުމަތްތަކަށް އަލިއަޅުވާލައި ތައްޔާރު ކުރެވިފައިވާ އައިޓަމެވެ. އެ އައިޓަމްގެ ތެރެއިން އެރަށުގެ އެކި މީސްމީހުންގެ އިންޓަވިއުތައް އަޑުއިވުމުން ހަގީގަތުގައިވެސް އަހަރެން އިނީ ތަލިން ކުޅުހިކި ދެ ލޮލުން ކަރުނަ ހިލިފަ އެވެ. އެރަށުގެ ރައްޔިތުންގެ ހިތުގައި ކާޝިފް ސަރއަށްޓަކައި އުފެދިފައިވާ ލޯތްބާއި އެމީހުން ކާޝިފް ސަރގެ ޚިދުމަތްތަކުގެ އަގު ވަޒަންކުރާ މިންވަރު އިހްސާސްކުރެވުމުންނެވެ. ނޭކުރެންދޫގެ ރައްޔިތުންނަކީ ހެޔޮކަމެއް ކޮށްދިން މީހަކަށް ތެޔޮހަމެއް ދޭނެ ބައެއްނޫންކަން އެ ވީޑިއޯތަކުން އަހަރެންނަށް ޔަޤީން ކުރެވުނެވެ.

"ދޮޅަސް" ފޮތް ނޭކުރެންދޫ ސްކޫލަށް ހަދިޔާ ކުރަނީ...

މީގެ އިތުރުން ފޫޅުދިގު ހަންޑިއާއި މާކުންބޭފަދަ ކެރެކްޓަރތައް ހިމަނައިގެން ކުރިއަށް ގެންދި އައިޓަމަކީވެސް ވަރަށް އުފެންދުންތެރި އައިޓަމެކެވެ. މިހެންދެން ކިޔާނެކަމެއް ނެތެވެ. އެކުދިންގެ ފަރާތުން ހުށަހަޅައިދިން ކޮންމެ އައިޓަމަކީވެސް އަހަރެމެންގެ ހިތްތަށް ދަމައިގަތް އައިޓަމްތަކެވެ. މި އައިޓަމްތަކުގެ އިތުރުން އަހަރެމެންގެ ފަރާތުން 'ދޮޅަސް' ކިޔާ ސަމާސާއަދަބުގެ ލިޔުން ތަކެއްހިމެނޭ ފޮތަކާއި ހަނދާނީ ފިލައެއްވެސް ހަދިޔާކުރުމުގެ ކަންތައްތައް އެ ޝޯވގައި ކުރިއަށްދިޔަ އެވެ. އަދި ޝޯވގެ އެންމެ ފަހަތުން ދެވަނައަށް އިހަވަންދޫ ސްކޫލުގެ ދަރިވަރުން ހުށަހަޅާދިން އައިޓަމަށް އަހަރެންވެސް އެރީމެވެ. އެއީ އަހަރެމެން ހިތުން ވަރަށް އާދައިގެ ގޮތަކަށް ގެންދި އައިޓަމެއް ނަމަވެސް އެރަށުގެ ކުދިންނަށާއި މުދައްރިސުންނަށް އެ އައިޓަމް ވަރަށް މަޖާވި އެވެ. ސްޓޭޖުން ފޭބުމާއެކު އެރަށުގެ ދަރިވަރުންނާއި މުދައްރިސުންގެ ފަރާތުން އައި 'ކޮމެންޓް' ތަކުން އެކަން ކަށަވަރުވި އެވެ. އެ މަޖާޝޯވ ނިމުނީ އެރޭ 00:17 ގަ އެވެ. ޝޯވ ނިމުމާއެކު އަހަރެންނާއި ވިލްފާއި ސަމީހު ދިޔައީ ގެއަށެވެ. ގެއަށް ދިޔަތަނުން ވިލްފްގެ މަންމަ ކޮފީ ތައްޔާރުކޮށްފި އެވެ. ކޮފީބޮއެގެން 'ފްރެޝް' ވެލައިގެން ނިދަން ޖައްސާލެވުނުއިރު ގަޑިން 1 ޖަހައިފި އެވެ. ތަންމަތީގައި ޖައްސާލިހެން ހީނުވެ ނިދިއްޖެވެ.

ހޮނިހިރު ދުވަހުގެ ހެނދުނު 7:50 ގައި އަހަރެންނަށް ހޭލެވުނީ ވަރަށް ފައްކާ ހުވަފެނަކާވެސް އެކުގަ އެވެ. ހުވަފެނުގައި ފެންނަނީ ވިލްފާއި ނޭކުރެންދޫ ސުކޫލުގެ ދަރިވަރުން އިހަވަންދޫއަށް ގޮސް އަހަރެމެންނާއެކު ވަރަށް މަޖާކުރާތަނެވެ. ފެނުނު ހުވަފެނާ ދޭތެރޭ ވިސްނަން އޮއްވައި ވިލްފާއި ސަމީހު ހޭލީ އެއްކޮށްކަހަލަ ގޮތަކަށެވެ. އަހަރެންނަށް ފެނުނު ހުވަފެނުގެ ވާހަކަ އެދެމީހުންނަށް ކިޔައިދިނުމުން ވިލްފް ޖަހައިލީ ހިނިގަނޑެކެވެ. އެ ހުވަފެނުގައި ވަރަށް އަވަހަށް ކުލަޖެހިދާނެކަމަށް ބުނެ ސަމީހުވަނީ ފެންވަރާށެވެ. ސަމީހު ނުކުތުމުން އަހަރެންނާއި ވިލްފް ފެންވަރައި ތައްޔާރުވެގެން ސުކޫލަށް ސައިބޯން ދާން ނުކުތްއިރު ވިލްފްގެ މަންމަހުރީ ސައިހަދާފަ އެވެ. ކުރާނީ ވެސް ވަކި ކީއްހެއްޔެވެ؟ އެރަށަށް ދިޔަފަހުން އަހަރެމެންނަށް ޖެހެނީ ކައިކައިފަވެސް ކާށެވެ. ސައިބޮއިގެން ސުކޫލަށްދެވުނީ 8:35 ވަރުގަ އެވެ. ސްކޫލުންވެސް ޖެހުނީ ސައިބޯށެވެ. ސައިބޮއިގެން ނުކުތްއިރު ފެންއަޅާފައި އޮތް ފުއްޕާހަމެކޭ އަހަރެންގެ ބަނޑެކޭ އެއްވެސް ތަފާތެއްނެތެވެ. ހީވަނީ ދެންމެ ދެންމެ ފަޅައިގެން ހިނގައިދާނެހެންނެވެ. އެހެންވެ ދެންދިޔައީ އެއްކަ ބޮޑު ގަސްދަށަށް އަރާމުކޮށްލާށެވެ. އެތަނުގައި ތިބެގެން އެރަށު ކުދިންނާއެކު މަޖާ ވާހަކަތައް ދެއްކުމަށްފަހު ވަރަށް ސަކަރާތްޖެހީމެވެ. ގިނައިރުވީ ވަރަކަށް އެކުދިންގެ ރައްޓެހިކަމާއި ގާތްކަން އިތުރުވާކަމުގެ އިހްސާސް އަހަރެންނަށް ކުރެވުނެވެ.

އެގޮތުގައި ވަގުތުތަކެއް ހޭދަކުރުމަށްފަހު 9:30 ގައި ހުރިހާކުދިން އެ ގަސްދަށަށް އެއްކޮށް އަހަރެންނާ ފަތޭ ސަރ ވެގެން ކުޑަކުޑަ ޑްރާމާއެއް ވަގުތުން ތައްޔާރުކޮށް ކުޅުނީމެވެ. އެއަށްފަހު އަހަރެންނާ ސަމީހުއާ ދެމީހުންވެގެން ދަތުރު ނާމާ އަކީ ކޮބައިކަމާއި އެކަމާ ގުޅޭގޮތުން އަހަރެމެންގެ ކިބައިގައި ހުރި ނަމަހުރި މަޢުލޫމާތެއް އެރަށުގެ ކުދިންނަށް ހިއްސާކުރީމެވެ. އެކަންތައް ނިންމާލުމަށްފަހު ކަނޑޫފަލަށް ދާން އެއްޗެހި ބަދަލުކުރަން އަހަރެންނާއި ވިލްފާއި ސަމީހުގެ އިތުރުން އަލްވިން ދިޔައީ ގެއާ ދިމާއަށެވެ. ގެއަށްގޮސް އެއްޗެހި ބަދަލުކޮށްގެން ދެންދިޔައީ ފެންފުޅިތަކެއް ގަންނަން ފިހާރައަކަށެވެ. ފިހާރައިން ސުކޫލަށް ދިޔަ މަގުމަތީ އެރަށުގެ ސަހަރާ ފެނިގެން އެތަނުގެ ފޮޓޯތަކެއް ނަގަންވަނީމެވެ. ހިތްހަމަޖެހޭވަރަށް ފޮޓޯނެގުމަށްފަހު އަހަރެމެންނަށް ސުކޫލާހަމައަށް ދެވުނީ 10 ޖެހިއިރުއެވެ. އަހަރެމެންނަށް ދެވުނުއިރު އަދި ބައެއް ކުދިން ނާދެއެވެ. ހުރިހާކުދިން ހަމަވުމާއެކު ކަނޑޫފަލަށްދާން މިސްރާބުޖެހިއެވެ. ކަނޑޫފަލަށް ދާން އަހަރެމެންނަށް ވަލަށް ވަދެވުނުއިރު ގަޑިން 10:46 ވެއްޖެއެވެ.

އަހަރެން ފިޔަވައި އިހަވަންދޫ ސްކޫލުންދިޔަ އެންމެންނަށްވެސް އެއީ މުޅިން އައު ތަޖުރިބާއެއްކަން ކަށަވަރެވެ. ފުރަތަމަ ދަތުރުގައި އަހަރެން އެތަނަށް ގޮސް ކުޅިއަށްވެސް އެރުނީމެވެ. ނަމަވެސް ވަރަށް ގިނަ ދުވަސްތަކަކަށް ފަހު އެފަދަ ފުރުޞަތެއް ލިބުނީތީ އަހަރެން ވަރަށް އުފާވި އެވެ. އެހެން ނުވާންވީ ކީއްވެހެއްޔެވެ؟ އަހަރެންނަށް ލިބިފައިވާ މަޢުލޫމާތު ދޮގުނޫންނަމަ އެއީ މުޅި ދިވެހިރާއްޖޭގައިވެސް އޮތް އެންމެ ބޮޑު ކަނޑޫފަލެވެ. ވަލުގައިވެސް އަހަރެން އުޅުނީ ފޮޓޯނެގުމުގައެވެ. އެ ބޭނުމުގައި އެކި ގަސްގަހަށްވެސް އަހަރެން އެރީމެވެ. ކަނޑޫގަހެއް ލޮލަށްފެންނަވަރުވީ ފުދޭވަރެއްގެ ދިގު ދަތުރަކަށް ފަހުއެވެ. ދިޔަމަގުމަތީ ވަރަށް ދުވަސްވީ ވަޅެއްވެސް ފެނުނެވެ. ކަނޑޫ ގަސްތަކާ ހަމައަށް ދެވުމުން ފައިވާން އަތަށް ނަގަންޖެހުނެވެ. އެތަނުގައި ހުރީ ހުސް ޗަކަ ކަމުގައިވެފައި ފައިވާނާ އެއްކޮށް ހިނގަން އުނދަގޫވާނެތީއެވެ. އެހެންވެ އަހަރެންގެ ފައިވާން ކޮންމެވެސް ކުއްޖަކަށް ހަވާލުކުރީމެވެ. ފައިވާން ހިފައިގެން ފޮޓޯނަގަން އުނދަގުވާނެތީއެވެ.

ކުދިންތައް ކަނޑޫފާ ގަސްތަކުގެ ތެރެއަށް ވަނުމުން ދެން ފެންނަން ފެށީ ވަރަށް ހިނިއަންނަކަހަލަ މަންޒަރުތަކެކެވެ. އެއްބައިކުދިންގެ ފައި ގަނބައިގަންނައިރު އަނެއްބައި ކުދިން ޗަކަގަނޑުގެ ތެރެއަށް ވެއްޓެންވެސް ވެއްޓެއެވެ. ކެމެރާ ހިފައިގެން ހުއްޓަ އެފަދަ ކަމެއް ދިމާވެދާނެތީ އަހަރެން އުޅުނީ ވަރަށް ބަލައިގެންނެވެ. ކަނޑޫ ގަސްގަހުގައި ވަރަށް ބާރަށް ހިފަހައްޓައިގެން އެ ގަސްގަހުގައި އެލިގަނެގެން ކަހަލަ ގޮތަކަށެވެ. ކުދިންގެ ހުނުމާއި ހަޅޭކުގެ އަޑުން މުޅި ސަރަހައްދުވަނީ ގުގުމާލާފައެވެ. ގިނަކުދިން އުޅެނީ ކައިރީގައި ހުންނަކުއްޖާގެ ގައިގައި ހިފަހައްޓައިގެންނެވެ. ކުއްޖަކު ގަނބައި ގެންފިނަމަ 'އާތް! މަންމާތް!' އޭ ހަޅޭލަވައިގަނެއެވެ. އެވަގުތު ތަކުގައިވެސް އެރަށުގެ ކުދިންނާއި މުދައްރިސުން އަހަރެމެންނަށް ވަރަށް އެހީތެރިކަން ފޯރުކޮށްދިނެވެ. ބޮޑެތި ވަޅުގަންގަނޑަށް ގަނބައިގަންނަ ކުދިންތައް ނަގައިދީ، އަހަރެމެންނަށް ކަމެއްވެދާނެތީ ވަށައިގެން އަބަދުވެސް ތިބެއެވެ. އެދަނޑިވަޅުގައިވެސް އަހަރެން މަސައްކަތްކުރީ ފޮޓޯއެއް ނެގޭތޯއެވެ. ކަނޑޫފާ ތެރެއިންގޮސް ގޮސް ކުޅިއާ ހަމައަށް ފޯރީ ލައްކަ ހިތްވަރުކޮށްގެންނެވެ. 

ދެން ކަންތައް ދިމާވީ އަހަރެން ވަރަށް ހިތުގައި ޖެހޭފަދަ ގޮތަކަށެވެ. ކުއްލިއަކަށް ވިއްސާރަވިލާތަކެއް ނެގުމުގެ ސަބަބުން ކެމެރާ ބާއްވަން ޖެހުނީ އެވެ. ވިއްސާރައައުމުގެ ސަބަބުން ހުރިހާ ފޯނުތަކަކާ އެއްޗެހި އެޅީ ސުނީމިސްގެ އަތްދަބަހަކަށާއި އަދިވެސް އެހެން މީހެއްގެ އަތްދަބަހަކަށެވެ. އެކިމީސް މީހުންގެ ފޯނާއި ވޮލެޓްފަދަ އެއްޗެހިން ދެ އަތްދަބަސްވެސް ފުރުނެވެ. ނަމަވެސް ޖާގައެއް ހަދާލުމަށްފަހު އަހަރެން ގެންގުޅުނު ކެމެރާވެސް އެއިން އެއްދަބަސް ތެރެއަށް ގަންނަވާލީއެވެ. ވިއްސާރަ އޮއްސާލުމުގެ ކުރިން ކެމެރާ ލެވުނީ ހަމަ ކިރިއާއެވެ. އެއިން އެއްދަބަހަކީ ފެންނުވަންނަ ވައްތަރުގެ ދަބަހެއް ނަމަވެސް ފަތޭ ސަރ ގެންގުޅު ދަބަހަކީ ފަސޭހައިން ތެމޭ ވައްތަރުގެ ދަބަހެއްކަމުން އަހަރެންނާއި އިތުރު ކުއްޖެއްގެ ޓީޝާޓް ބޭލުމަށްފަހު ފަތޭ ސަރ އަށް ދިނީމެވެ. އެ ދަބަހުގައި ހުރި އެއްޗެހިތައް ސަލާމަތްކުރުމުގެ ބޭނުމުގައެވެ.

ކުޅީގެ އެ ހިތްގައިމު މަންޒަރުތައް ފޮޓޯ ނެގުމުގެ ފުރުޞަތު ގެންލުމުން އެކަމާ ދެރަވެފައި ހުއްޓައި ނަސީބަކުން ވިއްސާރަ ހުއްޓާލިއެވެ. ހަމައެއާއެކު ދަބަސްތެރެއިން ކެމެރާއެއް ލިބޭތޯ މަސައްކަތް ކުރީމެވެ. ނަސީބަކުން ވަރަށް ފަސޭހައިން ސަމީހުގެ ކެމެރާ އަތުޖެހުނެވެ. ކުޅިގައި އެހޭދަކުރި ވަގުތުތަކުގެ ހަނދާނަކަށް މިހާރު ހުރީ އަހަރެން އެ ކެމެރާއިން ނެގި ފޮޓޯތައް އެކަންޏެވެ. ކުޅީގައި ފެންހުރީ އެވްރެޖްކޮށް ފޫޅާ ހަމައަށް ނަމަވެސް ބައެއްފަހަރު ވަޅުގަންގަނޑަށް ވެއްޓުމުން މޭކަށިގަނޑާ ހަމައަށްވެސް ފެންގަނޑު އަރައެވެ. ކުޅިގައި ހިތްގައިމު ވަގުތުތަކެއް ހޭދަކުރުމަށްފަހު ދެން ނުކުތީ އަތިރިއަށެވެ. އަތިރިއަށް ނުކުތްއިރު އަހަރެމެން ހީވަނީ ފާހާނާ ޖަންކުޝަނަކަށް އެރިފައިތިބި ބައެއްހެންނެވެ. މުޅިގައިގައި ހުސް ޗަކައެވެ. އެއްބައިކުދިންގެ ބޮލާއި މޫނުގައިވެސް ޗަކަ ހުއްޓެވެ. އެމަންޒަރުތައް ސިފަވުމުން މިހާރުވެސް ހިނިއާދެއެވެ. ދެން އަހަރެމެން އެރުނީ މޫދަށެވެ. ގައިގައި ހުރި ޗަކަތައް ފިލުވައި ސާފުވެލުމަށްޓަކައެވެ. ކުދިންތައް މޫދަށް އެރުމާއެކު، ފެންތައްޓަކަށް ކުލަކޮޅެއް ގިރުވާލުމުން ވާހެން މުޅި ސަރަހައްދަށް ޗަކަ ކުލަ ފެތުރުނެވެ. މޫދަށްއެރުމަށްފަހު ދެން މިސްރާބުޖެހީ ބަނދަރާ ދިމާއަށެވެ. އެންމެ ފަސޭހައިން ރަށުތެރެއަށް އެރޭނީ އެދިމާއިން ކަމަށްވާތީއެވެ. ގާތަކުގެ ތެރެއިން ހިނގާފައި ދާންޖެހުނީމަ ކަންނޭނގެއެވެ. ބައެއް އަންހެން ކުދިން އަނބުރައިގަތުމާއި އަކުނިވަޔަށް ދެމުންފަދަ ކަންކަން ދިމާވިއެވެ. އެފަދަ ކުދިންނަށް އަހަރެންނަށް ވީ ވަރަކުން އެހީތެރިކަން ފޯރުކޮށްދިނީމެވެ. ފައިވާންވީ ހިސާބެއް ނޭނގޭތީ ހުދު އަހަރެންނަށްވެސް އުޅެން ޖެހުނީ ހުސްފައިގައެވެ.

ބަނދަރާ ހަމައަށް ދެވުނުއިރު ހުރީ ވަރަށް ވަރުބަލިވެފަ އެވެ. އެދޭތެރޭގެ ރާސްތާ ދިގުކަމުންނެވެ. ބަނދަރާހަމައަށް ދެވުމުން ފަސްއެނބުރި ބަލައިލެވުނީ ވިލްފް ނުވަތަ ސަމީހު ނަމަވެސް ފެނޭތޯއެވެ. ނަމަވެސް އެއިން އެކަކުވެސް ފެންނާން ނެތުމުން ދެން އަހަރެން މިސްރާބުޖެހީ ގެއާދިމާއަށެވެ. ގެއަށްގޮސް ގަޑިބަލައިއިރު ހުރީ 12:50 ވެފައެވެ. އޭރު އަދި ވިލްފެއްވެސް އަދި ސަމީހެއްވެސް ނާދެއެވެ. ރަށަށް ދާން ފުރަންހަމަޖެހިފައިވާ ގަޑިއަކީ 14:00 ކަމުގައި ވާތީއާއި، އަދި އޭގެ ކުރިން ސްކޫލަށް ކާންދާންޖެހޭތީ އަހަރެން އަވަހަށް ކެމެރާ 'ޗާރޖަށް' ޖެހުމަށްފަހު  ވަނީ ފެންވަރާށެވެ. ފެންވަރައިގެން ނުކުތްއިރު ވިލްފާއި ސަމީހުވެސް އަތުވެއްޖެއެވެ. ސަމީހު ފެންވަރަން ވަދުމާއެކު އަހަރެން އުޅުނީ ރީތިވާށެވެ. ކުޑަ ހިނދުކޮޅެއްވެސް ނުވެ ސަމީހުގެ ފޯނު ރިންގުވާން ފަށިއެވެ. ބަލައިލިއިރު އަހަރެމެންނާ އެއްކުލާހުގެ ކުއްޖެއްކަމަށްވާ ނަޝްފާއެވެ. ކުޑަ އިރުކޮޅަކު ވިސްނަން ހުރެފައި އަހަރެން ފޯނުނެގީ މުހިންމު ކަމަކުވެސް ގުޅައިފާނެތީއެވެ.

ފުރަތަމަވެސް ނަޝްފާގެ އަޑުޖެހުމާއެކު ކޮންމެވެސްކަމެއް ގޯސްވެއްޖެކަން އަހަރެންނަށް އެނގުނެވެ. އޭނާއަށް ހުރީ ފާޑަކަށް ރޮވިފައެވެ. އޭނާ ބުނިހާވެސް އެއްޗަކީ ނާޒު (އަހަރެމެންނާ އެއްކުލާހުގެ ކުއްޖެއް) ވަރަށް ބޮޑަށް ސަކަރާތް ވެއްޖެކަމަށާއި އަދި ވީ އެންމެ އަވަހަށް އެގޭ ދަށަށް އައިސްދިނުމަށްވެސް އެދުނެވެ. ނަމަވެސް އަހަރެން ކުރާނީ ކީއްހެއްޔެވެ؟ އޭރު އަދި އަހަރެން ހުރީ ތުވާލިކޮޅާއެއްކޮށެވެ. އަނެއްކޮޅުން އެގެއަށް ކިޔާ ނަމެއްވެސް، އެ ގެ ހުންނަތަނެއްވެސް އަހަރެންނަށް އެނގެނީއެއްނޫނެވެ. ސަމީހުއަށްވެސް ނޭނގޭކަން އަހަރެންނަށް ކަށަވަރެވެ. އަހަރެން އަވަހަށް ސަމީހަށް އެޚަބަރު ދިނީމެވެ. އަދި އެއްއަތުން ރީތިވަމުން އަނެއްއަތުން ފޯނުން ޓީޗަރުންނަށް ގުޅޭތޯ މަސައްކަތް ފެށީމެވެ. އަހަރެންގެ ފޯނާއި ސަމީހުގެ ފޯނާ ދެ ފޯނުން ކުރި މަސައްކަތުން ގުޅޭ ގޮތްވީ ހަމައެކަނި ސުނީ މިސްއަށެވެ. ގުޅުމާއެކު އަހަރެން އެޚަބަރު ދިނީމެވެ. އެއާއެކު ސުނީމިސް ވަރަށް އަވަހަށް އެތަނަށް އެބަދަން ކަމުގައި ބުނެ ފޯނުކަނޑައިލިއެވެ. އެވަރުންވެސް އަހަރެން ހުއްޓައެއްނުލަމެވެ. ފަތޭ ސަރ އަށް ގުޅޭތޯ ވަރަށް މަސައްކަތް ކުރީމެވެ. ނަމަވެސް އެގަޑީ ފެންވަރަން އުޅޭތީކަން ނޭނގެ އެވެ. ފަތޭ ސަރ ފޯނެއް ނުނަގަ އެވެ. އެހެންވެ ދެން އަހަރެން ގުޅީ ނަޝްފާއަށެވެ. އެއަށްފަހު ވާނުވާ ބަލައި އެގޭގެ ނަމާއި އެއްޗެހި އޮޅުންފިލުވީމެވެ. އަދި އެއީ ހަމަޖެހެންވީ ވަގުތުކަމުގައި ބުނެދީ ހާސްނުވުމަށް ނަސޭހަތްތެރިވެ، އަހަރެންނަށް އެނގުނުވަރަކުން ކަންކުރަންވީ ގޮތް ބުނެދިނީމެވެ.

ސަމީހު ފެންވަރައިގެން ނުކުތްއިރު ވިލްފްވެސް ހުރީ ތައްޔާރުވެގެން އައިސްފައެވެ. ސަމީހު ރީތިވުމުން ދެމީހުންވެސް އެއްޗެހިތައް ބޮނޑިކޮށްފަ ކަހަލަގޮތަކަށް ދަބަހަށް ގަންނަވާލުމަށްފަހު ވިލްފާއެކު ނައްޓާލީ އެގެޔާ ދިމާއަށް ދާށެވެ. ނަމަވެސް ސުނީމިސްއަށް ގުޅާލުމުން ބުނީ މިހާރު މަރުކަޒަށް ނައްޓާލަނީ ކަމުގަ އެވެ. އެހެންވެ އަހަރެމެންވެސް މަރުކަޒާ ދިމާއަށް މިސްރާބު ބަދަލުކޮށްލީ މަރުކަޒާ ދިމާއަށެވެ. އަހަރެމެންނަށް ދެވުނުއިރު އެމްބިއުލާންސްގައި ނާޒް ގެންނަނީ އެވެ. މަރުކަޒު ތެރެއަށް ވަންއިރު ފަތޭ ސަރ އާއި ސުނީމިސްގެ އިތުރުން ޗިޕޫ (އެރަށު މިސްއެއް، ލޯބިން ހުރިހާ ކުދިން ކިޔަނީ ޗިޕޫމިސް) މިސްވެސް ހުއްޓެވެ. ޗިޕޫމިސް ހުރީ މޫދަށް އެރުނުގޮތަށް ފެންވެސް ނުވަރައި ތެތާއެވެ. އެ ދަނޑިވަޅުގައި ޗިޕޫ މިސްގެ ފަރާތުން ފެނުނު އޯގާތެރިކަމާއި އެހީތެރިކަމުގެ އެ މިސާލަށް އަހަރެންގެ ހިތުގެ އެންމެ އަޑިން ތަޢުރީފް ކުރެވުނެވެ. ކުޑައިރުކޮޅަކު އެތަނުގައި މަޑުކޮށްލުމަށް ފަހު ދެން އަހަރެމެން 3 މީހުން ދިޔައީ ފަތޭ ސަރ ބުނެގެން ދަތުރަށް ތައްޔާރުވުމަށްޓަކައި ބައެއް ސާމާނު ގަނެދިނުމަށެވެ. ފެންކޭހަކާއި ޓިޝޫއާއި އެނޫންވެސް ދަތުރަށް ބޭނުންވާނެ ބައެއް ސާމާނު ގަނެގެން ވިލްފް މެންގެ ގެއަށް އައިއިރު ވިލްފްގެ މަންމަމެން ހުރީ އަހަރެމެން ދެމީހުންނަށް ހަދިޔާވެސް ތައްޔާރުކޮށްފައެވެ. އެއްޗެހިތައް ބެހެއްޓުމަށްފަހު އަހަރެމެން ދެން ދިޔައީ ސްކޫލަށް ކާށެވެ. އޭރު ގަޑިން 2:40 ވެއްޖެއެވެ.

އެހެން އިރުއިރެކޭވެސް އެއްފަދައިން ވަރަށް ރަނގަޅަށް ކެއުން ތައްޔާރުކޮށްފައި ހުއްޓެވެ. ކާން ތިއްބެއްކަމަކު ނާޒުއަށް ވާނުވާ އަހަރެމެން ދިޔައީ ބަލަމުންނެވެ. އޭނާގެ ހާލު މަޑު މަޑުން އައީ ރަނގަޅުވަމުންނެވެ. ނަމަވެސް ދެން ކަންތައްވީ އެއްވެސް މީހަކު އުންމީދުވެސް ނުކުރާކަހަލަ ގޮތަކަށެވެ. ކާންއިންދައި ދެން އަހަރެންނަށް ޚަބަރުލިބުނީ ސަމާހާ (އަހަރެމެންނާ އެއްކުލާހު ކުއްޖެއް) ފާހާނާ ތެރެއަށް އެނބުރިން ވެއްޓުމުގެ ސަބަބުން މަރުކަޒަށް ގެންދި ޚަބަރެވެ. އެހެން މީހެއްގެ ގޮތެއް ނޭނގެއެވެ. ހަމަގައިމުވެސް އެހާ ހިސާބުން އެދުވަހު ފުރޭނެކަމާމެދު އަހަރެން މުޅިން އުންމީދުކަނޑައިލީމެވެ.  ކައި ނިމުމުން އަހަރެން ދިޔައީ ބޭރަށް ގަސްދަށަށެވެ. އެތަނުގައި ތިބި އަހަރެންނާ އެއްކުލާހެއްގެ ދެކުދިން ކަމުގައިވާ ފިރާޒާއި އަލީފް ގޮވައިގެން އަހަރެން ދިޔައީ ސްކޫލާ ކައިރީ، އަތިރީގައި ހުރި ގަސްތަކުގެ ތެރެއަށް ވައި ޖައްސާލާށެވެ. އެތަނަކީ ގޮނޑުދޮށާ ވަރަށް ކައިރި ތަނެއްކަމުން ވަރަށް ފިނިވައި އެތަނަށް ޖެހެއެވެ. އެތަނަށް ދިޔައިރުވެސް ވައިރޯޅި ވަރަށް ހަރެވެ. އެންމެ ފަހުން ވާހަކަދައްކަން ތިބުމަށް ފަހު އަހަރެމެން އެތަނުން އެނބުރި ސްކޫލަށްވަނީ ދެ ލޮލަށް ފަސް ޖަހާވަރަށް ވައިރޯޅި ހަރުވުމުން އެތަނުގައި ނުތިބެވިގެންނެވެ. އޭރު ކަނޑު ހީވަނީ ކެކިއަރާ ފެން ތެއްޔެއް ހެންނެވެ.

އަހަރެމެން އައިސް އެ ސްކޫލުގެ ހޯލުތެރެއަށް ވަންތާ މާ ގިނައިރުތަކެއްނުވެ ފަތޭ ސަރ އައިސް، މޫސުން ގޯސްވުމުގެ ސަބަބުންނާއި ކުދިންތަކެއް ބަލިވެ އުޅޭތީ ދަތުރު ކެންސަލްވި ވާހަކައާއި ދެން ފުރުން އޮންނާނީ އަނެއްދުވަހުގެ ހެނދުނު ކަމުގައި އެންގިއެވެ. އޭރުގަޑިން 16:10 އެކެވެ. އަދި  އިހަވަންދޫ ސްކޫލުގެ ދަރިވަރުންނާ ވަކިން ބައްދަލުކޮށް ކަންތައް ވީ ގޮތުގެ ތެދު މަޢުލޫމާތު ބެލެނިވެރިންނަށް އެންގުމަށްވެސް އެދުނެވެ. އަދިހަމަ އެހެންމެ ނޭކުރެންދޫ ސްކޫލުގެ ދަރިވަރުން އަހަރެމެންނަށްޓަކައި 2 ދުވަސް ޤުރުބާންކޮށްފި ކަމަށާއި ދެން އެކުދިންނަށް އެއްވެސް އުނދަގުލެއް ނުކޮށް އެކުދިންގެ ފިލާވަޅުތައް ހެދުމުގައާއި އެނޫންވެސް ކަންކަމުގައި އެހީތެރިވެ ދިނުމަށް އެދުނެވެ. އެންމެންވެސް ފަތޭ ސަރގެ އެ ވާހަކަތަކަށް އާބަސްބުނެ އެމަގުން ކަންކުޅައުމަށް މަސައްކަތް ފެށިއެވެ. މިގޮތުން އެކުދިންނާއެކު ހޯލާ ތަންތަން ރާވައި ކުލާސްތަކަށް ޑެސްކްތަކާއެއްޗެހި ހަމަކޮށް ސުކޫލުތެރެ ހަމައެޅުވުމަށް އަހަރެމެން މަސައްކަތް ފެށީމެވެ. އޭރު މުޅި އުދަރެސް އޮތީ ކަޅުވިލާތަކުން ބައްދާލާފައެވެ. އިސާހިތަކު ވަރަށް ބޯކޮށް ވާރެވެހެން ފަށައިފިއެވެ. އެދެ ކުދިންގެ ބައްޔަކީ އަހަރެމެންގެ ނަސީބޭ އަހަރެންހިތަށް އެރިއެވެ. އެހެނީ އެދެކުދިން ބަލިނުވެ ފުރަން އުޅުނު ގަޑިއަށް ފުރުނުނަމަ މި ވިއްސާރަގަނޑު ދިމާވާނީ އަހަރެމެން ކަނޑުމަތީގައި ތިއްބައެވެ. ކޮންމެ ކަމެއްވެސް ވާނީ އެންމެ ރަނގަޅަށޭ ބުނާ ބަހަކީ ތެދެއްކަން އަހަރެންނަށް ކަށަވަރު ވިއެވެ.

ވިއްސާރަ ތުނިކޮށްލިއިރު ކުލާހެއްގެ ތެރޭގައި ހުރީ ސައި ތައްޔާރުކޮށްފައެވެ. އޭރު ގަޑިން 17:15 ހިނގާފިއެވެ. އެހާ ކުޑަވަގުތު ކޮޅެއްގެ ތެރޭގައި ސައި ތައްޔާރު ކުރުމުން އަހަރެން ހުރީ ސުވާލު މާކެއްގެ ތެރޭގައެވެ. ސައިބޮއިގެން އިރުގަނޑެއްގައި ވާހަކާގައި ތިބުމަށްފަހު އަހަރެންނާ ވިލްފާއި އަލްވިންގެ އިތުރުން ސަމީހު، ސުނީމިސް ލެޕްޓޮޕް ހިފައިގެން މިސްރާބު ޖެހީ ވިލްފްގެ ގެއާދިމާއަށެވެ. ގެއަށް ދިޔައިރުވެސް ހައިކެރި ވެހެއެވެ. އަހަރެމެންނަށް ގެއަށް ވަދެވުނީ 17:50 ގައެވެ. ނޭކުރެންދޫ ސުކޫލުގެ މުދައްރިސުން ފޮޓޯބޭނުން ވާހަކަ ބުނެފައިވާތީ، ގެއަށްއައިސް ސަމީހާއެކު އަހަރެން އުޅުނީ ސުކޫލަށްދޭނެ ފޮޓޯ 'ފޯލްޑަރ' އެއް ތައްޔާރުކުރާށެވެ. އެއަށްފަހު އޭގެ ކޮޕީއެއް ވިލްފަށާއި އަޔާޒަށް ދިނީމެވެ. ހަމަ އެދަނޑިވަޅު ސުނީމިސް ގުޅާފައި ލެޕް ބޭނުންވާ ވާހަކަ ބުނުމުން ލެޕްހިފައިގެން ސުނީމިސް ގާތަށް މަރުކަޒަށް ދާން ނައްޓާލީމެވެ. އަހަރެންނާއެކު ސަމީހު، އަލްވިން، ވިލްފް، އަޔާޒް އަދި ފިރާޒްވެސް އައެވެ. ގެއިން ނުކުތްހެން ހީނުވެ ސަމީހުގެ ފޯނަށް ސުނީމިސް ގުޅާފައި މިހާރު މަރުކަޒުން ގެއާދިމާއަށް ދަނީކަމުގައި ބުންޏެވެ. އެހެންވެ އަހަރެމެންގެ މިސްރާބު މިސްމެން ތިބޭގެއާދިމާއަށް ބަދަލުކޮށްލީމެވެ. މާކަދުރަކަށް ހިނގާކަށް ނުޖެހުނެވެ. ވަކި ހިސާބަކަށް ދިޔަތަނާ ހުރިހާ މުދައްރިސުންނާ މަގުމަތިން ބައްދަލުވިއެވެ. ލެޕް ހަވާލުކުރުމަށްފަހު ދެން އަހަރެމެން ނައްޓާލީ އިބްރާހިމް ފަވާޒު އުޅޭ ގެ ކަމުގައިވާ 'ވީލް' އާ ދިމާއަށެވެ. އެގެއަށް ދިޔައީ އެގެއަށް ދިއުމަށް ފަވާޒު ދަޢުވަތު ދީފައިވާތީއެވެ. އަހަރެމެންނަށް އެގެއާ ހަމައަށް ފޯރީ 20:30 ގައެވެ.

ދިޔަތަނުން ފަވާޒު އެދުނީ ކެއުމަށެވެ. ފަވާޒުގެ ދަޢުވަތަކީ އެފަދަ ދަޢުވަތެއްކަމެއް އަހަރެންނަކަށް ކުރިއަކުން ނޭނގެއެވެ. ކާމޭޒުކައިރިއަށް ދިއުމުން އަހަރެމެން އަންނާތީ ވެފައިވާ ތައްޔާރީގެ ފުރިހަމަކަން އަހަރެންނަށް އިޙްސާސް ކުރެވުނެވެ. ތަފާތު ބާވަތް ބާވަތުގެ ކާނާއިން މޭޒުމަތިވަނީ ފުރާލެވިފައެވެ. އަހަރެމެން ކަމުން ގެންދިއިރު އަހަރެމެންނާ ދޭތެރޭ ފަވާޒުގެ މަންމަ ދެއްކި އޯގާތެރި ވާހަކަތަކުގެ ސަބަބުން އެރަށުގެ ރައްއިޔުންގެ ހިތްހެޔޮކަމާއި އޯގާތެރިކަން އަހަރެންނަށް ވަރަށް ފުރިހަމައަށް ކަށަވަރުވިއެވެ. ކައިނިމިގެން ފަވާޒުމެންގެ އާއިލާއަށް ވަރަށް ބޮޑަށް ޝުކުރުއަދާކުރުމަށްފަހު ދެން އަހަރެމެން ދިޔައީ ނޭކުރެންދޫ ސްކޫލުގެ ވައިސް ކެޕްޓަން އަޒްމީމެން އުޅޭ ގެއަށެވެ. އެގެއަށް ދެވުނުއިރު 21:15 ވެއްޖެއެވެ. އަހަރެމެން އެގެއަށްދިޔައިރު ބޮޑު އީދަށް ތައްޔާރުވާ އަންހެން ގުރޫޕެއް އުޅުނެވެ. އެކިއުމުރުފުރައިގެ މީސް މީހުން އެފަދަކަމެއްގައި އެކުގައި އުޅޭތަންފެނުމުން އެރަށުގެ ރައްޔިތުންނަކީ ވަރަށް އެއްބައިވަންތަ ބައެއްކަމުގައި އަހަރެންގެ ހިތުގައި ލިޔެވުނެވެ.

އެ ގޭގައި، ދެ ސްކޫލުގެ ކުދިންނާއެކު ވަރަށް މަޖާ ވަގުތުކޮޅެއް ހޭދަކުރުމަށްފަހު އަހަރެންނާއި ވިލްފް އަދި ސަމީހު، ވިލްފްމެންގެ ގެއަށް ދިޔައިރު 10 ޖަހާފިއެވެ. ގެއަށް ދިޔައިރު ވިލްފްގެ މަންމަމެންވެސް ހުރީ ކާން ހަދާފައެވެ. ކާމޭޒުދަށުގައި ކާންތިބިއިރު  އަހަރެމެން ސްކޫލުގެ ވާހަކައާއި ކިޔެވުމުގެ ކަންތައްތަކުގެ ވާހަކަ ވަރަށް ގަދައަށްވެސް ދެއްކީމެވެ. ކެއުމުގެ މަޖިލީސް ނިންމާލީ ހިތްވަރާއެކު މޮޅަށް ކިޔަވައި، ބަސްއަހާކިޔަމަންތެރި ކުއްޖަކަށް ވުމަށްއެދި ވިލްފަށް ނަސޭހަތްތެރިވަމުންނެވެ. އެއަށްފަހު 'ރިފްރެޝް' ވެލައިގެން އައިސް ނިދަންއޮށޯވެވުނުއިރު ގަޑިން ހުރީ 22:53 ވެފައެވެ.

ދުވަހަކީ ވިއްސާރަވެ ފިނި ދުވަހަކަށް ވުމާއެކު  ހީކަރުވާވަރުން ހީވަނީ އެހެންފަދަ ކަމެއްހެންނެވެ. ފަތިހު 4:45 ކަންހާއިރު ވިލްފާއި ސަމީހުވެސް ހޭލީ އަހަރެން ހޭލައިގެން ޚިޔާލުތަކެއްގެ ތެރޭގައި އޮއްވައެވެ. ދެންވެސް ދަތުރަށް ތައްޔާރުވާކަށް ހިތެއްނުބުންޏެވެ. މޫސުމަށް ވާނުވާއެއް ނޭނގޭތީ އެކަމާ ކަންބޮޑުވެގެން  އެވާހަކަ ދައްކަންތިބެވުނީއެވެ. ވާނީވެސް އެހެންތާއެވެ. ޚަބަރުފަތުރާ ވަސީލަތްތަކުން ކެނޑިނޭޅި ގޮވަމުންދިޔައީ ކަނޑުގަދަވާނެ ކަމަށާއި ކޮންމެހެން ކުރަންޖެހޭ ދަތުރުތައް ނޫނީ ނުކުރުމަށެވެ. މީގެ އިތުރުން ކަނޑުމަތީގައި ހިތާމަވެރި އެތައް ހާދިސާތަކެއް ހިނގަމުން އަންނަކަމަށެވެ. ކަންތައް މިހެން ހުރުމާއެކު އަހަރެމެން ގުޅީ ފަތޭ ސަރ އަށެވެ. ފަތޭ ސަރ އެންގީ ފުރަން ތައްޔާރުވެގެން ވީ އެންމެ އަވަހަކަށް ސުކޫލަށް އައުމަށެވެ. އެހެންވެ އަވަހަށް ފެންވަރައި ތައްޔާރުވުމަށް މަސައްކަތް ފެށީމެވެ. ނަމަވެސް ފިނިކަމުން ފެންވެރުނީ ވަރަށް ވަރުންނެވެ. ސަމީހުވެސް ފެންވަރައިގެން ނުކުތްއިރު ތުރުތުރު އަޅާވަރުން ހީވަނީ ފަހާފޮއްޓެއްގެ ދަތްގަނޑުހެންނެވެ. އަވަސް އަވަސް ކޮށްލައިގެން ދަބަސް ތައްޔާރުކުރުމަށްފަހު ސުކޫލަށް ދާންވެގެން ކޮޓަރިން ނުކުތްއިރު ވިލްފްގެ މަންމަ ހުރީ ސައި ތައްޔާރު ކޮށްފައެވެ. ސައިބޮއިގެން އަހަރެންނާ ވިލްފާއި ސަމީހުގެ އިތުރުން ވިލްފްގެ މަންމަ ނައްޓާލީ ސުކޫލާ ދިމާއަށް ދާންވެގެންނެވެ. އޭރުގަޑިން ހުރީ 5:47 ވެފައެވެ. ނަމަވެސް ދޮރާށިން ނުކުތްތަނާހެން ސަމީހު ހޮޑުލާން ފަށައިފިއެވެ. ވިލްފްގެ މަންމަ އަވަހަށް ގޮސް ފެންފުޅިއެއް ގެނެސްދިނެވެ. ހޮޑުލައި ނިންމާލުމަށްފަހު، ސަމީހުބުނީ ދަތުރު މައްޗަށް ހުރިބައި ބޭރުކޮށްލީ ކަމުގައެވެ. އެހެންކަމުން ކޮންމެ ފަހަރަކުވެސް ހޮޑުގެ ކަންތައްތައް ފައްޓާދޭ މީހަކަށް ވީ ސަމީހެވެ.

އަހަރެމެންނަށް ސުކޫލާހަމައަށް ދެވުނުއިރު ހުރިހާ ކުދިންނެއް ނާދެއެވެ. އެންމެން އައުމުން އަވަހަށް ބަނދަރާ ދިމާއަށް ދާން ނައްޓާލިއެވެ. ވިލްފާއި ސަމީހުގެ އިތުރުން އެރަށު ސުކޫލުގެ ދެތިން ކުއްޖަކާއެކު އަހަރެން ދިޔައީ ވިލްފްމެންގެ ގެއަށެވެ. ދަތުރަށް ތައްޔާރުކޮށްފައި ހުރި ފެންކޭހާއި އެނޫންވެސް އެއްޗެހި ހިފައިން ބަނދަރާ ދިމާއަށް ނުކުންނާށެވެ. އެ ގެ ހުންނަނީ ސްކޫލުން ބަނދަރަށްދާ މަގާ ވަރަށް ކައިރީގައި ކަމުން އެހެންކުދިންނާ އެއްކޮށްކަހަލައިން އަހަރެމެންނަށް ބަނދަރަށް ނުކުމެވުނެވެ. ބަނދަރަށް ނުކުތްއިރު އުޑުމަތި ވަރަށް ބަނައެވެ. ވިލްފާ ވަދާއީ ސަލާމް ކުރުމަށްފަހު އަހަރެން ދޯންޏަށް އެރީ ވަރަށް އަސަރާއެކުއެވެ. ވާނީވެސް އެހެންތާއެވެ. ދެދުވަސް ވަންދެން އެބަޔަކާއެކު ހުރިހާ ވަގުތުތަކެއް ހޭދަކުރި ނޭކުރެންދޫގެ ރައްޓެހިންތަކާ ވަކިވާން ޖެހުނީއެވެ. އެކުދިންގެ ހިތްހެޔޮކަމާއި އެކުވެރިކަން އިހްސާސްކުރެވުމުން ދޫކޮށްލާފައި ދާންހަމަ ހިތުގައި ޖެހުނީއެވެ. ދުވަހަކީ 6:45 ގައި ސްކޫލަށް ދާންޖެހޭ ދުވަހެއްނަމަވެސް ގިނަ އަދަދެއްގެ ދަރިވަރުންނާއި މުދައްރިސުންގެ އިތުރުން ބެލެނިވެރިން އަހަރެމެން ފުރުވާލުމަށް ބަނދަރަށްއައި އައުމުން އެމީހުންގެ ހިތުގައި އަހަރެމެންނާމެދު އޮތް ގާތްކަމާއި މެހެމާންދާރީގެ ފުރިހަމަކަން އަހަރެންނަށް އިހްސާސް ކުރެވުނެވެ.

އެރަށުން އަހަރެމެންނަށް ނައްޓާލެވުނީ 6:25 ގައެވެ. ނައްޓާލުމާއެކު ދެތިން ފޮޓޯނެގުމަށްފަހު އަހަރެން ނުކުތީ ދިރުނބާކޮޅަށް ބޭރަށެވެ. އޭރު ހުސެންދަރިމަތީ އިށީނދެލައިގެން ދޯނީގެ ފަޅުވެރިއަކު އިނެވެ. އޭނާއާ ވާހަކަދައްކާލަން ކުޑައިރުކޮޅަކު އިންކަމަށްޓަކައިވެސް ލޮނުޖަހައި ތެންމައިލިއެވެ. ނަމަވެސް އަހަރެން އެތެރެއަށް ވަނީ ބޮޑު ވިއްސާރަ ވިލާގަނޑެއް ބޯމަތިކުރަން ފެށުމުންނެވެ. އެތެރެއަށް ވަނުމަށްފަހު ވަކިވަކިން ކުދިންތަކުގެ މޫނަށް ބަލައިލެވުނެވެ. އެންމެންގެ މޫނުމަތިންވެސް ފެންނަނީ 'ސީރިއަސް' ކަމެވެ. ދިރުނބާކޮޅު ފަލުކާތަކުގެ މަތީގައި އޮށޯވެލައިގެންތިބި ކުދިންގެ ހާސްކަން ވަކިން ބޮޑުކަމަށް ފެނުނެވެ. ވިލާގަނޑުގެ ވައި އަންނަން ފެށުމުން ކުރިއަށްވުރެ ކަނޑު ދިޔައީ ގަދަވަމުންނެވެ. މުޅި ދުނިޔެމަތި ބަނަކޮށް އޮތުމުގެ ސަބަބުން ރަށްރަށުގެ ވިނަރެސް ފެންނަނީ ވަރަށްވެސް ފުސްކޮށެވެ. ސަމީހު އިށީނދެލައިން އިން ގޮނޑީގައި ޖައްސާލުމަށްފަހު ވިލާގަނޑެއް ނަގާވާހަކަބުނެ ވަރަށް ބޮޑަށްވެސް ކެތްތެރިވެ ހަމަޖެހުމަށް ނަސޭހަތްތެރިވީމެވެ. ކަނޑުގެ ތެރޭގައި ދެއަތް ދެއަތަށް ހަލުވަމުން ދޯނިއޮވެގެން ކުރިއަށްދާއިރު، އެންމެންވެސް ތިބީ އަތުޖެހުނު ތަނެއްގައި ހިފެހެއްޓުނު އެންމެ ގަދައަކަށް ހިފަހައްޓައިގެންނެވެ.

ނޭކުރެންދޫއިން ފުރިއިރު މޫސުން ހުރިގޮތް.

މިފަދަ ހާލެއްގައި ތިއްބައި ބައެއްކުދިން ބޯ އަނބުރައި ހޮޑުލަވާތީ އުޅެން ފަށައިފިއެވެ. އަރީބު ސަރ މަސައްކަތް ކުރަމުން ދިޔައީ ކޯރާޑިތެޔޮ އެޅި ޓިޝޫ އެފަދަ ކުދިންނަށް ފޯރުކޮށްދެވޭތޯއެވެ. ކުރިން ފަހަރުވެސް ކޮންމެވެސް ވަރަކަށް އޭގެ ސަބަބުން ކުދިންތަކަށް ލުޔެއް ލިބުނަތީއެވެ. އިރުކޮޅަކުން ފަހަރަކު ކުއްޖަކު ހޮޑުލާން ފަށައިފިއެވެ. ދެތިން ފިރިހެން ކުއްޖަކު އެކުދިންނަށް އެހީތެރިވުމުގައި އުޅުނެވެ. ކުރިން ދަތުރުގައިވެސް ބަނޑުގައި ރިއްސާތީ އުޅުނު ކުއްޖާކަމުގައިވާ ސަނޫހާ (12 އޭ ކުލާހުގެ) ބަނޑުގައި ރިއްސާތީއުޅެން ފެށީވެސް ހަމަ އެވަގުތު އެވެ. ބަނޑުގައި ރިހޭވަރުން ސަނޫހާ ރޮއިރޮއިފައި ތެޅިފޮޅުނުތަން ފެނުނު މީހަކުވެސް ހިތުގައި ޖެހޭނެއެވެ. ފަތޭ ސަރ އާއި ރަސްލާ (12 އޭ ކުލާހުގެ) އުޅުނީ އެނާއަށް ހޭހަން ކުރާށެވެ. ސުނީ މިސްވެސް ހޮޑުލާން ފެށީ އެގަޑީގައެވެ. ހަމަ އެދަނޑިވަޅު ވަރަށް ބޯކޮށް ވިއްސާރަ އޮއްސާލިއެވެ. ތަނެއްދޮރެއް ވަތްކެއްނުވެއެވެ. ބައެއްފަހަރު ކަނޑުވެސް އިހުނަށްވުރެ ގަދަހެން ހީވެއެވެ. އަންހެން ކުދިންތައް ބިރުން ރޯން ފެށިއެވެ. ދޯނީގެ ކަންކައްޓަށް ބިންދާލާ ކޮންމެ ރާޅާކާއެކު ރުއިމާއި ހަޅޭކުގެ އަޑުގަދަވެގެން ދެއެވެ. މަންމާއޭ ކިޔާ ހަޅޭލަވައިގަނެއެވެ. ސަމީހުގެ ހާލަކީ ކޮބައިތޯ ބަލައިލި އިރު ނަސީބަކުން އޭނާއަށް އޮތީ ނިދިފައެވެ.

އަހަރެން އޭރު ހުރީ ކޮޅުފަސްކޮޅުގައި ކައްޕި ތާނުގެ ކައިރީގައެވެ. އެހެން ހުއްޓާ ކައްޕިތާނު އެދުނީ އިންޖީނުގޭގެ ހާލަތު ބަލައިލުމަށެވެ. އަހަރެންނާ ފަޅުވެރިއަކާ ދެމީހުންވެގެން އިންޖީނުގޭގެ މަތިނެގިއިރަށް ބޮލަށް ހީވީ އެނބުރުން އަރައިގެން ދިޔަހެންނެވެ. ދޯނީގެ އޮޓޯޕަންޕަށް ކޮންމެވެސް މައްސަލައެއް ދިމާވުމުގެ ސަބަބުން އިންޖީނު ގޭގައި ދިޔަބޮޑުވެ، ލޮނުގަނޑު ހުރީ އިންޖީނުގައިވެސް ޖެހިފައެވެ. ކުޑަ ހިނދުކޮޅެއް ލަސްވިނަމަވެސް އަޑީތެޔޮ އަޅާބަޔަށް ލޮނު ވަންނާނެކަން ކަށަވަރެވެ. ހިތާހިތުން މާތް ﷲގެ ކިބަފުޅަށް ޙަމްދުކުރެވުނެވެ. އެއާއެކު އަހަރެންނާ ދެފަޅުވެރިންވެގެން މަސައްކަތްކުރީ ގުންބާއިން އަވަހަށް ދިޔަގަނޑު ހިއްކާލެވޭތޯއެވެ. އެހެން އެއްވެސް ކުއްޖަކަށް އެ ޚަބަރު ނުދޭން އަހަރެން އަޒުމު ކަނޑައެޅީމެވެ. ހާލަތު އޮތްގޮތުން ކުދިންތައް މާބޮޑަށް ހިތްވަރު އެލުވާލަފާނެތީއެވެ. ނަމަވެސް އަފްޝާން (12 އޭ ކުލާހުގެ) އަށް އަހަރެމެން ދިޔަހިއްކާ މަންޒަރު ފެނިގެން ވަރަށް ގިނައިން ސުވާލުކުރަން ފެށުމުން އެންމެފަހުން އަހަރެންނަށް ޖެހުނީ އެވާހަކަ ބުނާށެވެ. އޭރު އޭނާ އުޅެނީ ދިރުނބާކޮޅުގައި ސުނީމިސް ހޮޑުލާތީ މިސްއަށް އެހީވުމުގައެވެ. ދިޔަގަނޑު އަޑިވާގޮތްވީ ހިއްކާ ހިއްކާގޮސް ތިން މީހުން ވަރުބަލިވި ފަހުންނެވެ.

ދިޔަގަނޑު ފުދޭވަރަށް އަޑިވިތަނާ ކޮޅުފަސްކޮޅަށް އައިސް ފިރިހެން ކުއްޖަކު ހޮޑުލާންފަށައިފިއެވެ. އެހެންވެ އަހަރެން ފެންފުޅިއެއް ހިފައިގެން ދިޔައީ އެނާއަށް އެހީވާށެވެ. އޭނާ ހޮޑުލާ ނިމުނުހެން ހިޔެއްނުވެ ސުކޫލުގެ ކެޕްޓަން ހޮޑުލާތަން އަހަރެންނަށް ފެނުނެވެ. ދުވެފައި ކަހަލަ ގޮތަކަށް އަހަރެންނަށް އެދިމާއަށް ދެވުނެވެ. ވާނީވެސް އެހެންތާއެވެ. އިތުރުއެއްވެސް މީހަކު ސަލާމަތަކުން ނެތެވެ. ސުނީމިސް ނޫނީ ހުރިހާ މުދައްރިސުންނާއި ބެލެނިވެރިންވެސް މަސައްކަތް ކުރަމުންދިޔައީ ހޮޑުލަމުން ދިޔަކުދިންތައް ހޭހަން ކުރުމަށެވެ. ޕުރިންސިޕަލްވެސް އުޅުނީ ހޮޑުލަމުންދިޔަ ކޮންމެވެސް ކުއްޖަކަށް އެހީވާށެވެ. އެފަދަ ހާލެއްގައި އަހަރެމެން އުޅެނިކޮށް ނަސީބަކުން ވިއްސާރަ ތުނިކޮށްލައިފިއެވެ. އޭރު ހިރިމަރަދޫ ފަސްދޭންވަނީއެވެ.

ބަނޑުގައި ރިއްސާތީ އުޅުނު ސަނޫހާ، ހަމަ އިރުކޮށްކޮޅަށް ރިއްސައިގަނެގެން ތެޅިފޮޅޭތީ ފަތާ ސަރ އަށް އެތަނުން ތެދުވެވޭގޮތެއް ނުވެއެވެ. އަނެއްކޮޅުން ރަސްލާއަށްވެސް އިންނަން ޖެހުނީ އެނާއަށް ސަމާލުކަން ދީގެންނެވެ. ނަމަވެސް ކައިރީ އިންނަ ކުއްޖާ ހޮޑުލާފަހަރު ފަހަރު އެއްއަތުން ނަމަވެސް ރަސްލާ އެކުދިންނަށްވެސް އެހީތެރިކަން ފޯރުކޮށްދިނެވެ. އެހެންވެ އަހަރެންނަށް ރަސްލާ ފާހަގަ ކުރެވުނީ އެހެން އަންހެން ކުދިންނާ ހިލާފަށް ވަރަށް ހިތްވަރުގަދަ ކުއްޖެއްގެ ގޮތުގައެވެ. މީހަކާ އަނގައިން ބުނެލާނެ ހިތްވަރެއްވެސް އެނާނޫން އެހެން އެއްވެސް އަންހެން ކުއްޖެއް ކިބާގައި ނެތެވެ. އަހަރެން ބޭރުބަލައިލި އިރު މާރަންދޫގެ ނާރެސް ފެންނަން ހުއްޓެވެ. އެދަނޑިވަޅުގައި އަހަރެންވެސް އުޅުނީ ފެންފުޅިއަކާއި ޓިޝޫބޮނޑިއެއް އަތަށް ލައިގެން ހޮޑުލާކުދިންނަށް އެހީތެރިވުމުގައެވެ. އެހެން އުޅެމުން އެއްލިކަޅިއަކުން އަހަރެންނަށް ފެނުނީ ފަލުކާމަތީގައި ނިދާފައި އޮތް ނާޒު ތެދުވެގެން ބަނޑުގައި ރިއްސާތީ ރޯތަނެވެ. ވަގުތުން އަހަރެންނާ ޔުމްނާ މިސްވެގެން ނާޒުނަގައި ގޮނޑިމަތީގައި ބޭއްވީމެވެ. އޭގެ ކުރިން ޔުމްނާ މިސް އުޅުނީވެސް ސުނީމިސް ހޭނެތިފައި އޮތަތީ ސުނީމިސް ކައިރީގައެވެ. އެކަންތައް އަހަރެންނަށް އެނގުނީވެސް އެހާހިސާބުންނެވެ. ނާޒުގެ ބޯކޮޅު ޔުމްނާ މިސްގެ އުނގުގައި އަދި ފައިކޮޅު އަހަރެންގެ އުނގުމަތީ އޮތްއިރު، ތެޅިފޮޅޭވަރުން އެނާގެ ފައިކޮޅު އަހަރެންނަށް ހިފަހައްޓާލެވެނީ ހަމަކިރިޔާއެވެ. ނާޒުގެ ބަނޑަށް ކުޑަވެސް ލުޔެއް ލިބޭތޯ އަހަރެންނަށާއި ޔުމްނާ މިސްއަށް ކުރެވުނުހާކަމެއް ކުރީމެވެ. ނަމަވެސް ހިނދުކޮޅަކަށްފަހު ހިނދުކޮޅަކަށް ރިހުން ގަދަވެ އޭނާގެ ރުއިމުގެ އަޑު ދިޔައީ ގަދަވަމުންނެވެ.

މުޅި ދޯނިމަތިންވެސް ފެންނަނީ ހަމަ އެއްކަހަލަ މަންޒަރު ތަކެކެވެ. ސަލާމަތުން ތިބޭބަޔަކު ދެންތިބި މީހުންނަށް އެހީވާ މަންޒަރެވެ. ވަކި އަންހެން ފިރިހެނެއްނެތިއެވެ. ކައްޕިތާނުވެސް ވަރަށް ޙިކުމަތްތެރިކަމާއެކު ތަޖުރިބާގެ އެހީގައި ދޯނީގެ މިސްރާބު ދާންޖެހޭ މަންޒިލާ ދިމާއަށް ހިފެހެއްޓޭތޯ މަސައްކަތްކުރަމުން ދެއެވެ. ދޯނީގެ މިސްރާބު ހުރީ މާރަންދޫ ކަނޑޯޅިއާ ދިމާއަށެވެ. އެއީ ނޭކުރަންދޫއަށް ދިޔަ މަގު ނޫން އަނެއް މަގެވެ. ގަދަކަމުން ކުރިން އެރަށަށް ދިޔަމަގުން ނުދެވޭނެކަން އެނގޭތީ ފަރުދަށުން ދާން އެދިމާއަށް މިސްރާބު ހިފީއެވެ. ދޯނި ކޮޅުން މަހާލަފާނެތީ ދެތިން ފަހަރަކު މަޑުވެސް ކޮށްލިއެވެ. އެފަދަ ކޮންމެ ފަހަރަކު އަންހެން ކުދިންތައް ހީވަނީ ބިރުންގޮސް މޮޔަވެދާނެހެންނެވެ. ނާޒު ހޭހަންކުރުމުގައި އަވަދިނެތި އުޅެނިކޮށް އެއްލިކަޅިއަކުން އަހަރެންނަށް ފެނުނީ ސަމާހާ ނިދާފައި އޮއްވައި ގޮނޑިން ވެއްޓޭތަނެވެ. ރާޅަށް ދޯނި އަރިކޮށްލާ ކޮންމެ ފަހަރަކު އޭނާގެ ބޯކޮޅު އައީ ތިރިވަމުންނެވެ. ކައިރީގައިއިން ބެލެނިވެރިއަކު އުޅުނީ ދެން ޖެހިގެން އޮތްކުއްޖާ ހޮޑުލާތީއެވެ. އަހަރެންނަށް ބޭއިހްތިޔާރުގައި އެދިމާއަށް އިނގިލިދިއްކޮށްލެވުނެވެ. އެހިނދު ޕްރިންސިޕަލް ދުވެފައި ކަހަލަ ގޮތަކަށް ގޮސް އެކުއްޖާ ހިފެހެއްޓިއެވެ. ތައްޓުމައްޗަށް ވެއްޓުމުގެ ކުރިން ޕްރިންސިޕަލްއަށް ދެވުނީ ހަމަކިރިޔާއެވެ. ރަނގަޅަށް ބެލިއިރު ސަމާހާއޮތީ ނިދާފައެއް ނޫނެވެ. ހޭނެތިފައެވެ. އޭރު ސުނީމިސްއަށް އޮތީ ފިރިހެންކުއްޖެއްގެ އުނގުގައި ނިދިފައެވެ. ހޮޑުލާލާގޮސް މުޅިމީހަގެ ގައިންވަނީ ވަރުދޫވެފައެވެ.

ނާޒުވެސް އެހެންއޮވެގެން ތެޅިފޮޅެނީއެވެ. ހަމައެއްގޮތެއްވެސް ނުވެއެވެ. އެންމެފަހުން އަހަރެންނަށް ނުހިފޭއްޓިގެން ގޮސް ނާޒުގެ ފައިން ކައިރީއިން އަންހެންކުއްޖެއްގެ ބަނޑުގައި ވަރަށް ބާރަށް ޖެހުނެވެ. ޖެހުނުލެއްބާރުކަމުން އެކުއްޖާވެސް ރޯންފެށިވެ. ހަދާނެގޮތްބޮޑުވެގެން އަހަރެން އެހެން ފިރިހެން ކުއްޖަކަށް ގޮވައި އެތަނުގައި ތިބި ދެކުދިން އެހެން ތަނަކަށް ބަދަލުކުރީއެވެ. ނަމަވެސް އޭގެ ކުޑައިރުކޮޅެއްގެ ފަހުން އަނެއްކާ ރަސްލާގެ ގައިގައިވެސް ނާޒުގެ ފައިން ޖެހުނެވެ. ވާނީވެސް އެހެންތާއެވެ. އެފަކީރު އޮވެގެން ތެޅިފޮޅެނީއެވެ. އެކަންތައްތަކުގެ ތެރޭގައި އުޅެމުން އަހަރެންނަށް އެއްލިކަޅިއަކުން ފެނުނީ އަފްޝާން ކޮޅުފަސްކޮޅުގައި އިންގޮނޑިއެއްގައި ނިދާފައި އިންދައެވެ. ފުރަތަމަ ފެނުމާއެކުވެސް އޭނައަށް ކަމެއްވެފައި އިންހެން އަހަރެންނަށް ހީވިއެވެ. އެ ހީ ޔަގީނަކަށް ބަދަލުވީ ޖެހިރާޅަކާއެކު ކައިރީގައި ހުރި ފަޅުވެރިއަކު އޭނަގެ ގައިގައި ފުދޭވަރެއްގެ ބާރުމިނުގައި ޖެހުނުއިރުވެސް އޭނާ ހޭނުލުމުންނެވެ. ނިދާފައި އިންމީހަކަށް އެވަރުން ހޭނުލެވި ނުހުންނާނެކަމަށް އަހަރެންގެ ސިކުނޑިއަށް ވިސްނުމުން އަރީބު ސަރ އަށް ގޮވައި އެވާހަކަ އަވަހަށް ބުނީމެވެ. ރަނގަޅަށް ބެލިއިރު އޭނާވެސް އިނީ ހޭނެތިފައެވެ. އެހާހިސާބުން އޭނާއަށް ފަރުވާއެއްދެވޭތޯ މަސައްކަތްފެށިއެވެ. ނަމަވެސް ފަތޭ ސަރ ގޮސްގެންވެސް ކުރި މަސައްކަތްވީ ނާކާމިޔާބެވެ. އޭރު އަދި ކުރިން ހޭނެތުނު ސަމާހާ ހެޔެއްނާރައެވެ. ބަނޑުގައި ރިއްސާތީއުޅޭ ދެކުދިން ކަމަށްވާ ނާޒަށާއި ސަނޫހާއަށް ހަމަ އެއްގޮތެއްވެސް ނުވެއެވެ. ކަންތައްތައް އެހާ ހިސާބަށް ދިޔުމުން މާރަންދޫގައި ޖައްސާގޮތަށް ނިންމިއެވެ. އޭރު މާރަންދޫ އޮތީ ފުދޭވަރަކަށް ކައިރީގައެވެ. ކަނޑުވެސް ފުރިއިރަށްވުރެ އެތައްތަނެއް މަޑެވެ. މާރަންދޫއާ ދިމާއަށް މިސްރާބު ބަދަލުކޮށްލިތާ މާކަ ގިނައިރުތަކެއްނުވެ މާރަންދޫއަށް ވަދެވިއްޖެއެވެ. އޭރު ގަޑިން 9:10 ހިނގައިފިއެވެ.

މާރަންދޫއިން ދަތުރުގެ ބައިވެރިންނަށް ކުރުނބާ ތައްޔާރުކޮށްދެނީ...

ނަސީބަކުން އެރަށުގެ މަރުކަޒު ހުރީ ބަނދަރާ ވަރަށް ކައިރީގައެވެ. ގާތްގަނޑަކަށް 100 ވަރަކަށް ފޫޓުވެސް ނުހުންނާނެއެވެ. ދޯނި ކައިރި ވުމާއެކުހެން ނާޒު އަތްދަނޑިމައްޗަށް ލައިގެން އަހަރެން ދުއްވާގަތީ މަރުކަޒާދިމާއަށެވެ. ވަކި ހިސާބަކަށް ދިޔަތަނާ ނާޒު ތެޅިގަތުމުގެ ސަބަބުން އަހަރެން އަތުން ދޫވާންދަނިކޮށް ޕްރިންސިޕަލް ހިފިއެވެ. އިސާހިތަކު ހާލުދެރެވެފައިވާ ކުދިންނަށް އެރަށުގެ މަރުކަޒަށް ގެންދިއެވެ. ކުޑަ ކުޑަ މަރުކަޒެއް ކަމުން ވޯޑުގައި އިނީ އެންމެ 3 އެނދެވެ. ނަމަވެސް 5 ކުއްޖަކު މަރުކަޒަށް ގެނައެވެ. އެހެންކަމުން އެއްކުއްޖަކު ޑޮކްޓަރ އިންނަ ރޫމަށް އަދި އަނެއްކުއްޖާ ބޭސްއަޅާ ރޫމުގައި ބޭއްވިއެވެ. ކުޑަ އިރުކޮޅެއްގެ ތެރޭގައި ހުރިހާ ކުދިންވެސް އައިވީ ގުޅިއެވެ. ސަމާހާއާއި އަފްޝާން ފިޔަވައި ދެންތިބި ކުދިންގެ ހާލުއައީ ރަނގަޅުވަމުންނެވެ. ނަމަވެސް އޭރުވެސް އެދެމީހުން ހެޔެއްނާރައެވެ. އަހަރެން ދެން ނުމީ ބޭރަށެވެ. އޭރު ދޮރުކައިރީގައި ދެތިން އިހާ ކުރުނބާ އޮތެވެ. އަދި އެރަށުގެ ކައުންސިލަރުންނާއި ކަމުވޮށިގެންވާ އެންމެން ކަހަލައިން އެތަނުގައި އުޅުނެވެ. ބޭރަށްނުކުމެ ހުއްޓައި އަހަރެންނާ ބައްދަލުކުރީ އަހަރެންގެ ބައްޕަމެންގެ ވަރަށް ގާތް ރައްޓެއްސެއް ކަމުގައިވާ ނާސިރުބޭއެވެ. އޭނާގެ އެދުމުގެ މަތިން ފަތޭ ސަރގެ ހުއްދައާއެކު ދެން އަހަރެން ދިޔައީ އެމީހުންގެ ގެއަށެވެ. އޭރު 9:45 ވެއްޖެއެވެ. އެގެއަށްގޮސް ސައިބޮއިގެން އަނެއްކާ 10:05 ކަންހާއިރު އައީ މަރުކަޒަށެވެ. އޭރުވެސް ހޭނެތުނު ދެކުދިން ހެއެއް ނާރައެވެ.

އަހަރެން އުޅުނީ މަރުކަޒުގައެވެ. ދެންތިބި ކުދިންތައް ދިޔައީ އެރަށު ސްކޫލުގެ ޕްރިންސިޕަލްމެން ގެއަށެވެ. ނަމަވެސް ގިނަ ފިރިހެންކުދިން ދިޔައީ ދަތުރުގައި ބައިވެރި، 12 އޭކުލާހުގެ އެރަށު ދެ ފިރިހެން ކުދިންނާއެކުގައެވެ. ގަޑިން 11:17 ކަންހާއިރު އަހަރެންނާއި ސަމީހު ދިޔައީ ޕްރިންސިޕަލްމެންގެ ގެއަށް ނަޝްފާ ލާށެވެ. އޭނާ އެ ގެއަށް ލުމަށްފަހު 11:40 ގައި އެނބުރި މަރުކަޒަށް އައީމެވެ. އޭރު އަފްޝާނު ހޭއަރައިފިއެވެ. ނަމަވެސް ސަމާހާ ހެޔެއްނާރައެވެ. 12:12 ގައި ހުރިހާ ކުދިންނާ(މަރުކަޒުގައިތިބި 5 ކުދިންފިޔަވައި) މުދައްރިސުންނާ އެކު އަހަރެންވެސް ދިޔައީ ސިރާޖް(ދަތުރުގައި ބައިވެރިވި މާރަންދޫ ކުއްޖެއް)މެންގެ ގެއަށް ކާށެވެ. އެގޭގައި ދަތުރުގެ ހުރިހާ ބައިވެރިންނަށް ވަރަށް ރަނގަޅަށް ކާންހަދާފައި ހުއްޓެވެ. ކައިނިމިގެން ސިރާޖުގެ މަންމަމެނަށް ޝުކުރު އަދާކުރުމަށްފަހު ދެންނުކުތީ ފުރަން ބަނދަރަށެވެ.

ނަމަވެސް ބަނދަރަށް ނުކުތްއިރު ދޯންޏެއް ނެތެވެ. އޭރު ދޯނިވީ ތަކަންދޫގައި އޮތް އިހަވަންދޫ ބޯއްޓެއްގެ އިންޖީނު 'ސްޓަރޓް' ނުވެގެން އުޅޭތީ އެރަށް ގޮސްފައެވެ. އެހެންވެ ދެން އަހަރެން ދިޔައީ މަރުކަޒުގައިތިބި ކުދިންތަކުގެ ހާލު ބަލައިލާށެވެ. އޭރު ގަޑިން 12:45 ހިނގައިފިއެވެ. ހުރިހާ ކުދިންވެސް އޭރުތިބީ އާދައިގެ ހާލަތެއްގައެވެ. ކުޑައިރު ކޮޅެއްގެ ތެރޭގައި ދޯނި އައުމުން އެންމެން ހިނގައިގަތީ ދޯންޏާދިމާއަށް ދާށެވެ. ނަމަވެސް މަރުކަޒުގެ ދޮރޯށިން ނުނިކުމެވި އުޅެނިކޮށް އަހަރެންނަށް ފެނުނީ ނާޒު ބިންމައްޗަށް ތިރިވާތަނެވެ. ބިންމައްޗަށް ވެއްޓުމުގެ ކުރިން އަހަރެންނަށް ގޮސް އޭނާ ހިފެހެއްޓުނީ ފުދޭވަރަކަށް ކައިރީގައި ހުރެވުނުކަމުންނެވެ. އަހަރެން އަވަހަށް އަތްދަނޑިމަތީ ގެންގޮސް ނާޒު ހޮސްޕިޓަލުގެ ތެރެއަށް ވެއްދީމެވެ. ހިނގައިފައި ދޯންޏާހަމައަށް ނުދެވުނު ކުދިންތައް ދޯންޏަށް އެރުވީ އެމްބިއުލާންސްގައި އޮންނަ ބެޑެއްގެ އެހީގައެވެ. އަހަރެން އުޅުނީ އެ މަންޒަރުތައް ފޮޓޯނަގާށެވެ.

އެމްބިއުލާންސް ތައްޔާރީ ހާލަތުގައި.

ބައިވެރިން ރަށަށް ފައިބަނީ...

ހުރިހާކުދިން ދޯންޏަށް އެރުމާއެކު އެރަށުން ނައްޓާލީ 13:10 ގައެވެ. ރަށަށް ދިޔައިރު އެހާ ގަދައެއް ނޫނެވެ. އެއްވެސް ކުއްޖަކު ހޮޑު ނުލީނަމަވެސް ސަނޫހާއާއި ނާޒު ބަނޑުގައި ރިއްސާތީ ކުރިއެކޭ އެއްގޮތަށް ތެޅި ފޮޅުނެވެ. ދަތުރު ނިންމާލުމަށްފަހު އަހަރެމެންނަށް އެނބުރި ރަށަށްއާދެވުނީ 2:15 ގައެވެ. އޭރު ބަނދަރުމަތީގައި ވަރަށް ގިނަ މުދައްރިސުންނާއި ބައެއްކުދިންގެ ބެލެނިވެރިންގެ އިތުރުން ކައުންސިލަރުންވެސް ތިއްބެވެ. އަދި އެމްބިއުލާންސާއި ކައުންސިލް އިދާރާގެ ވޭންވެސް ތައްޔާރީ ހާލަތުގައި އޮތެވެ. ދޯނި ގާތްވުމާއެކުހެން އަފްޝާން ފިޔަވައި މާރާންދޫ މަރުކަޒުން ފަރުވާދިން ހުރިހާކުދިން ގެންދިޔައީ މަރުކަޒަށެވެ. އަހަރެންވެސް ވެފައިހުރި ވަރުބައްޔާއެކު ދިޔައީ ގެއަށެވެ.

މީގެކުރިން މިއަށްވުރެ މާ ގަދަ ދަތުރުތައް އަހަރެންކުރީމެވެ. ނަމަވެސް މިފަދަ ދަތުރެއް މީގެ ކުރިއަކުން ތަޖުރިބާއެއް ނުކުރަމެވެ. ހުރިހާ ގޮތަކުން ބެލިނަމަވެސް މިއީ އަހަރެންނަށް ވަރަށް ގިނަ ޢިބުރަތްތެރި ފިލާވަޅުތަކަކުންނާއި އައު ތަޖުރިބާތަކަކުން ފުރިގެންވާ ފައްކާ ދަތުރެކެވެ. މި ފުރުޞަތުގައި ނޭކުރެންދޫގެ ރައްޔިތުން އަހަރެމެންނަށް އަދާކުރި ފުރިހަމަ މެހެމާންދާރީއަށް ހިތުގެ އެންމެ ފުންމިނުން ޝުކުރުދަންނަވަމެވެ. އަދިހަމަ އެހެންމެ މާރަންދޫގެ ރައްޔިތުންގެ ފަރާތުން ލިބުނު އެހީތަކަށްޓަކައި އެފަރާތްތަކަށްވެސް ނިހާޔަތަށް ޝުކުރުދަންނަވަމެވެ.