ސާނަވީ ނިންމާ އިމްތިހާނުގެ ދިވެހި މާއްދާއިން "އޭ ސްޓަރ" ހޯދާނެ ގޮތް

 އިރުޝާދުދޭ ލިޔުން:

ސާނަވީ ސްކޫލު ނިންމާ އިމްތިހާނުތަކުގެ މާއްދާތަކުން ރަނގަޅު ނަތީޖާ ހޯދާ ދަރިވަރުންނަށް ވެސް ދިމާވާ އެންމެ ބޮޑު ގޮންޖެހުމަކީ ދިވެހި މާއްދާއިން އޭ ސްޓައެއް ނުހޯދުމެވެ. އެހެންކަމުން، ސާނަވީ މަރުހަލާ ނިންމާ އިމްތިހާނާ ހަމައަށްދާއިރު، އެންމެ އިސްކަމެއް ދޭން ޖެހޭ މާއްދާއަކަށް ވެފައި އޮންނަނީ ވެސް ދިވެހި މާއްދާއެވެ. އެހެންކަމުން، ސާނަވީ ނިންމާ އިމްތިހާނުގެ ދިވެހި މާއްދާއިން އޭ ސްޓަރ ހޯދިދާނެ ގޮތުގެ ބައެއް އިރުޝާދު ހިއްސާކޮށްލާނަމެވެ.

ދިވެހި މާއްދާއިން އޭ ސްޓަރ ހޯދަން ބޭނުން ނަމަ، އެންމެ ފުރަތަމަ ވެސް ދިވެހިބަހަށް އޮންނަ ލޯބި އިތުރުކުރަން ވިސްނާށެވެ. މިގޮތުން، ދިވެހި މާއްދާއަކީ ވެސް ބަހެއް ވަޒަންކުރާ މާއްދާއެއް ކަމަށް ދެނެގެން، ބަހުގެ ހުނަރުތައް އަށަގެންނެވުމަށް މަސައްކަތް ކުރާން ފަށާށެވެ. މިކަމަށް ޓަކައި މައުލޫމާތު ހިމެނޭ ފޮތްތައް ކިޔާށެވެ. ޚާއްޞަކޮށް ދިވެހިބަހުން ހުންނަ ފޮތްތައް ކިޔުމަށް ސަމާލުކަން ދޭށެވެ. މީގެއިތުރުން، އަމިއްލައަށް ލިޔުންތައް އުފައްދަން މަސައްކަތް ކުރާށެވެ. މޮޅު ލިޔުންތެރިންގެ ލިޔުންތަކުގައި ހުންނަ ލިޔުންތެރިކަމުގެ އުސްލޫބުތަކާއި ކަލިމަތައް ދެނެގަނެ އެ ގޮތްތައް އަމިއްލަ ލިޔުމުގައި ހިމަނާށެވެ. ހަމައެހެންމެ، ކިޔާ ކޮންމެ އެއްޗެއް ދޭހަވޭތޯ އަމިއްލައަށް ވަޒަންކުރާށެވެ. މިކަންކުރުމަށް، ކިޔުމަށްފަހު ކިޔުނު ފޮތުގެ ނުވަތަ ލިޔުމުގެ ޚުލާޞާ އަމިއްލަ ޢިބާރާތުން ލިޔެލާށެވެ. މިގޮތަށް ހެދުމުން، ތިމާއަށް ނޭނގި ނަމަވެސް ސިކުނޑީގައިވާ ބަހުގެ ރަދީފަށް މަޢުލޫމާތު އިތުރުވާނެކަން ހަނދާން ބަހައްޓާށެވެ. ނަތީޖާއަކަށް ވެގެންދާނީ، ލިޔުންތައް އުފެއްދުމުގައި ދިމާވާ ދަތިތައް ހައްލުވުމެވެ. 

ދިވެހިބަހަށް އޮންނަ ލޯބި އިތުރުކުރުމުގެ މަސައްކަތް ކުރާއިރު، ދިވެހި މާއްދާގައި އިމްތިހާނު ކުރެވޭ ބައިތައް މުޠާލިއާ ކުރާށެވެ. މިގޮތުން، ލިޔުންތެރިކަމާއި ދޭހައިގެ ބައިތައް ފަރިތަކުރާށެވެ. ޚުލާޞާކުރާން ދަސްކުރާށެވެ. ތީމެޓިކް ޚުލާޞާކުރުމުގެ އުކުޅުތައް ދަސްކުރާށެވެ. މީގެއިތުރުން، ލިޔުންތެރިކަމުގެ ބައިތަކުގެ މެދުގައިވާ އެއްގޮތް އަދި ތަފާތުތައް ދެނެގަނެ އެކި ޜޯންރާގެ ލިޔުން ލިޔުމުގައި ގެންގުޅެންވީ އުސްލޫބުތައް ދެނެގަންނާށެވެ. އަދި ލިޔުމުގެ މަޤްޞަދާއި ލިޔުން އަމާޒުވާ ކިޔުންތެރިނަކީ ކޮބައިކަން ދެނެގަންނާށެވެ. މިގޮތުން، ލިޔުންތެރިކަމުގެ ތަފާތު ބާވަތްތަކުގެ ދަށުން ލިޔެވިދާނެ ވައްތަރުތަކާ ގުޅޭ މައުލޫމާތު ހޯދާށެވެ. އަދި އެ ވައްތަރުތަކުގެ ލިޔުމުގެ އޮނިގަނޑު ދަސްކޮށް އެގޮތަށް ލިޔާން ފަރިތަކުރާށެވެ. އަނެއްކޮޅުން، އިމްތިހާނުގައި ވާހަކަ ލިޔާން ބޭނުންނަމަ ކުރުވާހަކަ ލިޔާން ފަރިތަކުރާށެވެ. މިކަމަށް ޓަކައި، އިމްތިހާނު ކުރެވޭ މިންގަނޑަށް އަދި އެ މިންވަރަށް ފެތޭހެން ލިޔެފައި ހުންނަ ކުރުވާހަކަ ގިނަގިނައިން ކިޔާށެވެ. މީގެއިތުރުން، ލިޔުމުގެ ވައްތަރުތަކުގެ ގޮތުގައި ހިމެނޭ ސިޓީގެ ވައްތަރުތަކާއި ސިޓީގެ އޮނިގަނޑާއި ތަފާތު ބޭނުމަށް ލިޔާ ސިޓީގެ ޢިބާރާތުގައި ގެންގުޅެން ޖެހޭ ތަފާތުތައް ދަސްކުރާށެވެ. މިއިން ކޮންމެ ބަޔަކުން އިމުތިހާނުގައި އަތުވެދާނެ ކަމަށް ލަފާކުރާ ސުވާލު އަމިއްލައަށް އުފައްދައިގެން މުޠާލިއާ ކުރާށެވެ. އަދި މުދައްރިސުންގެ ޚިޔާލު ހޯދާ، ތިމާގެ މަސައްކަތްތަކުން އިސްލާހު ކުރަންވީ ބައިތަކަކީ ކޮބައިތޯ ބަލާށެވެ. އޭރުން، އިމްތިހާނު ކުރެވޭ ބައިތަކަށް ފަރިތަވާނެއެވެ. 

ސާނަވީ ނިންމާ އިމްތިހާނުގެ ދިވެހި މާއްދާއިން އޭ ނުވަތަ އޭ ސްޓަރ ހޯދަން ބޭނުން ނަމަ، ބަހަށް އޮންނަ ލޯބި އިތުރުކުރުމަށް އިސްކަންދޭށެވެ. ގިނަގިނައިން ދިވެހިބަހުގެ ފޮތްކިޔާށެވެ. އަދި އިމްތިހާނު ކުރެވޭ ބައިތަކަށް އަހުލުވެރިވެ މުޠާލިއާކުރާށެވެ. އެންމެ ފަހަރަކު ނޫނެވެ. އެތައް ފަހަރަކުއެވެ. މިކަން ކުރާއިރު، ހެދޭ ގޯސްތައް އިސްލާހު ކުރާށެވެ. މިގޮތުން، ހިއްސާކުރި އިރުޝާދުތަކާ އެއްގޮތަށް ޢަމަލުތައް ބައްޓަންކޮށް ފަރިތަކުރުމަށް އިސްކަންދޭށެވެ. އޭރުން، ސާނަވީ ނިންމާއިރު ދިވެހިން އޭ ސްޓަރ ލިބުމަކީ އުނދަގޫ ކަމަކަށް ނުވާނެއެވެ.

ނޯޓް: މިއީ ގުރޭޑް 10ގެ ދަރިވަރުންނަށް އެހީއެއްގެ ގޮތުން އެ ގުރޭޑުގެ ފެންވަރަށް ލިޔެފައިވާ އިރުޝާދުދޭ ލިޔުމެކެވެ.