ދިވެހިބަސް – ދިވެހި ޤައުމިއްޔަތުގެ ނާރެސް

ފަތުޙުﷲ އަޙްމަދު،

ވީޑިއޯ ބެއްލެވުމަށް:

https://youtu.be/iPTXZV7cN88

މާދަރީބަހުގެ ދުވަސް ފާހަގަކުރެވެމުންދަނީ ބަންގާޅުގެ ފަސް ޒުވާނުން އެ ޤައުމުގެ ބަސް ކަމަށްވާ ބަންގުލާ ބަހަށް ޓަކައި ވީ ޤުރުބާނުގެ ހަނދާން އާ ކުރުމާއެކު، ދުނިޔެއިން ނެތުމުންދާ ބަސްބަސް ރައްކާތެރި ކުރުމުގެ މުހިންމުކަމަށް ބަހުގެ އަހުލުވެރީން ހޭލުންތެރިކުރުމަށް ޓަކައިއެވެ.

14 އެޕްރީލް ދިވެހިން ފާހަގަކުރަމުން މިދަނީ ދިވެހިންގެ ޝަރަފާއި ފަޚުރު ކަމުގައި ބަލާ ދިވެހިބަސް ހިމާޔަތްކޮށް ރައްކާތެރި ކުރުމަކީ މުހިންމު ކަމެއްކަމަށް ދިވެހީން ޤަބޫލުކޮށް، ދިވެހި ބަހަށް ކުރިމަތިވަމުން އަންނަ ގޮން ޖެހުންތަކުން ބަސް ހިމާޔަތް ކުރުމުގެ މަޤްޞަދުގައެވެ. މިގޮތުން، ރަސްމީ ސިފައެއްގައި ދިވެހިބަހުގެ ދުވަހުގެ ގޮތުގައި 14 އެޕްރީލް ދިވެހިބަހުގެ ދުވަހުގެ ގޮތުގައި ފާހަގަކުރުމަށް ފަށައިފައިވަނީ 2015 ވަނަ އަހަރުން ފެށިގެންނެވެ. ދިވެހިބަހުގެ ދުވަސް ނިސްބަތްވަނީ ފަޟީލަތުއްޝައިހުލް މަރުހޫމް ހުސައިން ޞަލާހުންދީނަށެވެ. މަރުޙޫމު ޙުސައިން ޞަލާހުއްދީނަކީ ދިވެހިބަހަށް ޚާއްޞަ ސަމާލުކަމެއްދެއްވާ ބަހުގެ ތަރިކަތައް އުފަންކުރުމުގައި ލާމަސީލު ނަމޫނާ ދިވެހި އަދީބެކެވެ. ދިވެހިބަހުގެ ދުވަހުގެ ޝިއާރު ކަމުގައި މިއަހަރު ދިވެހިބަހުގެ އެކަޑެމީން ކަނޑައަޅާފައިވަނީ، "ދިވެހިބަސް - ދިވެހި ޤައުމިއްޔަތުގެ ނާރެސް" މި ޝިއާރެވެ.

ދިވެހިބަހަކީ ދިވެހިންނަކީ ކޮންބައެއްކަމާއި ދިވެހިންގެ އާދަކާދައާއި ދިވެހިންގެ އަމިއްލަ ވަންތަކަން ހާމަކޮށްދޭ އެންމެ މުހިންމު އެއް ބަހާއެވެ. ދިވެހިބަސް ގުޅިފައިވަނީ ދިވެހިންނާއެވެ. ދިވެހި ހިތްތަކާއެވެ. އެހިތްތަކުގައި ޖަހަމުންދާ ވިންދުތަކާއެވެ. ކޮންމެ މީހަކީމެ ތަފާތު މީހެކެވެ. އެހެންމެ ކޮންމެ ދިވެއްސަކީ ވެސް ތަފާތު މީހެކެވެ. އެހެން ނަމަވެސް، ކޮންމެ ދިވެއްސެއްގެ ހަމައެކަނި އެއްގޮތް ސިފަތަކަށް ބަލާއިރު އެންމެ މުހިއްމު އަސާސެއްގެ ގޮތުގައި ފެންނަ އަސާސަކީ ދިވެހިބަހެވެ. ހިތުގައި ދިވެހިބަހަށް ޓަކައި އުތުރި އަރަމުންދާ އިހުސާސްތަކެވެ. ދިވެއްސަކަށްވީތީ ހިތުގައި ޖަހަމުންދާ ވިންދުތަކުން އުފަންވާ ޤައުމީ ލޯތްބެވެ. މި ލޯބި ދެމެހެއްޓެމުންދަނީ ދިވެހިބަހުން ކަމަށްވާތީ ޤައުމިއްޔަތުގެ ބަހާތަކުގެ މެދުގައި ހިމެނޭ މުހިންމު އަސާސަކީ ދިވެހިބަސް ކަމުގައި ޤަބޫލުކުރަން ޖެހެއެވެ. އެހެނީ، ދިވެހިޤައުމިއްޔަތު އެއެއްޗެއްގެ މައްޗަށް ބަރޯސާވާ މައިގަނޑު އަސާސަކީ ދިވެހިބަހެވެ. އެހެންކަމުން، މި އަހަރުގެ ދިވެހިބަހުގެ ދުވަހުގެ ޝިއާރަކީ އެތައް ގޮތަކުން މާނަހުރި ޝިއާރެކެވެ.

ޤައުމާމެދު އެކި މީހުން ފަޚުރުވެރިވަނީ އެކި ގޮތަށް، އެކި ކަންކަމުގެ ސަބަބުންނެވެ. އެއްބަޔަކު މިޤައުމު ދެކެ ލޯބިވަނީ މި ޤައުމަކީ ހިމޭންކަމާއި ސުލްހަވެރިކަމުގެ ސުވަރުގެއަކަށްވާތީއެވެ. އަނެއްބަޔަކު މި ޤައުމުދެކެ ލޯބިވަނީ ޤައުމުގެ ޤުދުރަތީ ރީތިކަމާއި ހިތަށް ފަހިކަން ގެނުވައިދޭ މާހައުލަކަށްވާތީއެވެ.  އަނެއްބަޔަކު މި ދިވެހި ޤައުމު ދެކެ ލޯބިވަނީ ޤައުމުގެ ކާބަފައިންގެ ޤުރުބާނީ މަސައްކަތްތަކުން އަމިއްލަވަންތަކަމާއި އަމިއްލަ އުޞޫލުތަކެއް ދޫކޮށްފައިވާތީއެވެ. އަދި އެ އުޞޫލުތަކާއި އެގޮތްތަކަކީ އަބަދަށް ދެމިހުންނަ ސިފަތައް އެކުލެވިގެންވާ ތަހުޒީބު ކަންކަންކަމުގައި ފެންނާތީއެވެ. ތާރީޚާއި އާދަކާދައާއި ސަގާފަތާއި އަމިއްލަވަންތަ ތާރީޚީ ކަންކަމުގެ ސަބަބުންނެވެ. އަމިއްލަބަހާއި އަމިއްލަ އަކުރުގެ ސަބަބުންނެވެ. މިހުރިހާ ކަންކަމެއް މިއަދާ ހަމައަށް ވާސިލުވެފައިވަނީ ދިވެހިބަހުގެ ޒަރިއްޔާއިންނެވެ. މެދުވެރިއަކަށް ދިވެހިބަސް ވެގެންނެވެ. އެހެންކަމުން، ދިވެހިބަސް ދިރުވާ އާލާކުރުމަކީ ދިވެހި ބިމަށް އުފަން ކޮންމެ ދަރިޔަކުމެ ބޮލުގައި އެޅިފައިވާ ޤައުމީ ވާޖިބެކެވެ.

ދިވެހިބަހުގެ ދުވަހެއް ފާހަގަކުރަމުންދާ އިރު، މިއަދު ދިވެހިބަސް ދިވެހީން ގެންގޮސްދިން ހިސާބާމެދު ނަޒަރެއް ހިންގާލަން ޖެހެއެވެ. ދިވެހިބަހާއެކު ދިވެހިން ކުރަމުންދާ ދަތުރުގައި މިއަދު ދެވިފައިވަނީ ކިހައި ހިސާބެއްގައިތޯ ބަލައިލަން ޖެހެއެވެ. އެކާވީސްވަނަ ޤަރުނުގެ ތެރޭގައި ދިވެހީން ދުވަސްތައް ގުނަމުންދާއިރު، ދިވެހިބަސްވަނީ ދިވެހިން ހެއްވައިލަދީފައެވެ. ދިވެހި ދަރީންގެ ޢިލްމީ ކުރިއެރުމަށް އެހީތެރިކަން ފޯރުކޮށްދީފައެވެ. ދިވެހިބަހުގެ ސަބަބުން އެތަކެއް ހުނަރުތަކެއް ދަސްކޮށްދީފައެވެ. އަޑުއެހުމާއި ވާހަކަދެއްކުމާއި، ވިސްނުމާއި ޚިޔާލުން އައު އުފެއްދުންތައް ނެރުމަށް މަގުފަހިކޮށްދީފައެވެ. ފާޅުކުރަން ބޭނުން ހަމަ ކޮންމެ އަޑެއް އެއްވެސް އުނދަގުލެއް ނެތި ފާޅުކުރުމަށް ވާހަކަދެއްކުމަށް ބޭނުންވާ ގުނަވަންތައް ހާނުވައިދީފިއެވެ. ދޭހަވުމާއި ދޭހަކޮށްދިނުމަށް މަދަދުވެރިވެފައެވެ. އެއްވެސް އުޖޫރައެއް ނެތި ތިމާގެ ވިސްނުމުގެ ޤާބިލުކަން އިތުރުކޮށްދީފައެވެ. މިއީ އެހެންބަސްބަހުގެ އަހުލުވެރިންނަށް ހޯދައިގަންނަށް ފަސޭހަ ކަންކަމެއް ނޫނެވެ. އެހެންކަމުން، މި ހުރިހާ ހުނަރުތަކާއި މި ހުރިހާ މަންފާތަކެއް ތިމާގެ މުނިދަރީންނަށް ފޯރުކޮށްދޭން ބޭނުންނަމަ ދިވެހިބަހަށް ޚިދުމަތްކުރުން އުފަލެއް ކަމުގައި ހަދަންޖެހެއެވެ. އެހެނީ، ބަސްތިމާއަށް ޚިދުމަތްކުރާނީ ތިމާ ބަހަށް ޚިދުމަތް ކުރާނަމައެވެ.  

މިއަދު ދިވެހިބަހުން މަތީ ތަޢުލީމާ ހަމައަށް އުނގެނުމުގެ ފަހި ފުރުޞަތުތައް ވަނީ ހުޅުވާލެވިފައެވެ. މިހާރު ދުރުމި އަޅަމުންދަނީ މައްދިވެހިބަހުން އެހެނިހެން ދާއިރާތަކުން ހިންގޭ މަތީ ތަޢުލީމުގެ ފުރުޞަތުތައް ފަހިވެގެންދާނެ ދުވަހަކަށެވެ. މިއަދު އުފަކުރަންޖެހޭ އަނެއް ކަމަކީ ދިވެހިބަހަށް ޚިދުމަތްކޮށްދެއްވާނެ ދިވެހި ޒުވާން ޖީލެއް ބިނާވަމުންދާތީއެވެ. ޙުސައިން ޞަލާހުއްދީން، މުޙައްމަދު އަމީނު، މުޙައްމަދު ޖަމީލު، ނައިބުތުއްތު ފަދަ އަދީބުންގެ ފުށުން ހިތްވަރު ލިބިގެން އެ ބުންވަރާއި ފަންވަރު ހުރި ނޫކަށި ފުރައިގެ ޒުވާނުން ދިވެހިބިމުން ކުރިލާ ހެދެމުންދާތީއެވެ. ދިވެހިބަސް ދިވެހި ޤައުމިއްޔަތުގެ ނާރެހޭ ބުނެ އަޑުއުފުލާނެ ޒުވާނުން އިތުރުވަމުންދާތީއެވެ. ދުޢާއަކީ ތިޔައިން ހަމަ ކޮންމެ ދިވެއްސަކީ ދިވެހިބަހާމެދު ފަޚުރުވެރިވާ، ދިވެހިބަސް ހިމާޔަތްކުރުމަށް މަސައްކަތްކުރާ ދަރިއެއްގެ ގޮތުގައި ގުނައިލެވޭ ވަރަށް ޚިދުމަތުގެ މައިދާނުން ފެންނަ މިންވަރު އިތުރުވުމެވެ. ދިވެހިބަހާއި ދިވެހި އަދަބީ ގުލްޝަނަށް މޫރިތިކަމާއި ހާއުފާކަން ގެނުވައި، އަޝްރަފީ ބަހާރުން އުޖާލާކަން ގެނުވައިށިއެވެ. އާމީން!