ކެއުމަކަށް ސަޔެއް

ފަތުޙުﷲ އަޙްމަދު/ މޫރިތިގެ

ރާއްޖޭގެ މީހުން ދިރިއުޅޭ ރަށްރަށުގައި ހުރި އާސާރީތަންތަން ދިރާސާކޮށް މައުލޫމާތު އެއްކުރުމަށް މަސައްކަތް ކުރަމުން ދިޔަ ޓީމެކެވެ. ނާޝިދަކީ (އަސްލު ނަމެއްނޫން) އެގުރޫޕުގައި ހަރަކާތްތެރިވާ ހީވާގި ޒުވާނެކެވެ. ޒުވާނަކަށް ވީނަމަވެސް އޭނާގެ ލޮލަކީ 65 އަހަރުން މަތީގެ މީހުންގެ ލޮލަށްވުރެ ބަލިކަށި ލޮލެކެވެ. ކައިރި ފަސޭހައިން ނުފެންތާނގައި ދުރުފެންނަނީވެސް ފުސްކޮށެވެ. ކޮންމެ ތަނަކަށް ދިޔަ ނަމަވެސް ނާޝިދު އުޅެނީ އައިނު އަޅައިގެންނެވެ. މާސްކެއްވަރުގެ ބޮޑު އައިނެކެވެ. ކަޅު ދުނިގަނޑުލީ ނަންބަރު އައިނެކެވެ.

ދިރާސާއަށް މައުލޫމާތު އެއްކުރަމުންދިޔައީ ހިރިގަލުން ތައްޔާރުކޮށްފައިވާ މިސްކިތަކުންނެވެ. މިސްކިތް ސާފުކުރުމުގެ މަސައްކަތް ނިންމާލުމަށްފަހު ޓީމުން ނިންމީ ރަށުގެ ގޮނޑުދޮށުގައި ހިނގާލަން ދިއުމަށެވެ. އެޓީމުގެ ގިނަ މެމްބަރުން އަލަށް އާދެވުނު ރަށަކަށްވާތީ އަތިރިމަތި ބަލައިލުމާވެސް އެކުގަ އެވެ. އިރުއޮއްސޭ މަންޒަރު ބަލައިލުމަށް ވެސް ބޭނުންވެގެންނެވެ. ސާދަ ވަރަކަށް މީހުންގެ އެ ޓީމު، ސަކަރާތް ޖެހުމާއި އެކަކު އަނެއްކަކަށް ޖެއްސުން ކުރުމުގައި ވަގުތުތައް ހޭދަކުރަމުން ދިޔަ އެވެ. ނާޝިދާ އިންވެގެން ހުރީ ހާރޫނެވެ. އޭރު އެމީހުން ތިބީ ދިޔަރެސް މަތީގައެވެ. ހާރޫނު ކުއްލިއަކަށް ނާޝިދު މޫދަށް ކޮށްޕާލިއެވެ. ނާޝިދު ގުންޑޮޅި ތެރެއަށް ގުޅަވި އެވެ. އެވަގުތު އޭނާގެ ރަސްމީ އައިނު މޫދުތެރެއަށް ވެއްޓުނެވެ. ނާޝިދަށް މަންޒަރުތައް ފެނުމަށް އުނދަގޫވި އެވެ. މަންޒަރު ފުސްވި އެވެ.

"މަގޭ އައިނު... މަގޭ އައިނު... މޫދަށް... ހޯދައިދީ..."

"އައިނު ހޯދައިދެވޭނީ ކެއުން ދޭން ބުނީމަ..." ޖެހިގެން ހުރި ޤާސިމު ހިނިތުންވެލަމުން ބުނެލި އެވެ.

"އޯކޭ ހޯދައިދިން މީހަކަށް ކެއުމެއް ދޭނަން..." ނާޝިދު ބޭނުންވީ ކެއުމެއް ދީގެން ނަމަވެސް އައިނު ހޯދާށެވެ.

ޓީމުގައި ހިމެނޭ ހުރިހާ ފިރިހެނުން ނާޝިދުގެ އައިނު ހޯދުމަށް އުޅެގަތްގޮތުން ކައިރީތިބި އަންހެނުންތައް ބިނދި ބިނދިފައި ހެމުން ދިޔަ އެވެ. އަނގަމަތީ އަތްއަޅައިގެން ތިބެ އެވެ. ޕަކަޕަކަލަމުންނެވެ.

"އޯޅަބިއޯ ކެއުން ލިބުނީ އޯ... އައިނު މިއޮތީ އޯ" ޤާސިމު އައިނު ނަގައި އެންމެންނަށް ދައްކާލި އެވެ.

"ނަސީބެއް... އަވަހަށް ގެނޭ" ނާޝިދު ބޭނުންވީ އައިނެވެ. ޖެހިގެން އަންނަ ރެއަށް ކެއުމަށް ތައްޔާރުވެ ބަނޑުހުސްކުރަން ޤާސިމް އަށް އެންގުމަށް ފަހުގައެވެ.

ޖެހިގެން އައި ދުވަހުވެސް އެންމެން މަސްޢޫލުވެ މަސައްކަތް ކުރަމުންދިޔައީ ވަރަށް އަވަދި ނެތިއެވެ. ހެނދުނުން ސުރެ މަސައްކަތުގައި އުޅުމުން ގިނަމީހުން ތިބީ ވަރުބަލި ވެފަ އެވެ. ޤާސިމަކީ ބިމުގެ ސަރވޭ ކުރާ ޓީމުގެ މީހެކެވެ. ހާރޫނަކީ ފޮޓޯނެގުމުގައި އުޅޭ ޓީމުގެ މީހެކެވެ. ޤާސިމު އަވދި ނެތި މަސައްކަތްކުރަމުން ދިޔައީ ކުރެހުމުގެ ބައިތައް ކޮންޕިއުޓަރައިޒްކުރެވޭތޯ އެވެ.

"އޭތް ކޮބައި މިރޭދޯ ކެއުން..." ހާރޫން އައިސް ޤާސިމުގެ ކައިރީ ހަމަޖެހިލި އެވެ.

"އާނ! ކިހިނެއްވީ؟" ޤާސިމު މަސައްކަތަށް ގެއްލި އިނދެ ޖަވާބު ދިނެވެ.

"އަސްލު ނާޝިދު މޫދަށް ކޮށްޕާލީ އަހަރެން! ޤާސިމަށް ކެއުން ތިޔަ ލިބުނީ އަހަރެން ނާޝިދު މޫދަށް ކޮށްޕާލީމަ! އެހެން ނޫންނަމަ ކެއުން ނުލިބޭނެ! އެހެންވީމަ ކެއުމުގެ އަސްލަކީ އަހަރެން! އަހަންނަށް ނުދީ ތިޔަ ކެއުން ޤާބެއަށް ޙައްޤެއް ނުވާނެދޯ!" ހާރޫނު ވާހަކަ ކުރިއަށް ގެންދިޔައެވެ.

"އެހެންވީމަ ކީކެ ތިބުނަނީ!" ޤާސިމް މަސައްކަތް މެދު ކަނޑާލުމަށްފަހު ހާރޫނަށް ބަލައިލިއެވެ. ހާރޫނަކީ އަބަދުމެ ޖޯކު ޖަހައި މީހުން ހެއްވުމުގައި އުޅޭ މީހަކަށްވާތީ އެވެ.

"އަހަންނަށް ކެއުން ބަދަލުކުރަން ހިނގާށޭ! ނޫނީ..."

"ހޯހޯ ތިކަމެއް ނުވާނެ... ކެއުން އެއީ މަ ކުރި މަސައްކަތުގެ އަގު... ކަލޭއަށްވެސް އޮތްދޯ އެޗާންސް" ޤާސިމްވެސް ހާރުނާގުޅުނެވެ. މަސައްކަތް މެދުކަނޑާލަމުންނެވެ.

"އެހެންވެ މި ބުނަނީ... އެހެންނޫނީ ހިނގާށޭ މަށަށް މިގަޑީ ސަޔެއްދޭންދާން ހޮޓަލަށް"

"ކީއްވެހޭ؟"

"އެއީ އަހަރެން ނާޝިދު މޫދަށްކޮށްޕާލީމަ އައިނު މުދަށް ވެއްޓުނީ... އައިނު ހޯދައިދިން މީހާއަށް ލިބޭ ކެއުމުގެ ދެބައިކުޅަ އެއްބައި މަށަށް ޙައްޤުވާނެތީ... ގާބެއަށް މަށާހުރެ ކެއުމެއް ލިބުނީމަ"

"އޯކޭ! ހިނގާދަމާ!"

ދެމީހުން އެއްބަސްވެ ހަވީރުގެ ސަޔަށް ހޮޓަލަށް އެރިއެވެ. ހެދިކާ ތަބަށް ގެނެސް ވެއިޓަރު ހެދިކާ ނެގުމަށް އެދުމުން ހާރޫނު ސުވާލުކޮށްލީ ހެދިކާ އަދަދަށެވެ. ވެއިޓަރު ހިނިތުންވެލަމުން 58 ހެދިކާކަމަށް ބުންޏެވެ. ހެދިކާ ތަބައް ބަހައްޓާ ސައި ގެނެސް ދިނުމަށް އެދުމުން ވެއިޓަރު އެތެރެއަށް މިސްރާބު ޖެހި އެވެ.

ހިނދުކޮޅެއް ނުވަނީސް އެއްކަލަ 58 ހެދިކާ އެކުގައި ކައި ހުސްކޮށްލި އެވެ. ޤާސިމު އިނީ ބުނާނެ އެއްޗެއް ނޭނގިފަ އެވެ. އޭނައަށް ފެނުނު މަންޒަރުންނެވެ. ކެއުމަށް ކުޅަދާނަ މީހުންވެސް އުޅޭތީ އެވެ. އެ ތަބަކުން އޭނާ ނެގީ އެންމެ 5 ހެދިކާ އެވެ. ބާކީ ހުރިހާ ހެދިކާތަކެއް އެ ކެއީ ހާރޫނެވެ. އޭނާގެ ކުރިމަތީގަ އެވެ. އެންމެ ފަހުން ބިލް ގެނައުމުން ޤާސިމް ބިލް ބަލައިލި އެވެ. ހެދިކާއެއް ދެ ރުފިޔާގެ މަގުން 116ރުފިޔާ، ބިލެތްއަރިއަށް 5 ރުފިޔާ، ފެންފުޅިއަށް 5 ރުފިޔާ ކަޅު ހިލޭ ޖީއެސްޓީއަށް 7.56 ރުފިޔާ، ޖުމުލަ 133.56ރުފިޔާ އެވެ. ޤާސިމު ބުނެލި އެވެ. "މަ ޔަޤީން މިރޭ މަށަށް ނާޝިދުދޭ ކެއުމަށްވެސް މިވަރު ނާރާނެ... އާނ މަ އާއްމުކޮށް ކާނީ ޕްރައިޑް ނޫޑްލިސް އެ 35ރުފިޔާއަށް، ދެން މަށާއެކު ނާޝިދު ވެސް ނޫޑްލިސް އެވެސް 35 ރުފިޔާއަށް، ދެން ފެނާއި ދުފުން އެ 10 ރުފިޔާ، ދެން ޖީއެސްޓީއަށް ފަސްވަރަކަށް ރުފިޔާ ވިޔަސް 85 ރުފިޔާ"

ޤާސިމުގެ ވާހަކަ ނުނިމެނީސް ހާރޫން ހިނިގަނޑެއް ޖަހައިލި އެވެ. އަދި ބުންޏެވެ. "ކެއުމެއް ލިބިގެން އެކަމުގެ އުފަލުގައި ދިން ސައި މާ ޚަރަދު ބޮޑުވެއްޖެ ދޯ... އެއްކަލަ މަށަށް އެކެއުން ސެޓްކޮށްލި ނަމަ... އެހެންވީމަ މިފަހަރު މަށަށް މާރަނގަޅަށް ލިބިއްޖެތާދޯ"

ޤާސިމު ބޯކަހައިލަމުން ވޮލެޓް ނަގައި ބިލް ދެއްކަން ދަމުން ބުނެލި އެވެ. "އޭ ކަލޭ މިވާހަކަ އަނެއްކާ މާ މަޖާވެގެން ނުދައްކާތި މަށަށް މި ކަމުގަ އެންމެން ދެން ދިމާކުރާނީ"